އުދިނޭސީއާ އެއްވަރުވެ އެޓަލަންޓާ އިން ފުރުސަތު ނަގާލައިފި

އިޓާލިއަން ލީގުގައި އުދިނޭސީއާ ދެކޮޅަށް ކުޅުނު މެޗުން އެއްވަރުވެ، އެޓަލަންޓާ އިން ފުރުސަތު ނަގާލައިފި އެވެ.

އުދިނޭސީގެ އަމިއްލަ ދަނޑުގައި ކުޅުނު މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. އެ މެޗުން މޮޅުވެ، އެއް ވަނައިގައި އޮތް ނަޕޯލީއާ ޕޮއިންޓުގެ ގޮތުން ހަމަ ކުރުމުގެ ފުރުސަތު އެޓަލަންޓާ އަށް އޮތެވެ. ނަމަވެސް އެ މެޗު އެއްވަރުވެ އެޓަލަންޓާ އަށް ވަނީ އެ ފުރުސަތު ގެއްލިފަ އެވެ.

މެެޗުގައި އެޓަލަންޓާ އިން ވަނީ ލަނޑު ޖަހާނެ ފުރުސަތުތަކެއް ވެސް ތަނަވަސްކޮށްފަ އެވެ. މެޗުގެ ފުރަތަމަ ހާފުގައި އެޓަލަންޓާގެ މާރިއޯ ޕަސަލިޗް ފޮނުވާލި ބޯޅަ، އުދިނޭސީގެ ގޯލު ކީޕަރު ވަނީ މަތަކޮށްފަ އެވެ. އޭގެ ފަހުން އުދިނޭސީ އަށް ލިބުނު ކޯނަރެއްގައި އެ ޓީމުގެ ޖަގާ ބިޖޯލް ބޮލުން ފޮނުވާލި ބޯޅަ މަޑު ޖެހުނީ އެޓަލަންޓާގެ ގޯލު ކީޕަރުގެ ގައިގައި ޖެހިފަ އެވެ.

އޭގެ ފަހުން މެޗުގައި އުދިނޭސީގެ އެލެކްސިސް ސަންޗޭޒް ބޮލުން ފޮނުވާލި ބޯޅަ ގޯލުގެ އަރިމަތީ ދަނޑީގައި ޖެހިފައި ލިބުމުން، އަނެއްކާ ވެސް އޭނާ ފޮނުވާލިއިރު، އެ ބޯޅަ އަމާޒުވީ ހުރަސް ދަނޑިއާ އެވެ. ހުރަސް ދަނޑީގައި ޖެހިފައި ރީބައުންސަށް އައި ބޯޅަ ސަންޑީ ލޮވްރިޗް ފޮނުވާލި ނަމަވެސް، އެޓަލަންޓާގެ ގޯލު ކީޕަރު ވަނީ އެ ބޯޅަ ހުއްޓުވައިފަ އެވެ.

މެޗު އެއްވަރުވެ ލިބުނު އެއް ޕޮއިންޓާ އެކު އެޓަލަންޓާ އޮތީ ދެ ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 19 މެޗުން 42 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އެއް ވަަނައިގައި ނަޕޯލީ އަށް ލިބެނީ 44 ޕޮއިންޓެވެ.