ދިވެހިންނަކީ ގައުމަށް ދިމާވާ މުހިންމު ކޮންމެ ހާލަތެއްގައިވެސް އަބަދުވެސް ބަދަހިކަން ދައްކާ ބައެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް މުއިއްޒު މިހެން ވިދާޅުވީ ގައުމީ އެއްބައިވަންތަކަމުގެ ދުވަހުގެ މުނާސަބަތުގައި އެކްސްގައި ހިއްސާކުރެއްވި ޕޯސްޓެއްގައެވެ.

ރައީސް މުއިއްޒު ވިދާޅުވީ ދިވެހިންނަކީ ގައުމަށް ދިމާވާ ކޮންމެ މުހިންމު ހާލަތެއްގައި އެއް އާއިލާގެ ބަދަހިކަން ދައްކާ އުހުވަތްތެރި އެކުވެރި އޯގާތެރި ހޮޔޮލަފާ ރައްޔިތުންތަކެއް ކަމަށެވެ.

މީގެ އިތުރުން ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފްވެސް ވަނީ ގައުމަށް ދިމާވާ ގޮންޖެހުންތަކުން އަރައިގަނެ، ގައުމީ ތަރައްގީގެ މަސައްކަތް ހަލުވިކުރުމަށް އެއްބައިވަންތަކަން އިސްކުރުމުގެ މުހިންމުކަން ފާހަގަކުރައްވާފައެވެ. އަދި ވިދާޅުވީ މިކަންކަން ހާސިލުކުރުމަށް ގައުމީ ރޫހެއްގައި މަސައްކަތްކުރުން ވެސް ވަރަށް މުހިންމު ކަމަށެވެ.

ނައިބު ރައީސް ވިދާޅުވީ މުޖުތަމައުގެ ދުޅަހެޔޮކަން ބިނާވަނީ އެއްބައިވަންތަކަމާއި ބަދަހި ގުޅުންތަކުގެ މައްޗަށްކަމަށެވެ.

ގައުމީ އެއްބައިވަންތަކަމުގެ ދުވަސް ފާހަގަކުރުމުގެގޮތުން، ސުނާމީ ކާރިސާގައި ނިޔާވި މީހުންނާއި ގެއްލުނު މީހުންގެ ހަނދާނުގައި ބުރާސްފަތި ދުވަހުގެ ހެނދުނު މުޅި ރާއްޖެގައި ވަނީ ސުކޫތެއް ވެސް ގެނެސްފައެވެ. މި ސުކޫތުގައި ރައީސް މުއިއްޒު ވެސް ބައިވެރިވެވަޑައިގެންނެވިއެވެ.

ސުނާމީގެ ރާޅު 2004 ވަނަ އަހަރު ރާއްޖެއަށް އެރިކަމަށް ރިކޯޑްކުރެވިފައިވާ ގަޑިކަމުގައިވާ ހެނދުނު 9:23ގައި ގެނައި ހަމަހިމޭންކަމުގެ މި ވަގުތުކޮޅުގައި ސަރުކާރުގެ އޮފީސްތަކުން ގިނަ އަދަދެއްގެ މުވައްޒަފުން ބައިވެރިވެފައިވެއެވެ.

2004 ޑިސެންބަރު ގެ ސުނާމީއަށް ބުރާސްފަތި ދުވަހަށް 20 އަހަރު ފުރިގެން ދާއިރު، މި ހިތާމަވެރި ކާރިސާގައި ރާއްޖޭގައި މީހުން ދިރިއުޅޭ 9 ރަށެއް ފިޔަވައި އެހެން ހުރިހާ ރަށަކަށް މި ސުނާމީގެ އަސަރު ކޮށްފައިވެއެވެ. އަދި 82 ދިވެހިން ނިޔާވެ، 26 ދިވެހިން ވީނުވީއެއް ނޭނގި ގެއްލި، 15000 މީހުންގެ ގެދޮރު ވަނީ ގެއްލިފައެވެ. އެދުވަހު ހާލުގައިޖެހުނު ފަރާތްތަކަށް އެހީވުމުުގެ ގޮތުން ދިވެހިން ދައްކުވައިދިން ހިތްވަރާއި ވިލުންތެރިކަން ފާހަގަ ކުރުމުގެ ގޮތުން ކޮންމެ އަހަރެއްގެ ޑިސެންބަރުމަހުގެ 26 ވަނަ ދުވަސް، ދިވެހިންގެ އެއްބައިވަންތަކަމުގެ ދުވަހުގެ ގޮތުގައި ދަނީ ފާހަގަކުރަމުންނެވެ.