ނިމިދިޔަ 2024 ވަނަ އަހަރު ރިޕޯޓުކުރި އެކްސިޑެންޓުތަކުގެ އަދަދު އިތުރުވެފައިވާ ކަމަށް މޯލްޑިވްސް ޕޮލިސް ސާވިސްގެ ތަފާސް ހިސާބުތަކުން ދައްކައިފި އެވެ.

ނިމިދިޔަ އަހަރުގެ ތަފާސްހިސާބުތައް ދައްކާ ގޮތުން ފުލުހުންނަށް ހުސްވި އަހަރު ހުށަހެޅި ވައްކަމާއި މަސްތުވާތަކެއްްޗާއި ގުޅުންހުރި މައްސަލަތައް ވަނީ މަދުވެފައެވެ.

ފުލުހުން އާންމުކުރި ތަފާސް ހިސާބުތައް ދައްކާ ގޮތުން ނިމުނު އަހަރު އެންމެ ގިނައިން ހުށަހަޅާފައި ވަނީ ވައްކަމުގެ މައްސަލަތަކެވެ. އެއީ 3،750 މައްސަލަ އެވެ. އޭގެކުރީ އަހަރު 3،817 މައްސަލައެއް ހުށަހަޅާފައިވެ އެވެ.

ދެން އެންމެ ގިނައިން ހުށަހަޅާފައި ވަނީ ޓްރެފިކް އެކްސިޑެންޓުތަކުގެ މައްސަލަތަކެވެ. އެގޮތުން 2،867 މައްސަލައެއް ރިޕޯޓުކޮށްފައިވެ އެވެ. މިއީ 2023 ވަނަ އަހަރު ހުށަހެޅި މައްސަލަތަކާ އަޅާބަލާއިރު 567 މައްސަލައިގެ އިތުރުވުމެކެވެ. އެ އަހަރު ރިޕޯޓުކުރީ 2،300 މައްސަލަ އެވެ.

އެކްސިޑެންޓުތައް އެންމެ ގިނައިން ހިނގާފައި ވަނީ މާލެ ސަރަހައްދުގަ އެވެ. އެކްސިޑެންޓުގެ މައްސަލަތައް ގިނަވި މާޗު މަހު 301 މައްސަލަ ހުށަހަޅާފައިވެ އެވެ.

އެކްސިޑެންޓުތަކުގެ އަދަދު އިތުރުވިއިރު، ނުރައްކާތެރި ގިނަ އެކްސިޑެންޓުތަކެއް ހުސްވި އަހަރު ހިނގާފައިވެ އެވެ. ގިނަ ބަޔަކަށް ބޮޑެތި އަނިޔާތަކެއް ލިބުނުއިރު، ބައެއް މީހުން ނިޔާވެފައިވެ އެވެ.

އާންމުކުރި ހިސާބުތައް ދައްކާ ގޮތުގައި ނިމިދިޔަ އަހަރު މަސްތުވާތަކެއްޗާ ގުޅުންހުރި މައްސަލަތައް ހުށަހެޅި ނިސްބަތް، އޭގެ ކުރީ އަހަރާ އަޅާބަލާއިރު މަދެވެ. މަސްތުވާތަކެތީގެ 1،662 މައްސަލަ ރިޕޯޓުކުރިއިރު، 2023 ވަނަ އަހަރު އެ ބާވަތުގެ 1،752 މައްސަލައެއް ހުށަހަޅާފައިވެ އެވެ.

ފުލުހުންނަށް ހުށަހެޅި އިތުރު މައްސަލަތަކުގެ ތެރޭގައި ތަކެތި ގެއްލިގެން 1،028 މައްސަލައެއް ހުށަހަލާފައިވާއިރު، މާރާމާރީގެ 711 މައްސަލައެއް، އަދި މުދަލަށް ގެއްލުން ދިނުމުގެ 665 މައްސަލައެއް ވަނީ ރިޕޯޓުކޮށްފައެވެ. އަދި ނަހަމަ ގޮތުގައި ފައިސާ ހޯދުމުގެ 654 މައްސަލައަކާއި ފޭރުމުގެ 504 މައްސަލައަކާއި ޖިންސީ ގޯނާގެ 316 މައްސަލައެއް އަދި ގެވެށި އަނިޔާގެ 248 މައްސަލައިގެ އިތުރުން ފޯޖް ކުރުމުގެ 166 މައްސަލަ ރިޕޯޓްކޮށްފައިވެއެވެ.

ކުށް މަދު ކުުރުމަށް ކަމާ ގުޅުންހުރި އިދާރާތަކުން ގިނަ މަސައްކަތްތަކެއް ދަނީ ކުރަމުންނެވެ. އެގޮތުން ފުލުހުންގެ ހަރަކާތްތައް އިތުރުކޮށްފައިވާއިރު، އާންމުން ހޭލުންތެރިކުރުވަން ތަފާތު ޕްރޮގްރާމުތައް އަންނަނީ ހިންގަމުންނެވެ.