ހޯނޑެއްދޫ ކައުންސިލުން ބައްދަލުކުރަން އެދުމުން ވެސް ރައީސް އަޅާނުލައްވާ ފުރާވަޑައިގެންފި
ހޯނޑެއްދޫ ކައުންސިލުން ބޭނުންވީ ކަނޑެވާރެހާ ޓޫރިޒަމަށް ހުޅުވާލުމަށް ހުރި ދަތިތަކާއި ގުޅޭ ގޮތުން ރައީސް އާ މަޝްވަރާ ކޮށްލަން
ގދ. ކަނޑެވާރެހާ. މިރަށް ވަށައިގެން ގިނަ އަދަދެއްގެ ފަޅުރަށް އޮވޭ
ގދ. ހޯނޑެއްދޫ ކައުންސިލުން ތަކުރާރުކޮށް ބައްދަލުކުރަން އެދުމުން ވެސް ބައްދަލުނުކުރައްވާ، ރައީސް ޑރ. މުޙައްމަދު މުއިއްޒު އެ ރަށަށްވަޑައިގަތުމަށް ފަހު ފުރާވަޑައިގެންފިއެވެ.
ހޯނޑެއްދޫ ކައުންސިލުން، ރައީސުލްޖުމްހޫރިއްޔާ ޑރ. މުޙްމަދު މުއިއްޒުއާއި ބައްދަލުކުރަން އެދިފައިވަނީ އެ ރަށާއި ދާދި ގާތުގައި އޮންނަ ފަޅު ރަށެއް ކަމުގައިވާ ކަނޑެވާރެހާ ނަކަމަށް ކިޔުނު ރަށެއް ޓޫރިޒަމަށް ހުޅުވާލުމުގައި ހުރި ދަތިތަކާއި ގުޅޭގޮތުހް މަޝްވަރާކުރެއްވުމަށެވެ.
ހޯނޑެއްދޫ ކައުންސިލުން ބުނީ އެ އިދާރާއިން ކަނޑެވާރެހާ ޓޫރިޒަމަށް ހުޅުވާލުމަށް ހުރި ދަތިތަކާއި ގުޅޭގޮތުން މަޝްވަރާތައް ކުރުމަށް ރައީސުލްޖުމްހޫރިއްޔާގެ އިތުރުން، ކަމާ ގުޅުންހުރި ވުޒާރާތަކަށް އެތަކެއް ފަހަރު އެކިގޮތްގޮތަށް އެދުނުކަމަށެވެ. އެގޮތުން އެތަކެއް ފަހަރުމަތިން ސިޓީ ފޮނުވާ، ފޯނުން ގުޅާ އާދޭސްކުރެވިފައިވާނޭ ކަމަށް ހޯޑެއްދޫ ކައުންސިލުން ބުނެއެވެ.
މިކަމުގެ ކަންބޮޑުވުންތަކާއި ގުޅިގެން ހޯނޑެއްދޫ ކައުންސިލުގެ ނައިބުރައީސް އަޙުމަދު ޝިހާމް، ވަނީ ސޯޝަލް މީޑިއާގައި ޕޯސްޓެއްވެސް ކުރައްވާފައެވެ.
އެ ޕޯސްޓުގައި އޭނާ ވިދާޅުވީ ކަނޑެވާރެހާ ޓޫރިޒަމަށް ހުޅުވާލުމަށް ހުރި ހުރަސްތައް ނައްތާލުމާއި ހޮރައިޒަން ފިޝަރީސްއަށް ހޯޑެއްދޫއިން ދޫކޮށްފައިވާ ބިމުގެ ކުލި ރިވައިސްް ނުކުރެވި އޮތްއޮތުން ނިމުމަކަށް ގެނައުމަށް ކައުންސިލުން އެތަކެއް މަސައްކަތްތަކެއް ކޮށް ސަރުކާރުގެ ކަމާއި ގުޅުންހުރި ވުޒާރާތަކަށް އެތަކެއް ފަހަރު ސިޓީ ފޮނުވިފައިވާކަމަށެވެ. ނަމަވެސް އެއިން އެއްވެސް ސީޓީއަކަށް ޖަވާބު ނުލިބި އެތަކެއް ދުވަހެއްވެ، ރައީސް ޑރ، މުހައްމަދު މުއިއްޒަށާއި ކަމާއި ގުޅުންހުރި ވުޒާރާތަކާއި ބައްދަލުކުުމަށް ވެސް ކައުންސިލުން އެތަކެއް ފަހަރު އެދުނު ކަމަށެވެ. ނަމަވެސް މިއަދާ ހަމައަށް ވެސް ބައްދަލު ކޮށްފައި ނުވާކަމަށް ޕޯސްޓުގައި ބުނެފައިވެއެވެ.
ޝިހާމް ޕޯސްޓުގައި އިތުރަށް ވިދާޅުވެފައިވަނީ އެންމެ ފަހުން ރައީސް ހޯނޑެއްދޫ އަށް ވަޑައިގަންނަށް ހަމަޖެހިފައި އޮތް ދަތުރުގައި ކައުންސިލާއި ބައްދަލުކުރަން ހަމަޖެހިފައި ނެތުމަކީ ވެސް ވަރަށް ކަންބޮޑުވާކަމެއް ކަމަށެވެ.
މީގެ އިތުރުން ރައްޔިތުންނާއި ގުޅުންހުރި މިފަދަ ބޮޑެތި ކަންކަން ހުރެމެ، ރައްޔިތުންގެ ކަންބޮޑުވުންތަކަށް ހައްލުނުލިބޭހާ ހިނދަކު ރައްޔިތުން އިންތިޚާބުކޮށްފައި ތިބި ކައުންސިލްގެ މެމްބަރުން ރައިސުލްޖުމްހޫރިއަޔާގެ އިސްތިޤްބާލަށް މަރްޙަބާ ދަންނަވަން ދާން ނުޖެހޭނޭ ކަމަށް ވެސް ޝިހާމްގެ ޕޯސްޓުގައި ވެއެވެ.
މީގެ އިތުރުން މި މައްސަލައާއި ގުޅިގެން އިތުރު މައުލޫމާތު ހޯދާލުމަށް ގުޅާލުމުން "ރާއްޖެ ޓީވީ" އަށް މައުލޫމާތު ދެމުން ހޯނޑެއްދޫ ކައުންސިލްގެ ނައިބު ރައީސް އަޙުމަދު ޝިހާމް ވިދާޅުވީ މި މައްސަލައަށް އަދިވެސް ހައްލެއް ލިބޭނެ ކަހަލަ އެއްވެސް އަލިމަގެއް ނުފެންނަކަމަށާއި މި މައްސަލައާ ގުޅޭގޮތުން މަޝްވަރާކުރުމަށް އެންމެ ފަހުން އެ ރަށްރަށް ރައީސް ވަޑައިގެންނެވި އިރުވެސް ރައީސާ ބައްދަލުކުރުމަށް ކައުންސިލުން އެދުނު ކަމަށާއި ނަމަވެސް އެކަން އެގޮތަށް ވާން ނެތްކަމަށް ވިދާޅުވިކަމަށް އޭނާ ވިދާޅުވިއެވެ.
ޝިހާމް ވިދާޅުވީ ރައީސް ހޯނޑެއްދޫއަށް ވަޑައިގެންނެވި މި ދަތުރުފުޅުގައި އެ ރަށުގެ ކައުންސިލާ އެކު ބައްދަލުކުރުމަށް ދެކޮޅު ހެއްދެވީ އެއީ ރައީސްގެ މި ދަތުރުފުޅުތަކަކީ ރަށްރަށުގެ ކައުންސިލްތަކާއި އެކު ބައްދަލުވުންތައް ބާއްވަން ކުރައްވާ ތަދުރުފުޅުތަކަކަށް ނުވާތީ ކަމަށް ރައީސް އޮފީހުން ބުނެފައިވާ ކަމަށެވެ.
ޝިހާމް ވިދާޅުވީ ނިމިދިޔަ ސަރުކާރުގައިވެސް އެކަމަށް އެދުނު ކަމަށާއި ނަމަވެސް އޭރު އެކަން ވާގޮތް ނުވުމުން މިހާރު މިއޮތް ސަރުކާރުގައި އެކަން ވާނޭ ކަމަށް ވަރަށް ބޮޑަށް އުންމީދުކުރެވުނު ކަމަށެވެ. ސަބަބަކީ ނިމިދިޔަ ރިޔާސީ އިންތިޚާބުގެ ދުވަސްވަރު މިހާރުގެ ރައީސް މުއިއްޒު ހޯނޑެއްދޫއަށް ވަޑައިގެން ކައުންސިލާއި ބައްދަލުކުރައްވާ ދެއްކެވި ވާހަކަފުޅުގައި އެކަމަށް ހައްލެއް ލިބޭނެ ކަމުގެ އިޝާރާތެއް ކުރައްވާފައި އޮތުމުން ކަމަށް އޭނާ ވިދާޅުވިއެވެ. އެގޮތުން އެކަމަށް "އެޓެންޑް" ވާނެ ކަމުގެ ޔަގީންކަންވެސް ރައީސް ދެއްވި ކަމަށް ޝިހާމް ވިދާޅުވިއެވެ. ނަމަވެސް މި ސަރުކާރުންވެސް އެކަމަށް އެއްވެސް އިޖާބައެއް އަދި މިހާތަނަށް ދީފައިނުވާކަން އޭނާ ފާހަގަކުރެއްވިއެވެ.
ގާތްގަނޑަކަށް 4.6 ހެކްޓަރުގެ ކަނޑެވާރެހާ އަކީ ހޯނޑެއްދޫގެ އިހުތިސާސުގެ ތެރޭގައި އޮންނަ ކުޑަ ފަޅު ރަށެވެ. ކަނޑެވާރެހާ އަކީ ކަނޑުގެ ދިރުންތަކުން ވެސް މުއްސަނދި އަދި ރީތި ގޮނޑުދޮށެއް ވެސް އޮންނަ ރަށެކެވެ.
އެ ރަށުގައި އިންޓަގްރޭޓެޑް ޓޫރިސްޓު ރިސޯޓެއް ތަރައްގީކޮށް ހިންގުމަށް ޝައުގުވެރިވާ ފަރާތްތަކަށް ބިޑު ހުށަހެޅުމުގެ ފުރުސަތު ހުޅުވާލާފައިވަނީ މި އަހަރުގެ ސެޕްޓެމްބަރުގެ 25 ގައެވެ. ހޯނޑެއްދޫ ކައުންސިލުން ބަލަހައްޓާ އެ ރަށުގައި އިންޓަގްރޭޓެޑް ޓޫރިޒަމަށް ހާއްސަ ރިސޯޓެއް ތަރައްގީ ކުރަން ނިންމާ އެކަމާ ގުޅޭ ކޮންސެޕްޓް ވެސް އެ ކައުންސިލުން އޭރު ވަނީ އާންމު ވެސް ކޮށްފަ އެވެ.
ކަނޑެވާރެހާ އަކީ ކާޑެއްދޫ ޑޮމެސްތިކް އެއާޕޯޓުން ސްޕީޑު ލޯންޗުގައި 5 މިނެޓެއްހާ އިރުން ދެވޭ ސަރަހައްދެއްގައި އޮންނަ ރަށެކެވެ.
