ރާއްޖެއާއި ޗައިނާއިން މިނިވަން ވިޔަފާރީގެ އެއްބަސްވުމަށް އަމަލުކުރަންފަށައިފި
މި އެއްބަސްވުމާއިއެކު ރާއްޖެއިން އެކްސްޕޯޓްކުރާ މަހާއި ސީފުޑްގެ ހުރިހާ ބާވަތެއް ސުން ރޭޓުގައި ޗައިނާގެ މާކެޓަށް އެކްސްޕޯޓް ކުރެވޭނެ
ރާއްޖެއާއި ޗައިނާއާއި ދެމެދު ސޮއިކުރެވިފައިވާ މިނިވަން ވިޔަފާރީގެ އެއްބަސްވުމަށް އަމަލުކުރަން ފަށައިފި. ފޮޓޯ: އިކޮނޮމިކް މިނިސްޓްރީ
ރާއްޖެއާއި ޗައިނާއާ ދެމެދު ސޮއި ކޮށްފައިވާ މިނިވަން ވިޔަފާރީގެ އެއްބަސްވުމަށް ބުދަ ދުވަހުން ފެށިގެން އަމަލުކުރަން ފަށައިފިއެވެ.
މި އެއްބަސްވުމުގެ މަޝްވަރާތައް ފުރަތަމަ ފެށުނީ ޗައިނާގެ ރައީސް ޝީ ޖިންޕިން 2014 ވަނަ އަހަރު ރާއްޖެއަށް ކުރެއްވި ފުރަމާނަ ދަތުރުފުޅުގައި ދެ ގައުމުގެ ދެމެދު އިގުތިސޯދީ ދާއިރާއިން ގުޅުން ބަދަހިކުރުމަށް ކުރެވުނު މަޝްވަރާތަކާ ގުޅިގެންނެވެ.
އިކޮނޮމިކް މިނިސްޓްރީން ބުނީ އެއްބަސްވުން ތަންފީޒު ކުރުމުގެ މަސަައްކަތްތަކަށް ފެށީ މިދިޔަ އަހަރުގެ ޖެނުއަރީ މަހު، ރައީސް ޑރ. މުހައްމަދު މުއިއްޒު، ޗައިނާއަށް ކުރެއްވި ފުރަމާނަ ދަތުރުފުޅުގައި އެ ގައުމުގެ ރައީސް އާއެކު ކުރެވުނު މަޝްވަރާތަކާ އެކުގައި ކަމަށާއި އެ ދަތުރުފުޅަށް ފަހު ސިޔާސީ ގޮތުން ދެ ގައުމުގެ ގުޅުން އިތުރަށް ބަދަހިވެގެންދިޔަ ކަމަށެވެ.
އިކޮނޮމިކް މިނިސްޓްރީއިން ވަނީ ބުދަ ދުވަހުން ފެށިގެން މި އެއްބަސްވުމަށް އަމަލުކުރަން ފަށާފައިވާ ކަމަށާއި މިއީ ދެ ގައުމުގެ ދެމެދުގައި ވިޔަފާރިއާއި އިގްތިސާދީ ދާއިރާގެ އިތުރުން އިންވެސްޓްމެންޓް ދާއިރާއިން ގުޅުން ބަދަހިކުރުމަށް އެޅިގެންދިޔަ މުހިންމު ތާރީހީ ބިންގަލެއްކަން ފާހަގަކޮށްފައެވެ.
މި އެއްބަސްވުމާއިއެކު ރާއްޖެއިން އެކްސްޕޯޓްކުރާ މަހާއި ސީފުޑްގެ ހުރިހާ ބާވަތެއް ސުން ރޭޓުގައި ޗައިނާގެ މާކެޓަށް އެކްސްޕޯޓް ކުރެވޭނެކަމަށާއި ވަކިން ހާއްސަކޮށް ރާއްޖޭގެ މަހުގެ އެކްސްޕޯޓް އިތުރުކުރެވި، މަހުގެ ބާވަތްތައް ޕްރޮސެސްކުރުމަށް މަގުފަހިވެ، އެކްސްޕޯޓްގެ ފެންވަރު އިތުރުކުރެވި ރާއްޖެއިން އެކްސްޕޯޓްކުރާ މަހަށް، ރަނގަޅު އަގެއް ލިބިގެންދާނެކަން އިކޮނޮމިކް މިނިސްޓްރީއިން ވަނީ ފާހަގަކޮށްފައެވެ.
އަދި ރާއްޖެއަކީ އިމްޕޯޓަށް ބަރޯސާވެފައިވާ ގައުމަކަށް ވުމުން ޗައިނާ ފަދަ އުފެއްދުންތެރި ގައުމަކާއެކު މިނިވަން ވިޔަފާރީގެ އެއްބަސްވުމުގައި ސޮއިކުރެވި އަމަލުކުރަންފެށުމުން، ރައްޔިތުންނަށް ހެޔޮއަގުގައި މުދާއެތެރެކުރުމަށް މަގުފަހިވާނެކަން މިނިސްޓްރީއިން ވަނީ ފާހަގަކޮށްފައެވެ.
މިނިވަން ވިޔަފާރީގެ އެއްބަސްވުމުގައި ހިމެނޭ މުހިންމު ބައިތަކުގެ ތެރޭގައި މުދަލާއި ހިދުމަތުގެ ވިޔަފާރި އާއި އިންވެސްޓްމަންޓުތަކަށް ފުރުސަތު ފަހިކޮށްދިނުމާ އަދި އިކޮނޮމިކް އެންޑް ޓެކްނިކަލް ކޯޕަރޭޝަން ފަދަ މުހިންމު ދާއިރާތައް ހިމެނެ އެވެ.
އެއްބަސްވުމަށް އަމަލުކުރަން ފެށުމާ އެކު، ޗައިނާއިން ރާއްޖެއަށް އިމްޕޯޓްކުރާ 70 އިންސައްތަ އައިޓަމުން ޑިއުޓީ ކަނޑާލެވޭނެ ކަމަށާއި ރާއްޖެއިން ޗައިނާއަށް އެކްސްޕޯޓްކުރާ 95 އިންސައްތަ އައިޓަމުން ވެސް ޑިއުޓީ ކަނޑާލާނެ ކަމަށް މިނިސްޓްރީން ބުނެއެވެ.
އިކޮނޮމިކް މިނިސްޓްރީން ބުނި ގޮތުގައި މި އެއްބަސްވުމަކީ ރާއްޖޭގެ އެކްސްޕޯޓް އަދި އުފެއްދުންތެރިކަން އިތުރު ކުރުމަށް ހުޅުވިގެން ދިޔަ ފުރުސަތެއް ކަމަށެވެ. ކުދި އަދި މެދުފަންތީގެ ވިޔަފާރިތަކާއި ބޮޑެތި ވިޔަފާރިތަކުން ޗައިނާ ފަދަ ބިޔަ މާކެޓަކާ އެކީ ވިޔަފާރިކުރަން ލިބުނު ރަނުގެ ފުރުސަތުގެ ބޭނުން އެންމެ އެދެވޭ ގޮތުގައި ހިފުން މުހިންމު ކަމުގަ އެވެ.
އެފްޓީއޭއަށް އަމަލުކުރަން ފެށުމުން ޗައިނާގެ ބެއިޖިން، ޝަންހާއީ އަދި ޓިއަންޖިންގެ ފްރީޒޯންތަކުގައި ރާއްޖޭގެ ޓްރެވެލް އޮޕަރޭޓަރުންނަށް އިންބައުންޑް އަދި އައުޓްބައުންޑް ވިޔަފާރި އެއްވެސް ހުރަހެއް ނެތި ކުރެވޭނެ ކަމަށް މިނިސްޓަރު ސައީދު ވިދާޅުވިއެވެ.
ފާހަގަކޮށްލެވޭ ގޮތުގައި މި އެއްބަސްވުމުގެ ދަށުން ރާއްޖެ އާއި ޗައިނާއާ ދެމެދު ކުރާ ވިޔަފާރީގެ މުއާމަލާތްތައް އެއް ބިލިއަން ޑޮލަރަށް އިތުރު ކުރެވޭނެ ކަމަށް ސަރުކާރުން ވަނީ ބުނެފައެވެ. މިހާރުވެސް ރާއްޖެއިން އެ ގައުމާއެކު ކުރަމުންދާ ވިޔަފާރީގެ މުއާމަލާތަކަށް 700 މިލިއަން ޑޮލަރު އަރައެވެ.
ރާއްޖެ އާއި ޗައިނާ އާ ދެމެދު ސޮއިކޮށްފައިވާ މިނިވަން ވިޔަފާރީގެ އެއްބަސްވުން ގެސެޓްގައި ވަނީ އާންމުކޮށްފަ އެވެ.
