މިނިސްޓަރ ހައިދަރު އަށް 32 ސިޓީ، ބައްދަލު ކުރަން އެދި 53 ރިކުއެސްޓް، އެއްފަހަރު ވެސް އަޅައެއް ނުލެއްވި
މުއްތަލިބު ވެސް ވިދާޅުވީ ބައްދަލު ނުކުރައްވާނޭ ކަމަށް
ކުރީގެ ހައުސިންގ މިނިސްޓަރ ޑރ އަލީ ހައިދަރު އަދި މިހާރުގެ މިނިސްޓަރ ޑރ އަބްދުﷲ މުއްތަލިބު - ގެދޮރުވެރިޔާ ސްކީމުގެ ދަށުން ހުޅުމާލެއިން ދޫކުރާ 4000 ފްލެޓްގެ މައްސަލަ ބޮޑުވެ، އަދިވެސް ލިސްޓު އާއްމު ކުރެވ
ކުރީ ސަރުކާރުން ފެށި ގެދޮރުވެރިޔާ މަޝްރޫއުގެ ދަށުން ހުޅުމާލޭގައި އިމާރާތް ކުރަމުންދާ 4000 ސޯޝަލް ހައުސިންގ ޔުނިޓާ ބެހޭ ގޮތުން އުފެދިފައިވާ މައްސަލަތަކުގައި ކުރީގެ ހައުސިންގ މިނިސްޓަރު އަލީ ހައިދަރު އަށް 32 ސިޓީ ފޮނުވި ކަމަށާއި އެމަނިކުފާނާ ބައްދަލު ކުރަން 53 އެޕޮއިންޓްމަންޓް ރިކުއެސްޓް ފޮނުވި ކަމަށާއި އެހެން ނަމަވެސް އެއް ފަހަރުވެސް ބައްދަލު ނުކުރެއްވި ކަމަށް ފަހި ޔޫނިއަން ޖަމްއިއްޔާ އިން ބުނެފިއެވެ.
މިކަން ހާމަ ކޮށްފައިވަނީ ހައިދަރުގެ ބަދަލުގައި ހައުސިންގ މިނިސްޓަރު ކަމަށް ފަހުން އައްޔަން ކުރެއްވި އަބްދުﷲ މުއްތަލިބް އާ ބައްދަލު ކުރުމަށް އެދި އެ ޖަމްއިއްޔާ އިން ފޮނުވި ސިޓީ އެއް ގައެވެ.
"މުއްތަލިބަކީ ކުރިން ތިއްބެވި ބޭފުޅުންނާ މުޅިން ތަފާތު ޝަހުސިއްޔަތެއްގެ ގޮތުގައި ބެލެވޭތީ، ފަހި ޔޫނިއަންގެ ފަރާތުން ބައްދަލު ކޮށް މަޝްވަރާ ކޮށްލަން ބޭނުންވެއެވެ." އެ ޔޫނިއަންގެ ސިޓީގައި ވެއެވެ.
"މަނިކުފާނުގެ ޒައާމަތުގައި އަމާން އޮމާން ކަމާއެކު ރައްޔިތުންގެ އަޑު އައްސަވާ ރައްޔިތުންނާ ގާތުން ޚިދުމަތް ދެއްވަމުން ގެންދަވާ ވުޒާރާއެއްގެ ގޮތުގައި ފެނިގެން ދިއުމީ މި ޔުނިއަންގެ އެދުމެއް ކަމުގައިވެސް ދަންނަވަމެވެ." 6 ޖެނުއަރީ 2025 ގައި ފޮނުވި ސިޓީގައި ވެއެވެ.
"ވީ އެންމެ އަވަސް ފުރުސަތެއްގައި މިނިސްޓަރާ ބައްދަލު ކޮށްލެވޭނެ ގޮތް" ހަދައިދިނުމަށް އެދި ފޮނުވި ސިޓީގެ ޖަވާބު ޖެނުއަރީ 16 ވަނަ ދުވަހު މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ދިން އިރު އެ ޖަވާބުގައި ވަނީ "އެއްވެސް ފަރާތަކާ ބައްދަލު ނުކުރަން ނިންމާފައިވާ ކަމަށެވެ."
ސަބަބެއް ކަމަށް ސިޓީގައި ވަނީ "ވެރިފިކޭޝަން މަރުހަލާގެ އިންސާފުވެރިކާމާއި، ނުފޫޒުން އެއްކިބާވެފައިވާކަން ކަށަވަރު ކުރުމަށްޓަކައި" ކަމަށެވެ.
