ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ވަގު ފޯމު ފުރައިގެން އެތައް ބަޔަކު ވައްދާފައިވާ މައްސަލައިގައި ތަޙުޤީޤީ އިދާރާގެ އިސްވެރިޔާ ކުރެއްވި ވައްކަމާ ގުޅިގެން ފުލުހުން އަމަލުކުރާނީ ކޮން ގޮތަކަށްތޯ ވިދާޅުވެ، އެމްޑީޕީގެ ކުރީގެ ނައިބު ރައީސް މުޙައްމަދު ޝިފާޒް ސުވާލު އުފައްދަވައިފިއެވެ.
އެމްޑީޕީން ބުރާސްފަތި ދުވަހުގެރޭ ޕީޓްރަލް ޕާކު ކަންމަތީގައި ބޭއްވި ކަންމަތީ ޖަލްސާގައި ވާހަކަ ދައްކަވަމުން ޝިފާޒް ވިދާޅުވީ، ފެނިގެން މިދިއައީ ދިވެހި ރައްޔިތުންގެ ޝަޚުޞު ވަގަށް ނެގިތަންކަމަށެވެ. ޝިފާޒް ވިދާޅުވި ގޮތުގައި ޑީއެންއާރުގެ މުޅި ޑޭޓާ ނަގައިގެން ރައްޔިތުންގެ މެމްބަރޝިޕް ކަހާލާފައިވާއިރު، މީގެ އެންމެ ނުރައްކާތެރި ކަމަކީ މިކަމާ ގުޅިގެން ކުރެވޭނެ އެއްވެސް ކަމެއް ނެތުމެވެ.
"މި ޤާނޫނު އަސާސީ ހޯދި އެންމެ މުހިންމު އެއް ބޭނުން. އަނެއްކާ ބީވެ މިދިޔައީ. އެއްބާރު އަނެއްބާރަށް ފާރަވެރިވެވޭނެ ދައުލަތް ހިންގުމުގެ ނިޒާމް. ރައްޔިތުންގެ މަޖިލީހުން ކުރެވޭނެ ކަމެއް ނެތް. ކޮށްގެން މިއުޅޭ ކަމަކީ ފުލުހުންގެ އެންމެ އިސްފަރާތް ވައްކަން ކުރީ. އަޅުގަނޑުމެންގެ ސަލާމަތާއި ރައްކާތެރިކަމާއި ހިމާޔަތާއި އަދި ޤާނޫނު ތަންފީޒު ކުރުމުގެ އެންމެ މުހިންމު ދައުރެއް އަދާކުރައްވަން ހުންނެވި ހޯމް މިނިސްޓަރު އިސްވެ ހުންނަވައިގެން ފުލުހުންގެ ވެރިޔާ، މުޅި ތަޙުޤީޤީ އިދާރާގެ އެންމެ އިސްވެރިޔާ މިއުޅެނީ ބޮޑު ވައްކަމެއް ކޮށްގެން. ސުވާލަކީ އެ ވައްކަން ދެން ބަލާނީ ކާކުހޭ. އެކަން ތަޙުޤީޤު ކުރާނީ ކާކުހޭ" ޝިފާޒް ވިދާޅުވިއެވެ.
ޝިފާޒް އިތުރަށް ވިދާޅުވީ ދިވެހި އެއްވެސް ފަރުދަކަށް ނުދޭހާ އިނާޔަތާ، ހިމާޔަތާ ރައްކާތެރިކަން ދިވެހި ފުލުހުންނަށް ލިބޭ ކަމަށާއި، އެއީ ރައްޔިތުންގެ ދިފާޢުގައި ތިއްބަވާތީ ކަމަށެވެ.
"ތިބޭފުޅުންނަށް މުސާރަ ދެނީ ހަމަ މި ރައްޔިތުންގެ ފައިސާއިން. އިޝުއަރެންސް ދެން، ބޯހިޔާވަހިކަން ދެން، ޔުނީފޯމްވެސް ދެން، އަނބިދަރިންނަށްވެސް ބޭސްފަރުވާދެން. ދިވެހި އެއްވެސް ފަރުދަކަށް ނުދޭހާ އިނާޔަތާ، ހިމާޔަތާ ރައްކާތެރިކަން ލިބޭ ދިވެހި ފުލުހުންނަށް. އަޅުގަނޑުމެން ލޯބިން ކޮށްދޭ ކަމެއް އެއީ. އަޅުގަނޑުމެންގެ ދިފާއުގައި ތިއްބަވާތީ އުފަލުން ކޮށްދޭ ކަމެއް އެއީ" ޝިފާޒް ވިދާޅުވިއެވެ.
ޝިފާޒް ވަނީ، ފުލުހުންގެ އެންމެ އިސްވެރިޔާ މިވަރުގެ ބޮޑު ވައްކަމެއް ކުރުމުން ހައްދަވާނީ ކިހިނެއްތޯ ފުލުހުންނާ ސުވާލު ކުރައްވާފައެވެ.
"ތިބޭފުޅުންގެ އެންމެ އިސްވެރިޔާ މިވަރުގެ ބޮޑު ވައްކަމެއް ކުރީމާ ތިބޭފުޅުން ކިހިނެއްތޯއޭ ހައްދަވާނީ. އަޅުގަނޑުމެން އެކަމަށް އަޑު އުފުލަން ނުކުތީމާ އަޅުގަނޑުމެންނާ ދިމާލަށް އިދިކޮޅަށް އަންނާނީތޯއޭ" ޝިފާޒް ސުވާލު ކުރެއްވިއެވެ.
ޝިފާޒް ވިދާޅުވީ، މި ޤާނޫނުއަސާސީ އެންމެ ބޮޑަށް ބޭނުންވެފައިވަނީ ފުލުހުންގެ އިތުބާރު ޤާއިމުކުރުމަށް ކަމަށާއި، ރައްޔިތުންގެ އިތުބާރު ދިވެހި ފުލުހުންގެ މުއައްސަސާއަށް ހޯދުން ކަމަށެވެ. ނަމަވެސް، އެކަން ކިރިޔާ ވާން އުޅޭ ހިސާބަށް ދާއިރަށް ކޮންމެ ފަހަރަކު ފަނުފުލުން ދުއްވާލާ ކަމަށް އޭނާ ފާހަގަކުރެއްވިއެވެ.
ޝިފާޒް ވިދާޅުވި ގޮތުން އެކަން އެހެންވަނީ "މިފަދަ ނާޤާބިލު ޖާހިލު ވެރިން އަޅުގަނޑުމެންނަށް ލިބޭތީ" އެވެ.
ދިވެހި ރައްޔިތުންގެ ޒާތީ މައުލޫމާތުން ވައްކަންކުރުމުގެ މި ބޮޑު ޖަރީމާ ހިންގުމުގައި ހޯމްލޭންޑް، ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާނު އިސް ދައުރެއް އަދާކޮށްފައިވާތީ މިނިސްޓަރުގެ އެ ހުތުރު އަމަލު އެތައް ބަޔަކު ވަނީ ކުށްވެރިކޮށްފައެވެ.
އިދިކޮޅު އެންމެ ބޮޑު އެއް ޕާޓީ އެމްޑީޕީ އިން ވަނީ މިމައްސަލަ ތަހުގީގު ކުރުމަށް ގޮވާލުމާއެކު، އިންސާފުވެރިކަމާއެކު ތަހުގީގު ހިންގަން މިނިސްޓަރ އިހްސާން މަގާމުން އެކަހެރި ކުރުމަށް ވެސް ގޮވާލާފައެވެ.
ޑިޕާޓްމަންޓް އޮފް ނެޝަނަލް ރެޖިސްޓްރޭޝަންގެ މުވައްޒަފުންނާއި، ވަސީލަތްތަކާއި އެ އިދާރާގައި ހުރި މައުލޫމާތު ބޭނުންކޮށްގެން ޕީއެންސީއަށް މީހުން ވެއްދުމުގެ މުޅި އިޖުރާއަތު ހިނގައިދިޔައީ މިނިސްޓަރު އިހުސާނުގެ ސީދާ ބެއްލެވުމުގެ ދަށުން ކަމަށްވެސް އެމްޑީޕީ އިން ވަނީ ބުނެފައެވެ.
ސޯޝަލް މީޑިއާގައި ލީކުވި ފޮޓޯތަކުގައި ހޯމް މިނިސްޓަރ އަލީ އިހްސާނުގެ ބެއްލެވުމުގެ ދަށުން ފޯމު ފުރަނިކޮށް ހާމަވި ފޮޓޯތަކުގައި ފެންނަ ތަނަކީ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ކަން އެތަން އެނގޭ ތިން މުވައްޒަފަކު ވަނީ ރާއްޖެއެމްވީ އަށް ކަށަވަރު ވެސް ކޮށްދީފައެވެ.
