އިސްރާއީލުގެ ވަޒީރުން ސޫރިއާ ބައިބައިކުރުމުގެ ސިއްރު ރޭވުމަކަށް މަޝްވަރާ ކޮށްފި: ރިޕޯޓު

ބައްޝާރު އަލް-އަސަދުގެ ސަރުކާރު ވެއްޓުމަށްފަހު ސޫރިއާ ބައިބައިކުރުމަށް އިސްރާއީލުގެ ވަޒީރުން ސިއްރު ރޭވުމަކާ މެދު މަޝްވަރާކުރުމަށް ބައްދަލުވުމެއް ބާއްވައިފި ކަމަށް އިސްރާއީލުގެ މީޑިއާއިން ބުނެފިއެވެ.

އިސްރާއީލް ހަޔޯމް ނަމަކަށް ކިޔާ ނޫހުން ރިޕޯޓުކޮށްފައިވަނީ، އިސްރާއީލުގެ ދިފާއީ ވަޒީރު އިސްރާއީލް ކަޓްޒް އަންގާރަ ދުވަހު ވަޒީރުންގެ ކުޑަ ޓީމެއްގެ ބައްދަލުވުމެއްގެ ރިޔާސަތު ބަލަހައްޓާފައިވާ ކަމަށެވެ. އެ ބައްދަލުވުމުގައި ސޫރިއާ ސަރަހައްދީ ނުވަތަ ކެންޓަން ތަކަކަށް ބައިބައިކުރުމަށް އިސްރާއީލުން އެކުލަވާލާފައިވާ ރޭވުމަކާ މެދު މަޝްވަރާކޮށްފައިވާ ކަމަށް ބުނެފައިވެއެވެ.

މި ރިޕޯޓުގައި މި ރޭވުން އަމާޒު ކޮށްފައިވަނީ ސޫރިއާގެ މައިނޯރިޓީ ގްރޫޕްތައް ކަމަށްވާ ޑްރޫޒް އަދި ކުރުދީންގެ އާބާދީ ހިމެނޭ ގޮތަށް، ސޫރިއާގެ ހުރިހާ ޖަމާއަތްތަކެއްގެ ސަލާމަތާއި ހައްޤުތައް ރައްކާތެރިކޮށްދިނުން ބޭރުފުށުން ދައްކައިގެން ކަމަށް ވެއެވެ.

މި ބައްދަލުވުމުގައި އަރަބި ޤައުމުތަކުގެ ކަންކަމުގައި ތުރުކީގެ ބައިވެރިވުމާއި، ސޫރިއާގެ ޑި ފެކްޓޯ ވެރިޔާ އަބޫ މުޙައްމަދު އަލް-ޖޫލާނީގެ ނިޔަތާ މެދު ކަންބޮޑުވުން ފާޅުކުރެވުނު ކަމަށްވެސް ރިޕޯޓުކޮށްފައިވެއެވެ. އަލް-ޖޫލާނީ ވަނީ ދިމިޝްގުން "ތެލް އަވީވާއެކު ހަނގުރާމައެއްގައި ބައިވެރިނުވާނެ" ކަމަށް ބުނެފައެވެ.

މި ބައްދަލުވުން ބޭއްވުނީ ބެންޔަމިން ނެތަންޔާހޫއާއެކު މި ކަމާ މަޝްވަރާ ކުރުމަށް ރޭވިފައިވާ ބައްދަލުވުމުގެ ކުރިން ކަމަށް ވެސް ބުނެފައިވެއެވެ.

2011 ގައި ސޫރިއާ ގައި ފެށުނު އަސަދާ ދެކޮޅު ހަރަކާތައް ތާއީދުކުރި ފަރާތެއްގެ ގޮތުގައި އޮތް އިސްރާއީލުގެ މި ރޭވުން ވުޖޫދު ކުރީ އަސަދުގެ ސަރުކާރު ވެއްޓުމުގެ ކުރިން ކަމަށް ރިޕޯޓުގައި ބުނެފައިވެއެވެ.

އަސަދުގެ ވެރިކަން ވެއްޓުމުގެ ކުރިން، އިސްރާއީލުން ރާވާފައިވަނީ ސޫރިއާ ތިން ބްލޮކަކަށް ބަހާލުމަށް ކަމަށާއި، ސޫރިއާގެ އުތުރު-އިރުމަތީގައި ވާ ކުރުދީންނާއި ދެކުނުގައިވާ ޑްރޫޒުންނާއެކު އަސްކަރީ އަދި ސްޓްރެޓެޖިކް ގުޅުންތައް ޤާއިމުކޮށް، އަސަދު ގެ ބާރު ހަމައެކަނި ދިމިޝްގުގައި އޮންނަ ގޮތައް ހެދުމަށް އެ ރޭވުމުގައި ވެއެވެ.

އިސްރާއީލުގެ ޚާރިޖީ ވަޒީރު ގިޑިއަން ސާރު ފާއިތުވި ނޮވެމްބަރު މަހު ދެއްކެވި ވާހަކައެއްގައި އަންގާރަ ދުވަހު މަޝްވަރާކުރެވުނު ރޭވުމާ އެއްގޮތް ކަމަށް ފެންނަ މޭރުމަކުން ވަނީ އަލިއަޅުއްވާލައްވާފައެވެ.

ސާރު ވިދާޅުވީ އިސްރާއީލުން ސޫރިއާ އަދި ލުބުނާނުގައި ތިބި ކުރުދީންނާއި ޑްރޫޒުންނާ ގުޅުން ބަދަހިކުރަން ޖެހޭ ކަމަށެވެ. "އަޅުގަނޑުމެން މި ސަރަހައްދުގައި މައިނޯރިޓީންނަށް ވާނެކަން އެނގި، އެހެން މައިނޯރިޓީ މީހުންނާއެކު ޤުދުރަތީ އިއްތިހާދުތައް އުފެއްދިދާނެކަން އަޅުގަނޑުމެން ދެނެގަންނަން ޖެހޭނެ" ކަމަށް އޭނާ ވިދާޅުވިއެވެ.

ހަޔަތު ތަހްރީރު އަލް-ޝާމް (އެޗްޓީއެސް) އިސްކޮށް ހަރަކާތްތެރިވެ ޑިސެމްބަރު 8 ވަނަ ދުވަހު ދިމިޝްގަށް އަރާ، އަސަދުގެ ވެރިކަން ނިމުމަކަށް އައިސްފައިވާ ކަމަށް އިއުލާނުކުރިއެވެ.

އަސަދުގެ ސަރުކާރު ވެއްޓުމާ ގުޅިގެން، އިސްރާއީލުން ވަނީ ގޯލާން އުސްބިމުން ސޫރިއާ އަށް އަރައިގަނެފައެވެ. ގޯލަން އުސްބިމަކީ 1967 އިން ފެށިގެން އިސްރާއީލުން ހިފަހައްޓާފައިވާ ސޫރިއާގެ ސަރަހައްދެކެވެ. އިސްރާއީލުގެ ސިފައިން ވަނީ ސޫރިއާގެ ހުޅަނގު ދެކުނުގައިވާ އދ. އިން ބަލަހައްޓާ ބަފަރ ޒޯނަކަށް ވަދެ، ސޫރިއާގެ ފަރާތުން އޮތް މައުންޓް ހަރމޮން އާއި އަދި ސޫރިއާގެ އެތައްސަރަހައްދުތަކެއް ހިފާފައެވެ.

އިސްރާއީލުގެ ސިފައިން ވަނީ ފާއިތުވި ހަފުތާތަކުގައި ސޫރިއާގެ އަސްކަރީ މަރުކަޒުތަކަށް ވެސް ބޮޑެތި ވައިގެ ހަމަލާތައް ދީފައެވެ.