މިހާރު ކުރިއަށްދާ ޤައުމީ ވޮލީ ބޯޅަ ލީގުގައި ސްޕޯޓްސް ކުލަބު ސިޓީއާ ދެކޮޅަށް ކުޅުނު މެޗުން އެޗްޑީސީ ކުލަބު މޮޅުވެއްޖެ އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ހޯމަ ދުވަހުގެ ހަވީރު ކުޅުނު މެޗު އެޗްޑީސީ ކުލަބުން ކާމިޔާބު ކުރީ ސީދާ ތިން ސެޓުންނެވެ. މިއީ ލީގުގައި އެޗްޑީސީގެ ދެ ވަނަ މެޗެވެ. އަދި ސިޓީގެ ތިން ވަނަ މެޗެވެ. ފުރަތަމަ މެޗުން ސިޓީ މޮޅުވީއިރު، ދެން ކުޅުނު ދެ މެޗުން ވަނީ ބަލިވެފަ އެވެ.

ސިޓީއާ ދެކޮޅަށް ކުޅުނު މެޗުގެ ސެޓުތައް އެޗްޑީސީން ކާމިޔާބު ކުރީ 25-19، 26-24 އަދި 25-14 އިންނެވެ. މެޗުގެ އެންމެ ވާދަވެރި ކުޅުމެއް ފެނުނީ ދެ ވަނަ ސެޓުގަ އެވެ. މެޗުގެ މޮޅު ކުޅުންތެރިޔަކަށް ހޮވުނީ އެޗްޑީސީގެ މުބައްޝަރު ރަޒާ އެވެ.

ލީގުގައި އެޗްޑީސީ އަށް ދެން އޮންނާނީ ބުދަ ދުވަހުގެ ރޭ ބްލޫސް ފޯ ވޮލީބޯލްއާ ދެކޮޅަށް ކުޅޭ މެޗެވެ. ލީގުގައި ސިޓީގެ ފަހު މެޗުގައި ބުރާސްފަތި ދުވަހުގެ ހަވީރު ނިކުންނާނީ ޕޮލިސް ކުލަބާ ދެކޮޅަށެވެ.