ޕޮލިސް ބަލިކޮށް އެޗްޑީސީގެ ފެށުން ވެސް ރަނގަޅު

މިހާރު ކުރިއަށްދާ، ޤައުމީ ވޮލީބޯޅަ ލީގުގައި ޕޮލިސް ކުލަބާ ދެކޮޅަށް ކުޅުނު މެޗުން މޮޅުވެ، ކުލަބު އެޗްޑީސީން މުބާރާތުގެ ފެށުން ރަނގަޅު ކޮށްފި އެވެ.

ހޮނިހިރު ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މެޗު އެޗްޑީސީން ކާމިޔާބު ކުރީ ތިން ސެޓު އެއް ސެޓުންނެވެ. މެޗުގެ ފުރަތަމަ ސެޓު އެޗްޑީސީން ކާމިޔާބު ކޮށްފައި ވަނިކޮށް، ޕޮލިސް ކުލަބުން ދެ ވަނަ ސެޓު ހޯދި އެވެ. ނަމަވެސް ޖެހިގެން ދެން ކުޅުނު ދެ ސެޓު ވެސް ކާމިޔާބުކޮށް، އެޗްޑީސީން ވަނީ މެޗުން މޮޅުވެފަ އެވެ.

މެޗުގެ ފުރަތަމަ ސެޓު އެޗްޑީސީން ކާމިޔާބު ކުރީ 25-20 އިންނެވެ. ދެ ވަނަ ސެޓުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނުއިރު، ޕޮލިސް ކުލަބުން މި ސެޓު ކާމިޔާބު ކުރީ 23-25 އިންނެވެ. ތިން ވަނަ ސެޓާއި ހަތަރު ވަނަ ސެޓުގައި ވެސް އެޗްޑީސީން ވަނީ މޮޅަށް ކުޅެފަ އެވެ. އެޗްޑީސީން ތިން ވަނަ ސެޓު 25-20 އިން ކާމިޔާބުކުރިއިރު، ހަތަރު ވަނަ ސެޓު ކާމިޔާބު ކުރީ 25-17 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެޗްޑީސީގެ ބިދޭސީ ކުޅުންތެރިޔާ ނޫރު މުޙައްމަދު އެވެ.

މިއަހަރުގެ ޤައުމީ ވޮލީ ބޯޅަ ލީގުގައި ފަސް ޓީމަކުން ވާދަކުރެ އެވެ. އެއީ ކުލަބު އެޗްޑީސީ، ދިވެހި ސިފައިންގެ ކުލަބު، ސްޕޯޓްސް ކުލަބު ސިޓީ، ބްލޫސް ފޯ ވޮލީބޯލް އަދި ޕޮލިސް ކުލަބު އެވެ.

ޤައުމީ ލީގުގައި އެޗްޑީސީގެ ދެ ވަނަ މެޗުގައި ސްޕޯޓްސް ކުލަބު ސިޓީއާ ދެކޮޅަށް ނިކުންނާނީ ހޯމަ ދުވަހުގެ ހަވީރު އެވެ. ޕޮލިސް ކުލަބުގެ ދެ ވަނަ މެޗުގައި ބްލޫސް ފޯ ވޮލީބޯލްއާ ދެކޮޅަށް ނިކުންނާނީ އާދީއްތަ ދުވަހުގެ ރޭ އެވެ.