ފޮރިން މިނިސްޓަރު އަބްދުﷲ ޚަލީލް އިންޑިއާއަށް ވަޑައިގެންފިއެވެ.

ފޮރިން މިނިސްޓަރު އަބްދުﷲ ހަލީލް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މިއީ އިންޑިއާއަށް ކުރައްވާ ރަސްމީ ދަތުރުފުޅު ކަމަށެވެ. މި ދަތުރުގައި އިންޑިއާގެ އެކްސްޓަރނަލް އެފެއަޒް މިނިސްޓަރު ޑރ. އެސް. ޖައިޝަންކަރާ ބައްދަލުކުރުމަށް ހަމަޖެހިފައިވާ ކަމަށެވެ. އަދި މި ދަތުރުގައި ދެގައުމުގެ ގުޅުން އިތުރަށް ބަދަހިކޮށް، ކުރިއެރުވުމަށާއި، މުހިންމު އިސްކަންދޭ ކަންތައްތަކާ މެދު މަޝްވަރާކުރުމަށާއި، އަދި ދެ ޤައުމުގެ ރައްޔިތުންގެ ފާގަތިކަމާއި މަންފާއަށްޓަކައި ގުޅުން އިތުރަށް ހަރުދަނާކުރުމަށް ކުރެވޭ ފައިދާހުރި މަޝްވަރާތަކަކަށް އުއްމީދުކުރައްވާ ކަމަށް ވިދާޅުވިއެވެ.

ފޮރިން މިނިސްޓަރުގެ ދަތުރާއި ގުޅިގެން އިންޑިއާގެ ނޫސްތަކުގައި ބުނެފައިވަނީ ދިވެހިރާއްޖޭގެ ޚާރިޖީ ވަޒީރު ޢަބްދުﷲ ޚަލީލް ބުރާސްފަތި ދުވަހު އިންޑިއާއަށް ވަޑައިގަތީ ކަނޑުގެ ސަލާމަތާއި ރައްކާތެރިކަމާއި، ވިޔަފާރިއާއި އިންވެސްޓްމަންޓް ފަދަ މުހިންމު ދާއިރާތަކުގައި ދެޤައުމުގެ ގުޅުން ބަދަހިކުރުމުގެ މަގުތައް ބަލައި ދިރާސާކުރުމަށް 3 ދުވަހުގެ ދަތުރެއްގައި ކަމަށެވެ.

ފޮރިން މިނިސްޓަރު ޚަލީލްގެ އިންޑިއާއަށް ވަޑައިގަންނަވާފައިވަނީ ރައީސް ޑރ. މުޙައްމަދު މުޢިއްޒު އިންޑިއާއަށް ކުރެއްވި ދަތުރުފުޅުގެ ގާތްގަނޑަކަށް 3 މަސް ފަހުންނެވެ.

ހުކުރު ދުވަހު ޖައިޝަންކަރާ އެކު ފުޅާ ދާއިރާއެއްގައި މަޝްވަރާކުރައްވާ، ދިވެހިރާއްޖެއާއި އިންޑިއާގެ ގުޅުމުގެ ހުރިހާ ދާއިރާއަކާ ބެހޭގޮތުން ވާހަކަފުޅު ދައްކަވާނެ ކަމަށް އިންޑިއާގެ ނޫސްތަކުގައި ރިޕޯޓްކޮށްފައިވެއެވެ. އިންޑިއާގެ ޚާރިޖީ މިނިސްޓްރީގެ ތަރުޖަމާނު ރަންދީރު ޖައިސްވާލް 'އެކްސް' ގައި ވިދާޅުވީ އިންޑިއާ-ދިވެހިރާއްޖޭގެ މެދުގައި 'ޝާމިލު އިޤްތިޞާދީ އަދި ކަނޑުގެ ސަލާމަތާއި ރައްކާތެރިކަމުގެ ޕާޓްނަރޝިޕް' އެއްގެ ވިޝަނަށް މަސައްކަތްކުރަމުން ކަމަށެވެ.

އިންޑިއާގެ ނޫސްތަކުގައި ބުނެފައިވަނީ ދިވެހިރާއްޖެއަކީ އިންޑިއާ ކަނޑުގެ ސަރަޙައްދުގައި އިންޑިއާގެ މުހިންމު އަވައްޓެރިއެއް ކަމަށެވެ. އަދި ދިފާޢީ އަދި ސަލާމަތީ ދާއިރާތައް ހިމެނޭގޮތަށް ޖުމްލަ ދެޤައުމުގެ ގުޅުން ރާއްޖޭގައި ކުރިން އޮތް ސަރުކާރުގެ ދުވަސްވަރު ކުރިއަރަމުން ދިޔަ ކަމަށެވެ. މީގެ އިތުރުން ޗައިނާއާ ގާތް ގުޅުމެއް އޮންނަ ބޭފުޅެއްގެ ގޮތުގައި މަޝްހޫރު ޑރ. މުޢިއްޒު 2023 ވަނަ އަހަރުގެ ނޮވެމްބަރު މަހު ރައީސްކަމާ ޙަވާލުވުމަށްފަހު އިންޑިއާއި ދިވެހިރާއްޖެއާ ދެމެދު އޮތް ގުޅުން ވަރަށް ބޮޑަށް ހީނަރުވެގެން ދިޔަ ކަމަށެވެ.

މީގެ އިތުރުން ރައީސްކަމުގެ ހުވާކުރެއްވުމަށްފަހު ގަޑިއިރުތަކެއްގެ ތެރޭގައި ދިވެހިރާއްޖޭގައި ތިބި އިންޑިޔާ ސިފައިން ފޮނުވާލުމަށް އެދިވަޑައިގަތް ކަމަށާއި، އޭގެ ފަހުން އިންޑިއާ ސިފައިންގެ ބަދަލުގައި އާންމު ރައްޔިތުން ގެނެސްފައިވާ ކަމަށެވެ.

ނަމަވެސް، މުޢިއްޒު އޮކްޓޯބަރު މަހު ދިއްލީއަށް ކުރެއްވި ދަތުރުފުޅުގައި އިންޑިއާއެކު ގުޅުން ވަރުގަދަކުރުމަށް އިޤްރާރުވެވަޑައިގަތް ކަމަށް ރިޕޯޓްކޮށްފައިވެއެވެ. ރައީސް މުޢިއްޒު ވެރިކަމަށް ވަޑައިގަތުމަށްފަހު، އޭޕްރީލް މަހު "އިންޑިއާ އައުޓް" ކެމްޕޭނުގެ ދަށުން ދިވެހިރާއްޖޭގައި ހަރަކާތްތެރިވާ 80 އިންޑިއާ ސިފައިން ބަދަލުކުރުމަށް އެދިވަޑައިގެންނެވި އެދިވަޑައިގަތުމާ ގުޅިގެން ދިވެހިރާއްޖެއާއި އިންޑިއާގެ ގުޅުން ދަށަށް ދިޔަ ކަމަށް ރިޕޯޓްކޮށްފައިވެއެވެ. ނަމަވެސް، ފާއިތުވި އޮކްޓޯބަރު މަހުން ފެށިގެން ހަރުދަނާ ޑިޕްލޮމެޓިކް މަސައްކަތްތަކެއް ކުރެވުމާ ގުޅިގެން މިހާރު ގުޅުން ރަނގަޅުވަމުން އަންނަ ކަމަށް ވެސް ނޫސްތަކުގައި ވަނީ ރިޕޯޓްކޮށްފައެވެ.

ޖެނުއަރީ 2 އިން 4 އަށް ޚަލީލް ކުރައްވާ 3 ދުވަހުގެ ރަސްމީ ދަތުރުފުޅުގައި، ހުކުރު ދުވަހު އިންޑިއާގެ ޚާރިޖީ ވަޒީރު އެސް. ޖައިޝަންކަރާ ބައްދަލުކުރައްވަން ހަމަޖެހިފައިވެއެވެ. މި ދެ ވަޒީރުން ދެޤައުމުގެ ގުޅުން މުރާޖަޢާކުރައްވައި، އިޤްތިޞާދީ، ކަނޑުގެ އަދި ރައްޔިތުންގެ މެދުގައި އޮންނަ ގުޅުމަށް އައު މިސްރާބަކަށް ގެންދެވޭނެކަމަށް ރިޕޯޓްކޮށްފައިވެއެވެ.

ފާއިތުވި ސެޕްޓެމްބަރު މަހު އިންޑިއާއިން ދިވެހިރާއްޖެއަށް ކުއްލި މާލީ އެހީތެރިކަމެއް ފޯރުކޮށްދިނެވެ. އެގޮތުން، ފައިސާގެ ދަތިކަން ދިމާވެފައިވާ ރާއްޖެއަށް ލުޔެއް ގެނައުމަށްޓަކައި 50 މިލިއަން ޑޮލަރުގެ ޓްރެޜަރީ ބިލެއް ގަތެވެ. މީގެ އިތުރުން ޔޫއެސް ޑޮލަރު/ޔޫރޯ ސްވޮޕް ވިންޑޯގެ ދަށުން 400 މިލިއަން ޑޮލަރަށް ވާސިލުވުމުގެ ފުރުޞަތު ދިނުމާއި، އިންޑިއަން ރުޕީ ސްވޮޕް ވިންޑޯގެ ދަށުން 30 ބިލިއަން ރުޕީ ހޯދުމުގެ ފުރުޞަތު ދިނުން ހިމެނެއެވެ. މި އިންތިޒާމު 2027 ވަނަ އަހަރުގެ ޖޫން މަހާ ހަމައަށް ދެމިއޮންނާނެއެވެ.