ސިޓީ ބަލިކޮށް، އެޗްޑީސީ އަށް ވެސް ރަނގަޅު ފެށުމެއް

މިހާރު ކުރިއަށްދާ ޤައުމީ ވޮލީ ބޯޅަ މުބާރާތުގައި ސްޕޯޓްސް ކުލަބު ސިޓީއާ ދެކޮޅަށް ކުޅުނު މެޗުން މޮޅުވެ، އެޗްޑީސީ ކުލަބުން ވެސް ރަނގަޅު ފެށުމެއް ހޯދައިފި އެވެ.

ޒުވާނުންގެ މަރުކަޒުގެ އެތެރޭ ކޯޓުގައި އާދީއްތަ ދުވަހުގެ ރޭ ކުޅުނު މެޗު އެޗްޑީސީ ކުލަބުން ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް އެޗްޑީސީ ކުލަބުން ކާމިޔާބު ކުރީ 21-21، 25-19، އަދި 25-20 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެޗްޑީސީގެ ބިދޭސީ ކުޅުންތެރިޔާ މުބައްޝަރު ރަޒާ އެވެ.

ޤައުމީ ވޮލީ މުބާރާތުގައި ހަތަރު ޓީމަކުން ވާދަކުރެ އެވެ. އެއީ އެޗްޑީސީ، ސްޕޯޓްސް ކުލަބު ސިޓީ، ދިވެހި ސިފައިންގެ ކުލަބު އަދި ބްލޫސް ފޯ ވޮލީބޯލް އެވެ. ކޮންމެ ޓީމެއް ކޮންމެ ޓީމަކާ ބައްދަލު ކުރުމަށްފަހު، ރޭންކިންގެ އެއް ވަނަ ޓީމަށް ސީދާ ފައިނަލްގެ ޖާގަ ލިބޭނެ އެވެ. ފައިނަލްގެ ދެ ވަނަ ޖާގަ ލިބޭނީ ރޭންކިންގެ ދެ ވަނަ ޓީމާއި، ތިން ވަނަ ޓީމުގެ ދެމެދުގައި ކުޅޭ ސެމީ ފައިނަލުން މޮޅުވާ ޓީމަކަށެވެ.

ޤައުމީ މުބާރާތުގައި އެޗްޑީސީ އަށް ދެން އޮންނާނީ ހޯމަ ދުވަހުގެ ހަވީރު ބްލޫސްއާ ދެކޮޅަށް ކުޅޭ މެޗެވެ. އެޗްޑީސީން ވަނީ މިދިޔަ އަހަރުގެ ވޮލީބޯޅަ އެސޯސިއޭޝަން ކަޕް ކާމިޔާބު ކޮށްފަ އެވެ. އޭގެ ފަހުން އެޗްޑީސީން ވަނީ ދާދި ފަހުން ނިމުނު ޤައުމީ ވޮލީ ބޯޅަ ލީގު ވެސް ކާމިޔާބު ކޮށްފަ އެވެ.