ބްލޫސް ބަލިކޮށް ސިފައިންގެ ފެށުން ރަނގަޅު

ޤައުމީ ވޮލީ ބޯޅަ މުބާރާތުގައި ބްލޫސް ފޯ ވޮލީބޯލްއާ ދެކޮޅަށް ކުޅުނު މެޗުން މޮޅުވެ، ދިވެހި ސިފައިންގެ ކުލަބުން ފެށުން ރަނގަޅު ކޮށްފި އެވެ.

ޒުވާނުންގެ މަރުކަޒުގެ އެތެރޭ ކޯޓުގައި އާދީއްތަ ދުވަހުގެ ހަވީރު ކުޅުނު މެޗު ސިފައިންގެ ކުލަބުން ކާމިޔާބު ކުރީ ސީދާ ތިން ސެޓުންނެވެ.

މެޗުގެ ފުރަތަމަ ސެޓުގައި ދެ ޓީމުން ވެސް ވަނީ ވާދަވެރި ކުޅުމެއް ދައްކައިފަ އެވެ. ސެޓުގެ ފަހު ވަގުތު ކުރި ހޯދައި ސިފައިންގެ ކުލަބުން ވަނީ 25-23 އިން ސެޓު ކާމިޔާބު ކޮށްފަ އެވެ. ދެ ވަނަ ސެޓުގައި ސިފައިންގެ ފަރާތުން ރަނގަޅު ކުޅުމެެއް ފެނުނުއިރު، ބްލޫސްގެ ފަރާތުން އެކަށީގެންވާ ކުޅުމެއް ނުދެއްކުނެވެ. ސިފައިންގެ ކުލަބުން ދެ ވަނަ ސެޓު ކާމިޔާބު ކުރީ 25-15 އިންނެވެ. އަދި ތިން ވަނަ ސެޓު 25-21 އިން ކާމިޔާބުކޮށް، ސިފައިންގެ ކުލަބު ވަނީ މެޗުން މޮޅުވެފަ އެވެ. މެޗުގެ މޮޅު ކުޅުންތެރިޔަކަށް ހޮވުނީ ސިފައިންގެ ކުލަބުގެ ބިދޭސީ ކުޅުންތެރިޔާ މުޙަައްމަދު ވަޤަރު އެވެ.

މުބާރާތުގައި ދެން ސިފައިންގެ ކުލަބަށް އޮންނާނީ ހޯމަ ދުވަހުގެ ރޭ ސްޕޯޓްސް ކުލަބު ސިޓީއާ ދެކޮޅަށް ކުޅޭ މެޗެވެ.