ރާއްޖޭގެ ތާރީހުގައި ހިންގި އެންމެ ބޮޑު އައިޑެންޓިޓީ ވައްކަން ކުރީ މި ސަރުކާރުން - މީކާއިލް
މީކާއިލް ވަނީ ރައްޔިތުން ނުކުމެ ސަރުކާރަށް ރައްޔިތުންގެ އަޑު އިއްވަން ޖެހޭ ކަމަށް ވިދާޅުވެފަ
"ފުދިއްޖެ، ފުނޑިއްޖެ" ދޮރުން ދޮރަށް ތެރެއިން
ރާއްޖޭގެ ތާރީހުގައި ހިންގި އެންމެ ބޮޑު އައިޑެންޓިޓީ ވައްކަން ކުރީ މި ސަރުކާރުން ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީން ބޭއްވުމަށް ރާވާފައިވާ 'ފުދިއްޖެ، ފުނޑިއްޖެ' އެއްވުމާއި ގުޅިގެން ހިންގާ ދޮރުން ދޮރަށް ހަރަކާތުގެތެރެއިން ރާއްޖެއެމްވީ އަށް ދެއްވި ބަސްދީގަތުމެއްގައެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދާއި ލަފާފުޅުގެ މަތިން ޕީއެންސީއަށް 100،000 މެންބަރުން ހަމަކުރުމަށް އެ ޕާޓީން ކުރިއަށްގެންދިޔަ މެމްބަރޝިޕް ޑްރައިވްގެ ތެރެއިން ހޯމް ސެކްޓަރ ޓީމުން ޑީއެންއާރުގައި ހުރި ޒާތީ މައުލޫމާތު އެއްކޮށް ފޯމު ފުރިކަމަށް ދިޔައީ ތުހުމަތުކުރަމުންނެވެ. އަދި މި ކަމުގައި އެންމެ އިސްކޮށް ހުންނެވީ ހޯމްލޭންޑް މިނިސްޓަރު އަލީ އިހުސާންކަމަށް ތުހުމަތުކުރެވުމުންވެސް ތަކުރާރުކޮށް އެ މިނިސްޓްރީއާއި މިނިސްޓަރުވެސް ގެންދެވީ އެކަން ދޮގުކުރައްވަމުންނެވެ. އެހެންނަމަވެސް ތަކުރާރުކޮށް އިންކާރުކުރައްވަނިކޮށް އެންމެ ފަހުން ޑީއެންއާރުތެރޭގައި ފޯމުފުރުމުގެ މަސައްކަތުގައި ހުންނަވަނިކޮށް ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާންގެ ފޮޓޯތައް ވަނީ ފަހުން ލީކުކޮށްލާފައެވެ.
އެކަމާއި ގުޅިގެން މިނިސްޓަރ އިހުސާންގެ އިތުބާރު ނެތް ކަމަށް ހުށަހަޅަން ވަނީ ނިންމާފައެވެ. އެ މައްސަލަ އަށް އިޝާރާތްކުރައްވާ މީކާއިލް ވިދާޅުވީ މިއީ ސީދާ ރައީސްގެ ބެލުމުގެ ދަށުން ހިނގި ކަމެއް ކަމަށް ޤަބޫލުކުރައްވާ ކަމަށެވެ. މި އަމަލަކީ ދައުލަތުގެ ވަސީލަތްތައް ބޭނުންކޮށްގެން ނާޖާއިޒް މަންފާއެއް ހޯދައި ދިނުމުގެ އަމަލެއްކަމަށް ފާހަގަކުރައްވާ އޭނާ ވަނީ ވަރަށް ބޮޑަށް ސަރުކާރަށް ފާޑު ވިދާޅުވެފައެވެ. މިފަދަ ވައްކަންތަކާއި ދެކޮޅަށް ތެދުވެ ސަރުކާރަށް މެސެޖެއް ދޭން ޖެހޭ ކަމަށް އޭނާ ވިދާޅުވިއެވެ. ސަރުކާރު އޮތީ ވަރަށް ބޮޑަށް ފުދިފައި ކަމަށާއި ސަރުކާރަށް އާއްމުންގެ ނުރުހުން އެންގުމަށް 31ގައި ބާއްވާ އެއްވުމުގައި ބައިވެރިވުން މުހިންމުކަމަށެވެ. މީކާއިލް ވަނީ ރައްޔިތުން ނުކުމެ ސަރުކާރަށް ރައްޔިތުންގެ އަޑު އިއްވަން ޖެހޭ ކަމަށް ވިދާޅުވެފައެވެ.
ގާނޫނު އަސާސީގެ ދިފާއުގައި އެމްޑީޕީން މަގުމައްޗަށް ނުކުންނަން އެ ޕާޓީގެ ގައުމީ މަޖިލީހުން ފާސްކުރީ 9 ޖެނުއަރީ 2025ގައެވެ. އިދިކޮޅު މައި ސިޔާސީ ޕާޓީ، އެމްޑީޕީން މަގުމައްޗަށް ނުކުންނަން ފާސްކުރީ އެ ޕާޓީން ބޭއްވި ގައުމީ މަޖިލީހަށް ހުށަހަޅައި ފާސްކޮށްގެންނެވެ. މި ބައްދަލުވުމުގައި ރިޔާސަތުން ހުށަހެޅީ 31 ޖެނުއަރީގައި "ގާނޫނުއަސާސީގެ ދިފާއުގައި" މަގުމައްޗަށް ނުކުތުމަށެވެ. 31 ޖެނުއަރީގާއި ބާއްވާ އެ އެއްވުން އޮންނާނީ އެ ދުވަހު ހަވީރެވެ.
