ވިއްސާރައާ ގުޅިގެން ނައިބު ރައީސް ކުރެއްވި އިލްތިމާސް ގެއްލިއްޖެ
4 ޖެނުއަރީ 2025 | ހޮނިހިރު 08:13ވިއްސާރައިގެ މި ދަނޑިވަޅުގައި ސަރުކާރާއި ކަމާ ގުޅުންހުރި އިދާރާތަކުން ދެމުންދާ އިރުޝާދުތަކަށް ރައްޔިތުން ސަމާލުކަންދީ އެއްބާރުލުން ދިނުމަށް އިލްތިމާސްކޮށްފައިވޭ
ވިއްސާރައާ ގުޅިގެން ނައިބު ރައީސް ކުރެއްވި އިލްތިމާސް
ރާއްޖެއަށް މިހާރު ކުރަމުންދާ ވިއްސާރައާ ގުޅިގެން ނައިބު ރައީސް ހުސެއިން މުޙައްމަދު ލަތީފް (ސެމްބެ) ކުރެއްވި އިލްތިމާސް ގެއްލިއްޖެއެވެ.
މި އިލްތިމާސް ކުރައްވާފައިވަނީ ހުކުރު ދުވަހުގެ ރޭ 9:17 ގައި އެކްސް މެދުވެރިކޮށެވެ.
ނައިބު ރައީސްގެ ޕޯސްޓުގައި ވިދާޅުވެފައިވަނީ، "މިހާރު ރާއްޖެއަށް ކުރަމުންދާ ވިއްސާރައިގައި ލިބެމުންދާ ގެއްލުންތައް ކުޑަކުރުމަށްޓަކައި، މި ދަނޑިވަޅުގައި ސަރުކާރާއި ކަމާ ގުޅުންހުރި އިދާރާތަކުން ދެމުންދާ އިރުޝާދުތަކަށް ރައްޔިތުން ސަމާލުކަންދީ، އެއްބާރުލުން ދިނުމަށް އިލްތިމާސް ކުރަން. މިފަދަ ކޮންމެ ވަގުތެއްގައި ރައްޔިތުންގެ ފަރާތުން ފެންނަ އެއްބައިވަންތަކަމާއި، އެއްބާރު ލުން ފާހަގަކޮށް ޝުކުރު ދަންނަވަން."
ނަމަވެސް، ނައިބު ރައީސްގެ އެކްސް ފީޑްގައި މިހާރު މި ޕޯސްޓް ފެންނާކަށް ނެތެވެ. ގިނަ ބަޔަކު މިކަމަށް ފާޑު ކިޔަމުން ބުނެފައިވަނީ މި ޕޯސްޓު ނައިބު ރައީސް ޑިލީޓް ކުރައްވާފައިވަނީ ރައީސް މުޙައްމަދު މުޢިއްޒުގެ ޕްރެޝަރާ ހެދި ކަމަށެވެ.
ހުކުރު ދުވަހު ހުއްޓުމެއްނެތި ވެހެމުން ދިޔަ ވާރޭގެ ސަބަބުން މުޅި މާލޭގައި ފެންބޮޑުވެ، 36 ގޭބިސީއަކަށް ދިރިނޫޅެވޭ ވަރަށް ގެއްލުންވެ، ރައްޔިތުންނަށް ބޮޑެތި ދަތިތަކާ ކުރިމަތިލާން ޖެހުނެވެ. މި ހާލަތުގައި ރައީސުލްޖުމްހޫރިއްޔާގެ މެސެޖެއްވެސް ރައްޔިތުންނަށް ލިބިފައެއް ނުވެއެވެ.
ސޯޝަލް މީޑިއާގައި ފެތުރޭ ވާހަކަތަކަށް ބަލާއިރު، ރައީސް މުޢިއްޒު އާރަށުގައި ހުންނެވުމުން، އަދި ވިއްސާރައާ ގުޅިގެން ރައީސްގެ އެއްވެސް މެސެޖެއް ރައްޔިތުންނަށް ފޯރުކޮށް ނުދެއްވި އުޅުއްވަނިކޮށް، ނައިބު ރައީސް އެ ގޮތަށް ޓްވީޓް ކުރެއްވުމަކީ ބަލައިގަނެވުނު ކަމަކަށް ނުވީއެވެ. މި ހާދިސާއާ ގުޅިގެން ރައްޔިތުންނަށް ކުރިމަތިވި ދަތިތަކާ އެކު ސޯޝަލް މީޑިއާގައި އެތައް ބަޔަކު ކަންބޮޑުވުން ފާޅުކޮށް ޕޯސްޓްކުރަމުން ދިޔައެވެ. އަދި ސަރުކާރުގެ އިސްވެރިންގެ ފަރާތުން އެކަށީގެންވާ ސަމާލުކަމެއް ނުލިބޭކަމަށް ގިނަ ބަޔަކު ވަނީ ބުނެފައެވެ.
