ފްރާންސް ލީގުގައި ލެންސްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން އެއް ވަނަ މަގާމުގައި ލީޑު ފުޅާ ކޮށްފި އެވެ.

ލެންސްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު ޕީއެސްޖީން ކާމިޔާބު ކުރީ 2-1 އިންނެވެ. އެއީ މެޗުގައި ލެންސް އިން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ.

މެޗުގެ ފުރަތަމަ ހާފުގެ 36 ވަނަ މިނެޓުގައި ލެންސް އަށް ލީޑު ނަގައިިދިނީ އެމްބަލާ އެންޒޮލާ އެވެ. މެޗުގެ ފުރަތަމަ ހާފު ލެންސް އިން ނިންމާލީ ވެސް ލީޑުގައި އޮވެގެންނެވެ. ނަމަވެސް މެޗުގެ ދެ ވަނަ ހާފުގައި ޕީއެސްޖީން ވަނީ ދެ ލަނޑު ޖަހައިގެންނެވެ. މެޗުގެ ދެ ވަނަ ހާފު ފަށައިގެން ކުރީ ކޮޅު ޕީއެސްޖީ އަށް ނަތީޖާ ހަމަހަމަ ކޮށްދިނީ ފަބިއަން ރުއީޒް އެވެ. އޭނާ އެ ލަނޑު ޖެހީ ބްރާޑްލޭ ބާކޮލާ ތަނަވަސްކޮށްދިން ފުރުސަތެއްގަ އެވެ. މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، މެޗުން ޕީއެސްޖީ މޮޅުވީ ބާކޮލާ ޖެހި ލަނޑުންނެވެ.

މޮޅާއެކު ޕީއެސްޖީ އެއްް ވަނައިގައި އޮތީ މިހާތަނަށް އެ ޓީމު ކުޅެފައިވާ 18 މެޗުން 46 ޕޮއިންޓާ އެކު އެވެ. ޕީއެސްޖީ އަށް ވުރެ އެއް މެޗު މަދުން ކުޅެގެން، ދެ ވަނައިގައި މާސޭ އަށް ލިބެނީ 36 ޕޮއިންޓެވެ.