ވުލްވްސްބާގް ބަލިކޮށް، ބަޔާން ކުރިއަށް

ޖަރުމަނު ލީގުގައި ވުލްވްސްބާގާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކުން ލީގު ތާވަލްގެ އެއް ވަނައިގައި ކުރިއަށް ޖެހިލައިފި އެވެ.

ބަޔާންގެ އަމިއްލަ ދަނޑު، އަލިއާންޒް އެރީނާގައި ހޮނިހިރު ދުވަހުގެ ރޭ ކުޅުނު މެޗު ބަޔާނުން ކާމިޔާބު ކުރީ 3-2 އިންނެވެ. މެޗުގެ ފުރަތަމަ ހާފުގައި ބަޔާނުން ދެ ލަނޑު ޖެހިއިރުމ ވުލްވްސްބާގުން އެއް ލަނޑު ޖެހި އެވެ. ދެ ވަނަ ދެ ޓީމުގެ އަނެއް ލަނޑުތައް ފެނުނީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 20 ވަނަ މިނެޓުގައި ބަޔާނަށް ލީޑު ނަގައިދިނީ ލިއޯން ގޮރެޓްޒްކާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޔޯޝުއާ ކިމިކް އެވެ. އޭގެ ފަހުން މެޗުގެ 24 ވަނަ މިނެޓުގައި މުޙައްމަދު އަމޯރާ ޖެހި ލަނޑުން ވުލްވްސްބާގުން ވަނީ ނަތީޖާ ހަމަހަމަ ކޮށްފަ އެވެ.

ނަމަވެސް، މެޗުގެ 39 ވަނަ މިނެޓުގައި ބަޔާނުން ވަނީ ދެ ވަނަ ލަނޑެއް ޖަހައި އަލުން ލީޑު ނަގައިފަ އެވެ. ބަޔާންގެ ދެ ވަނަ ލަނޑު މައިކް އޮލައިސޭ ޖެހީ ލެރޯރީ ސާނޭ ތަނަވަސްކޮށްދިން ފުރުސަތެއްގަ އެވެ. މެޗުގެ ފުރަތަމަ ހާފުގެ އިތުރު ވަގުތުގައި ކިމިކް ބަޔާންގެ ތިން ވަނަ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ.

މެޗުގެ ދެ ވަނަ ހާފުގެ 62 ވަނަ މިނެޓުގައި ގޮރެޓްޒްކާ ވަނީ ބަޔާންގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ވުލްވްސްބާގްގެ ދެ ވަނަ ލަނޑު ޖެހީ ވެސް އަމޯރާ އެވެ.

މޮޅާއެކު ލީގު ތާވަލްގެ އެއް ވަނައިގައި ބަޔާން އޮތީ މިހާތަނަށް އެ ޓީމު ކުޅެފައިވާ 18 މެޗުން 45 ޕޮއިންޓު ހޯދައިގެންނެވެ. 14 މެޗުން ބަޔާން މޮޅުވެފަައިވާއިރު، ތިން މެޗުން ވަނީ އެއްވަރުވެފަ އެވެ. މި ސީޒަންގެ ޖަރުމަނު ލީގުގައި ބަޔާން ބަލިވެފައި ވަނީ އެންމެ މެޗަކުންނެވެ.