ފުރަތަމަ ލެގުގައި އާސެނަލް ބަލިކޮށް، ނިއުކާސަލް ފައިނަލާ ގާތަށް

ކަރަބޯ ކަޕްގެ ސެމީ ފައިނަލްގެ ފުރަތަމަ ލެގުގައި އާސެނަލާ ދެކޮޅަށް ކުޅުނު މެޗުން މޮޅުވެ، ނިއުކާސަލް ޔުނައިޓެޑުން މުބާރާތުގެ ފައިނަލާ ގާތަށް ޖެހިލައިފި އެވެ.

އާސެނަލްގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު ނިއުކާސަލް އިން ކާމިޔާބު ކުރީ 2-0 އިންނެވެ. މެޗުގައި ނިއުކާސަލް އިން ފުރަތަމަ ހާފުގައި ލަނޑެއް ޖެހިއިރު، ދެ ވަނަ ހާފުގައި ވަނީ ދެ ވަނަ ލަނޑެއް ވެސް ޖަހައިފަ އެވެ.

މެޗުގެ ފުރަތަމަ ހާފުގެ 38 ވަނަ މިނެޓުގައި ނިއުކާސަލަށް ލީޑު ނަގައިދިނީ އެލެކްސެންޑާ އިސާކް އެވެ. އެ ލަނޑު އޭނާ ޖެހީ ޖަކޫބް މުރްފީ ތަނަވަސްކޮށްދިން ފުރުސަތެއްގަ އެވެ. މެޗުގެ ނަތީޖާ ހަމަހަމަ ކުރުމަށް އާސެނަލް އިން މަސައްކަތް ކުރަމުން ދަނިކޮށް، ނިއުކާސަލް އިން ވަނީ ދެ ވަނަ ލަނޑެއް ވެސް ޖަހައިފަ އެވެ. މެޗުގެ ދެ ވަނަ ހާފު ފަށައިގެން ހަ ވަނަ މިނެޓުގައި ނިއުކާސަލަށް އެ ލަނޑު ޖަހައިދިނީ އެންތަނީ ގޯޑަން އެވެ.

ނިއުކާސަލްގެ އަމިއްލަ ދަނޑުގައި ކުޅޭ ދެ ވަނަ ލެގުގެ ކުޅުން އޮންނާނީ އަންނަ ފެބްރުވަރީ މަހުގެ ފަސް ވަނަ ދުވަހުގެ ރޭ އެވެ. އާސެނަލަށް މުބާރާތުގެ ފައިނަލްގެ ޖާގަ ލިބެން އޮތީ އެ މެޗުގައި ތިން ލަނޑުގެ ތަފާތުން ނިއުކާސަލް ބަލިކޮށްގެންނެވެ. މެޗު އެއްވަރުކޮށްލައިގެން ވެސް ނިއުކާސަލް އަށް ފައިނަލްގެ ޖާގަ ހޯދޭނެ އެވެ.