ސިފައިންގެ ކުލަބުން ޤައުމީ ވޮލީ ބޯޅަ މުބާރާތް ކާމިޔާބު ކޮށްފި

ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބޭއްވި، ޤައުމީ ވޮލީ ބޯޅަ މުބާރާތް ދިވެހި ސިފައިންގެ ކުލަބުން ކާމިޔާބު ކޮށްފި އެވެ.

ހުކުރު ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު ފައިނަލް މެޗު ސިފައިންގެ ކުލަބުން ކާމިޔާބު ކުރީ ސީދާ ތިން ސެޓު އެއް ސެޓުން އެޗްޑީސީ ކުލަބު ބަލިކޮށްގެންނެވެ. މުބާރާތުގެ ލީގު ބުރުގައި މި ދެ ޓީމު ބައްދަލު ކުރި މެޗު ސިފައިންގެ ކުލަބުން ކާމިޔާބު ކުރީ ފަސް ސެޓު ކުޅެގެންނެވެ.

މެޗުގެ ފުރަތަމަ ސެޓު އެޗްޑީސީން ކާމިޔާބު ކުރީ 25-17 އިންނެވެ. ނަމަވެސް ސިފައިންގެ ކުލަބުން ވަނީ 21-25 އިން ދެ ވަނަ ސެޓު ކާމިޔާބު ކޮށްފަ އެވެ. ޖެހިގެން ކުޅުނު ތިން ވަނަ ސެޓު ސިފައިންގެ ކުލަބުން ކާމިޔާބު ކުރީ 16-25 އިންނެވެ. ހަތަރު ވަނަ ސެޓުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނުއިރު، ސިފައިންގެ ކުލަބުން މި ސެޓު ކާމިޔާބު ކުރީ 23-25 އިންނެވެ.

އެންމެ ފަހުން އޮތް ޤައުމީ ވޮލީ ބޯޅަ ލީގު އެޗްޑީސީން ކާމިޔާބު ކުރީ ސިފައިންގެ މައްޗަށް ފަހު މެޗުގައި ކުރި ހޯދައިގެންނެވެ. އޭގެ ކުރިން މިދިޔަ އަހަރު އޮތް ވީއޭއެމް އެސޯސިއޭޝަން ކަޕް ވެސް އެޗްޑީސީން ކާމިޔާބު ކުރީ ސިފައިން ބަލިކޮށްގެންނެވެ.