ވޭތުވެ ދިޔަ އަހަރަކީ އިޤްތިޞާދީ ގޮތުން ރައްޔިތުން އިތުރަށް ފަޤީރުވެގެން ދިޔަ އަހަރެއް: އަމިރު
މިނިގެން މި ދިޔަ 2024 ވަނަ އަހަރަކީ ރާއްޖޭގެ އިޤްތިޞާދަށް ބޮޑެތި ގޮންޖެހުން ތަކަކާއި ކުރިމަތިވި އަހަރެއް
ކުރީގެ ފިނޭންސް މިނިސްޓަރ އިބްރާހީމް އަމީރު
މިހާރު މި އޮތް ރައީސް ޑރ. މުޙައްމަދު މުއިއްޒުގެ ސަރުކާރަށް އަހަރެއް ވެގެން ދިއައިރު، އެ އަހަރަކީ އިޤްތިޞާދީ ގޮތުން ރާއްޖޭގެ ރައްޔިތުން އިތުރަށް ފަޤީރުވެގެން ދިޔަ އަހަރެއްކަމަށް ކުރީގެ ފިނޭންސް މިނިސްޓަރ އިބްރާހީމް އަމިރު ވިދާޅުވެއްޖެއެވެ.
އަމީރު މިފަދައިން ވިދާޅުވީ ބުދަ ދުވަހުގެ ރޭ ރާއްޖެ ޓީވީން ގެނެސްދިން "ފަލަ ސުރުޚީ" ޕްރޮގްރާމުގައި ވާހަކަދައްކަވަމުންނެވެ.
ރައީސް މުއިއްޒުގެ ސަރުކާރުގެ އިޤްތިޞާދީ ހަރަކާތްތަކާއި މާލީ ކަންކަން ހުރި ގޮތުގެ މައްޗަށް އަލިއަޅުވާލައްވަމުން އަމީރު ވިދާޅުވީ، ނިމިގެން މި ދިޔަ 2024 ވަނަ އަހަރަކީ ރާއްޖޭގެ އިޤްތިޞާދަށް ބޮޑެތި ގޮންޖެހުން ތަކަކާއި ކުރިމަތިވި އަހަރެއް ކަމަށާއި ޚާއްޞަކޮށް މަސްވެރިކަމަށް ބެއްޔަސް މަސްވެރިން މަސައްކަތް ކުރަމުން ގެންދަނީ ވަރަށް ދަތި އުނދަގޫ ހާލަތެއް ގައި ކަމަށެވެ.
އަމީރު ވިދާޅުވީ މަސްވެރިން ބާނާ މަހަށް ލާރި ނުލިބޭ ކަމަށާއި އަދި ތެޔޮ ނުލިބިގެން މަސްވެރިން މަހައް ވެސް ނުފުރާތިބޭ ކަމަށެވެ. އަދި މަސްވެރިންނަށް ލިބޭ އާމްދަނީ މަދުވުމުގެ ސަބަބުން ރައްރަށުގައި ރައްޔިތުން ބިކަވެ، އިޤްތިޞާދީ ހަރަކާތްތައް ވެސް ހުއްޓީފައިވާ ކަމަށް އަމީރު ވިދާޅުވިއެވެ.
އަމީރު ވިދާޅުވީ ކޮންސްޓްރަކްޝަން ދާއިރާއަށް ބަލާލި ނަމަވެސް ފެނިގެން ދަނީ ކުދި އަދި މެދުފަންތީގެ ބޮޑެތި ކުންފުނިތައް އިނދަޖެހި، ބަނގުރޫޓު ވެފައިވާ މަންޒަރުކަމަށާއި އެގޮތުން ކޮންސްޓްރަކްޝަން ކުންފުނިތައް އިނދަޖެހިފައި ވުމުން ގިނަ މަސައްކަތްތައް މިހާރު ހުއްޓިފައިވާ ކަމަށެވެ. އަދި ތަކެތީގެ އަގުތައްވެސް އިންތިހާއަށް އުފުލި އޭގެ ސަބަބުން ރައްޔިތުންނަށް ބޮޑެތި ތަކުލީފުތަކާއި ކުރިމަތިލާން ޖެހިފައިވާކަމަށް ވެސް އަމީރު ވިދާޅުވިއެވެ.
ފަތުރުވެރިކަމުގެ ދާއިރާއަށް އަލިއަޅުއްވާ ލައްވަމުން އަމީރު ވިދާޅުވީ މި ސަރުކާރުން 2 މިލިއަން ފަތުރުވެރިން ރާއްޖެ ގެނައުމުން އެވާހަކަ ހުއްޓާނުލާ ދައްކަމުން ގެންދާއިރު، އެ ވިދާޅުވާ 2 މިލިއަން ފަތުރުވެރިން ރާއްޖެ އައީ ނިމިދިޔަ އެމްޑީޕީ ސަރުކާރުގެ ސިޔާސަތުތަކުގެ ސަސަބުން ކަމަށާއި އެއީ މި ސަރުކާރުގެ ސިޔާސަތުތައް މޮޅުވެގެން ލިބުނު ކުރިއެރުމެއް ނޫންކަމަށެވެ.
އަމީރު އިތުރަށް ވިދާޅުވީ މި ސަރުކާރުގެ ސިޔާސަތަކީ ސިޔާސީ މުވައްޒަފުން ގިނަކޮށް އެ ބޭފުޅުންނަށް ބަޖެޓުގައި ހުރި ހުރިހާފައިސާއެއް ދީ ހުސްކުރުން ކަމަށާއި ފާސްކުރި ބަޖެޓުން ރަށެއްގެ ރައްޔިތުންނަށް ފައިދާ ހުރި އެއްވެސް އިޤްތިޞާދީ ޕްރޮޖެކްޓެއް ނުހިންގާކަމަށެވެ. އަމީރު ވިދާޅުވީ މި ސަރުކާރަށް އެއް އަހަރު ފާއިތުވެ ދިޔައިރު، ރަށެއްގައި އެއްވެސް ޕްރޮޖެކްޓެއް ނުހިންގާ ކަމަށާއި އެކަމުގެ ސަބަބުން ރައްޔިތުން ތިބީ ނިކަމެތިކަމެއްގެ ތެރޭގައި ކަމަށެވެ.
އަމިރު ވިދާޅުވީ ފާއިތުވި އަހަރަކީ ރައްޔިތުން އިޤްތިޞާދީ ގޮތުން އިތުރަށް ފަޤީރުވެގެން ދިޔަ އަހަރެއްކަމަށެވެ.
