ޗައިނާގެ ޚާރިޖީ ވަޒީރު ވާންގް ޔީ، ރައީސް ޑޮކްޓަރ މުޢިއްޒު އާ ބައްދަލު ކުރައްވައިފި
10 ޖެނުއަރީ 2025 | ހުކުރު 18:05މަސްވެރިކަމާއި ދަނޑުވެރިކަމުގެ ދާއިރާ އިން ޗައިނާގެ އިތުރު އެހީތެރިކަމަށް މުއިއްޒު އެދިވަޑައިގަތް
2025 ޖެނުއަރީ 10 - ޗައިނާގެ ޚާރިޖީ ވަޒީރު ރައީސް މުއިއްޒު އާ ބައްދަލު ކުރެއްވުން
ޗައިނާގެ ޚާރިޖީ ވަޒީރު ވާންގް ޔީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އާ ބައްދަލު ކުރައްވައިފިއެވެ.
މި ބައްދަލުވުން އޮތީ ހުކުރު ދުވަހުގެ ހަވީރު ރައީސުލްޖުމްހޫރިއްޔާގެ އޮފީހުގައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެޤައުމުގެ މެދުގައި އޮތް ގާތްގުޅުން ފާހަގަކުރައްވައި ޗައިނާއިން ދިވެހިރާއްޖެއަށް ދެއްވަމުން ގެންދަވާ އެހީތެރިކަމާ އެއްބާރުލުން ޝުކުރުވެރިކަމާއެކު ފާހަގަ ކުރައްވާ ކަމަށް ވިދާޅުވެފައެވެ.
ރައީސް އޮފީހުން މި ބައްދަލުވުމާ ބެހޭ ގޮތުން ނެރުނު ބަޔާނެއްގައި ބުނެފައިވަނީ މިބައްދަލުވުމުގައި، ޗައިނާގެ އެހީގައި ރާއްޖޭގައި ހިނގަމުންދާ މަޝްރޫޢުތަކާއި ދެޤައުމުގެ މެދުގައި އެއްބަސްވެވިފައިވާ ތަރައްޤީގެ މަޝްރޫޢުތައް އަވަސްކުރުމުގެ މުހިންމުކަމުގެ މައްޗަށް ރައީސް މުއިއްޒު އަލިއަޅުއްވާލެއްވި ކަމަށެވެ. އަދި، ގެދޮރުވެރިކަމާއި މަގުހެދުމުގެ މަޝްރޫޢުތަކަކީ ދިވެހި ރައްޔިތުންނަށް އެންމެ މުހިންމު މަޝްރޫޢުތައްކަމަށާއި، އެ މަޝްރޫޢުތަކަށް އިސްކަންދިނުމުގެ މުހިންމުކަމުގެ މައްޗަށް ރައީސުލްޖުމްހޫރިއްޔާގެ ވާހަކަފުޅުގައި އަލިއަޅުއްވާލެއްވި ކަމަށް ވެސް ބުނެފައިވެއެވެ. ސަރުކާރުގެ އަމާޒަކީ މަސްވެރިކަމާއި ދަނޑުވެރިކަމުގެ ސިނާޢަތް އިތުރަށް ކުރިއަރުވައި އިޤްތިޞާދު ސިންދަފާތު ކުރުން ކަމަށާއި، އެހެންކަމުން މިދާއިރާތަކުން ޗައިނާގެ އިތުރު އެހީތެރިކަމަށް ރައީސުލްޖުމްހޫރިއްޔާ އެދިވަޑައިގެންނެވި ކަމަށް ރައީސް އޮފީހުން ބުނެފައިވެއެވެ.
ޚާރިޖީ ވަޒީރު ވާންގް ޔީގެ ވާހަކަފުޅުގައި ރައީސުލްޖުމްހޫރިއްޔާ އަކީ ޗައިނާގެ ގާތް ރަހުމަތްތެރިއެއް ކަމަށާއި ޗައިނާއަށް އިތުބާރުކުރެވޭ ބައިވެރިއެއް ކަމުގައި ވިދާޅުވި ކަމަށް ރައީސް އޮފީހުން ބުނެއެވެ. ވަޒީރު ވާންގް ޔީ ރާއްޖޭގެ ތަރައްޤީއަށް ރައީސް މުއިއްޒު ދެއްވާ އަހަންމިއްޔަތުކަމަށް ތަޢުރީފްކުރެއްވި ކަމަށާއި، ރާއްޖޭގެ ދެމެހެއްޓެނިވި ތަރައްޤީއަށް ޗައިނާގެ އެހީތެރިކަން ލިބޭނެކަމުގެ ޔަޤީންކަން ދެއްވި ކަމަށް ވެސް ރައީސް އޮފީހުން ބުނެއެވެ.
މީގެއިތުރުން ޚާރިޖީ ވަޒީރު ވަނީ ޗައިނާގެ ކުންފުނިތަކުން ރާއްޖޭގައި ހިންގަމުންދާ މަޝްރޫޢުތައް އަވަސްކުރުމަށް ބާރުއަޅުއްވާނޭކަމަށްވެސް ވިދާޅުވެފައެވެ.
ރާއްޖެއިން "ވަން ޗައިނާ" ޕޮލިސީއަށް ދެމުންދާ އިސްކަން ފާހަގަކުރައްވަމުން، ރާއްޖެ- ޗައިނާ ގުޅުމަކީ ޤައުމުތަކުގެ ކުޑަ ބޮޑު މިނަށް ބެލުމެއްނެތި ގުޅިގެން ތަރައްޤީއާއި ފުދުންތެރިކަން ހޯދޭނެކަމުގެ އަލިގަދަ ހެއްކެއް ކަމުގައިވެސް ޚާރިޖީ ވަޒީރު ވިދާޅުވި ކަމަށް ރައީސް އޮފީހުން ހާމަ ކޮށްފައިވެއެވެ.
މި ބައްދަލުކުރެއްވުން ނިންމަވާލައްވަމުން ދެ ބޭފުޅުންވެސް ވަނީ ރައީސް މުޢިއްޒު ޗައިނާއަށް ކުރެއްވި ރަސްމީ ދަތުރުފުޅުގައި އެއްބަސްވެވުނު "ޗައިނާ މޯލްޑިވަސް ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނަރޝިޕް" އެއްބަސްވުން ތަންފީޒުކުރުމަށާއި މަލްޓިލޭޓަރަލް މަންސަތަކުގައި ދެޤައުމުގެ އެއްބާރުލުން އިތުރަށް ހަރުދަނާކުރުމަށް އެއްބަސްވެވަޑައިގެންފައި ކަމަށް ރައީސް އޮފީހުގެ ބަޔާނުގައި ވެއެވެ.
