ރައްޔިތުން ނިކަމެތި ހާލުގައި އުޅެން ޖެހެނީ ގައުމަށް ލިބޭ ފައިސާ ނަހަމަގޮތުގައި ބޭނުންކުރާތީ: މޭޔަރ އާޒިމް
7 ޖެނުއަރީ 2025 | އަންގާރަ 10:30ޤާނޫނުތައް ބައްޓަން ވެފައި ހުރީ ސިޓީ ކައުސިލްގެ ހުއްދައާއި އެކު ނޫނީ މާލޭގެ މަގުތައް ހެދުމުގެ މައްސަކަތްތައް ނުކުރެވޭ ގޮތަށް ކަމަށް އާޒިމް ވިދާޅުވި
މާލެ ސިޓީ މޭޔަރ އާދަމް އާޒިމް
ދިވެހިރާއްޖެ އަކީ ފައިސާ ލިބޭ، މުއްސަނދި ގައުމެއް ކަމަށާއި ގައުމުގެ ރައްޔިތުން ނިކަމެތިވަނީ ގައުމަށް ލިބޭ ފައިސާ ރަނގަޅުގޮތުގައި ބޭނުން ނުކުރާތީ ކަމަށް މާލޭ ސިޓީ ކައުންސިލްގެ މޭޔަރަ އާދަމް އާޒިމް ވިދާޅުވެއްޖެއެވެ.
މާލޭގައި ފެންބޮޑުވުމާއި، އަދި މާލޭގެ މިހާރުގެ ހާލަތާއި ގުޅިގެން ރާއްޖެ ޓީވީގެ "ފަލަސުރުޚީ" ޕްރޮގްރާމުގައި ވާހަދައްކަވަމުން އާދަމް އާޒިމް ވިދާޅުވީ އާލެއަކީ ވަކިބައެއްގެ ތަނެއް ނޫންކަމަށާއި، މާލޭގައި އުފަލާއި ހިތްހަމަ ޖެހުމުގައި އުޅެން ޖެހެނީ ވަކިބައެއް ނޫންކަމަށެވެ. އަދި އެ ފުރުސަތު ރާއްޖޭގެ ހަމަ ކޮންމެ ރައްޔިތަކަށް ވެސް އޮންނަން ޖެހޭނޭ ކަމަށް އާޒިމް ވިދާޅުވިއެވެ. އެހެން ކަމުން މާލޭގައި ދިރިއުޅޭ ހުރިހާ ރައްޔިތުންނަށް ވެސް އުފަލާއި ހިތްހަމަ ޖެހުމުގައި އުޅެވޭފަަދަ އުފާވެރި ދިރިއުޅުމެއް ފަހި ކޮށްދިނުމަކީ ކުރަން ޖެހޭނޭ ކަމެއް ކަމަށް ވެސް އާޒިމް ވިދާޅުވިއެވެ.
އާޒިމް ވިދާޅުވީ ރާއްޖެ އަކީ ފައިސާ ލިބޭ މުއްސަނދި ގައުމެއް ކަމަށާއި ރާއްޖޭގެ ރައްޔިތުން ނިކަމެތި ހާލުގައި އުޅެން ޖެހިފައި މިވަނީ ގައުމަށް ލިބޭ ފައިސާ ރަނގަޅު ގޮތުގައި ބޭނުން ނުކުރާތީ ކަމަށެވެ. އަދި ގައުމުގެ ރާއްޔިތުން މިހާރު އުޅެމުން މިދަނީ ދިރުއުޅުމެއް ނޫން ކަމަށާއި މިއީ މާލޭގައި ގަނަތެޅުން ކަމަށް އާޒިމް ސިފަކުރެއްވިއެވެ.
އާޒިމް ވިދާޅުވީ މިހާރުގެ މާލޭގެ ހާލަތަށް ބަލާއިރު، މާލޭގެ މަގުތަކުގެ ހާލަތު ރަނގަޅު ކުރުމަށްކަމަށް ބުނެ، ތާކުންތާކު ނުޖެހޭ ތަފާތު ޕްރޮޖެކްޓް ތައް ހިންގައި މުޅި މާލެ މިއޮތީ ޚަރާބުކޮށްލާފައި ކަމަށާއި ނަމަވެސް އެބޭފުޅާ ހުންނަތަނެއްގައި މިފަދަ ގޮތަކަށް ފައިސާ ޚަރަދުކުރަނީ އެންމެ ރަނގަޅަށްތޯ ބަލައި ޔަގީން ކުރާނެ ކަމަށެވެ. އަދި މާލެ އަކީ އަޅުގަނޑުމެންގެ ދަރިން އަރާމުގައި އުޅޭނޭ ގޮތަށް ރަނގަޅަށް ތަރުތީބު ވެފައި އޮތް ތަނެއްތޯ ބަލާފައި ނޫނީ އަންނަ އެއްވެސް އެއްޗެއްގައި (ޕްރޮޖެކްޓް) އެއްގައި ސޮއިނުކުރާނެ ކަމަށް ވެސް އާޒިމް ވިދާޅުވިއެވެ.
މާލޭގެ މަގުތަކުގެ މިހާރުގެ ހާލަތާއި މެދު ކަންބޮޑުވުން ފާޅުކުރައްވާ އިތުރަށް އާޒިމް ވިދާޅުވީ ޤާނޫނުތައް ބައްޓަން ވެފައި ހުރީ ސިޓީ ކައުސިލްގެ ހުއްދައާއި އެކު ނޫނީ މާލޭގެ މަގުތައް ހެދުމުގެ މައްސަކަތްތައް ނުކުރެވޭ ގޮތަށް ކަމަށާއި އެގޮތުން މާލޭ ސިޓީ ކައުންސިލުން ބޭނުންވާ ގޮތަށް ޗައިނާ ކުންފުނިން ހިންގާ ޕްރޮޖެކްޓް ކުރިއަށް ގޮސްފި ނަމަ މަގުތައް ނިމެނޭއިރުގައި ހުންނާނީ ކަންކަން ހައްލުވެފައިކަމަށެވެ. އަދި ސިޓީ ކައުންސިލުން ބޭނުން ނުވާ ގޮތަކަށް މަގުތައް ހެދުމަށް އެޕްރޫވަލް ނުދޭނޭ ކަމަށް ވެސް އޭނާ ވިދާޅުވިއެވެ.
އާޒިމް ވިދާޅުވީ މާލޭގެ މަގުތައް ރަނގަޅު ފެންވަރަކަށް ހަދަން މަސައްކަތް ކުރަނީ އަޅުގަނޑުމްނެންނާއި އަޅުގަނޑުމެންގެ ދަރިންގެ މުސްތަގުބަލަށް ޓަަކައި ކަމަށް ވާތީ ކަމަށެވެ. އަދި މާލޭގެ މަގުތައް ހަދަން ޗައިނާ ސަރުކާރުން ރާއްޖެ ވަޑައިގެން ވަފުދުގައި ވެސް ސިޓީ ކައުންސިލުން ބޭނުންވާ ކަންކަން ހާމަކޮށްފައިވާނެ ކަމަށް ވެސް އާޒިމް ވިދާޅުވިއެވެ. އެގޮތުން މާލޭގެ މަގުތަކުގެ ނަރުދަމާގެ މައްސަލަ ބޮޑުވެ، ނަޖިސްތައް ބޭރުވެ، އެ ނަޖިސްތައް ގޭގެއަށް ވަންނަމުން އަންނަ ކަމަށް ވެސް ޗައިނާގެ ވަފުދުގައި ދެންނެވިކަމަށް އޭނާ ވިދާޅުވިއެވެ.
އެންމެ ފަހުން މިދިއަ ހުކުރު ދުވަހު ރާއްޖެއަށް ކުރި ވިއްސާރައިގައި ބޯކޮށް ވާރޭވެހި، މާލޭގައި ފެންބޮޑުވެ، ގިނަ ފިހާރަތަކަކާއި ގެތަކަށް ފެން ވަދެ ބޮޑެތި ގެއްލުންތަކެއް ވެސް ވަނީ ލިބިފައެވެ. އެގޮތުން ބައެއް ފިހާރަތަކާއި ގޭގޭގައި ބޭނުންކުރާ ބައެއް ފަރުނީޗަރާއި މުދަލަށް ވަނީ ގެއްލުންތަކެއް ލިބިފައެވެ.
