މަރެސްކާ ބުނީ މެޗު ގެއްލުނީ ދެ ވަނަ ހާފުގައި ހެދުނު ގޯސްތަކުން ކަމަށް

އިނގިރޭސި ޕްރިމިއަރ ލީގުގައި ފުލަމްއާ ދެކޮޅަށް ކުޅުނު މެޗުން ޗެލްސީ ބަލިވީ، ދެ ވަނަ ހާފުގައި ހެދުނު ގޯސްތަކުގެ ސަބަބުން ކަމަށް އެ ޓީމުގެ ކޯޗު އެންޒޯ މަރެސްކާ ބުނެފި އެވެ.

އޭނާ މިހެން ބުނީ ޗެލްސީގެ އަމިއްލަ ދަނޑުގައި ފުލަމް އަތުން ބަލިވި މެޗަށްފަހު ވާހަކަ ދައްކަމުންނެވެ. އެ މެޗުގައި ޗެލްސީން ފުރަތަމަ ލަނޑު ޖަހައި ކުރި ހޯދާފައި ވަނިކޮށް، ދެ ވަނަ ހާފުގައި ދެ ލަނޑު ޖަހައިގެން ފުލަމް އިން ވަނީ ޗެލްސީގެ މައްޗަށް ކުރި ހޯދައިފަ އެވެ.

އެ މެޗަށްފަހު ނޫސްވެރިންނާ ވާހަކަ ދައްކަމުން މަރެސްކާ ބުނީ، ދެ ވަނަ ހާފު ފަށައިގެން ފުރަތަމަ ދިހަ މިނެޓު ނުވަތަ ފަނަރަ މިނެޓުގެ ތެރޭގައި ޗެލްސީ އަށް ގޯސްތަކެއް ހެދުނު ކަމަަށް ޤަބޫލު ކުރާ ކަމަށެވެ. އެގޮތުން ޗެލްސީގެ ކުޅުންތެރިންނަށް ތިބެވުނީ މާބޮޑަށް ދޫކޮށްލައިގެން ކަމަށާއި، އެކަމުގެ ސަބަބުން ފުލަމްގެ ކުޅުންތެރިންނަށް ފުރުސަތުތަކެއް ފަހިވެގެން ދިޔަ ކަމަށެވެ. އެކަމުގެ ނަތީޖާއަކަށްވީ މެޗުގެ އެންމެ ފަހު ވަގުތުގައި ފުލަމް އިން ލަނޑު ޖަހައިގެން މޮޅުވުން ކަމަށް ވެސް މަރެސްކާ ވަނީ ބުނެފަ އެވެ.

މީގެ އިތުރުން މަރެސްކާ ބުނީ، މެޗު މެނޭޖުކުރުމުގައި އަދިވެސް ޗެލްސީން ކުރިއެރުންތަކެއް ހޯދަން ޖެހޭ ކަމަށެވެ. ޚާއްސަކޮށް މެޗުތަކުގެ ދެ ވަނަ ހާފުގައި އެކަމަށް އިތުރު ސަމާލުކަން ދޭން ޖެހޭ ކަމަށާއި، ފުލަމް މެޗުގައި ފެނުނީ އެކަމަށް ދެވުނު ސަމާލުކަން ކުޑަވުމުގެ ސަބަބުން ދެ ލަނޑު ބައި ކޮޅަށް ވަދެގެން މެޗުން ބަލިވި މަންޒަރު ކަމަށް ވެސް މަރެސްކާ ވަނީ ބުނެފަ އެވެ. ޚާއްސަކޮށް ފުލަމްގައި ތިބި ކުޅުންތެރިންނަކީ އެފަދަ ވަގުތުތަކުގައި ފައިދާ ނަގަން އިނގޭ ކަހަލަ ކުޅުންތެރިންގެ ގޮތުގައި މަރެސްކާ ވަނީ ސިފަ ކޮށްފަ އެވެ.

މެޗުން ޗެލްސީ ބަލިވުމަށް އިޝާރާތް ކުރަމުން މަރެސްކާ ބުނީ، އެ މެޗަކީ ޗެލްސީ އަށް ބަލީގެ ތަހަންމަލު ކުރަން ޖެހުނު މެޗެއް ކަމަށެވެ. އެހެން ނަމަވެސް، ދެން ކުރަން ޖެހޭ ކަމަކީ ކުރިއަށް އޮތް މެޗަށް ތައްޔާރުވުން ކަމަށާއި، މާޒީ އަށް ބަލަހައްޓައިގެން ނުތިބެވޭނެ ކަމަށް ވެސް މަރެސްކާ ބުނެފައިވެ އެވެ. ތިން ދުވަސް ފަހުން އިޕްވިޗް ޓައުންއާ ދެކޮޅަށް ނިކުންނަން ޖެހޭނީ އައު ހިތްވަރެއްގައި، އެ މެޗުން މޮޅުވާން ކަމަށް މަރެސްކާ ބުންޏެވެ.

މަރެސްކާ ހަވާލުވީ ފަހުންް ޗެލްސީން ރަނގަޅު ނަތީޖާތަކެއް ނެރެމުން އަންނައިރު، ފުލަމް އަތުން ވީ ބައްޔަކީ މި ސީޒަންގެ ލީގުގައި އެ ޓީމުގެ ތިން ވަނަ ބައްޔެވެ. މިހާތަނަށް ލީގުގައި ޗެލްސީން 18 މެޗު ކުޅެފައިވާއިރު، 10 މެޗުން މޮޅުވެ، ފަސް މެޗުން ވަނީ އެއްވަރުވެފަ އެވެ. ލީގު ތާވަލްގެ ދެ ވަނައިގައި ޗެލްސީ އޮތީ 35 ޕޮއިންޓާ އެކު އެވެ.