ސުނާމީ ކާރިސާގައި ދިވެހިން ދައްކުވައިދިނީ އެއްބައިވަންތަކަމާއި އެހީތެރިވުުމުގެ ލާމަސީލު މިސާލު: ރައީސް ސާލިހު
ސުނާމީ ކާރިސާގައި ވަކިވެދިޔަ އެންމެހާ ބޭފުޅުންނަށް ހެޔޮ ރަހުމަތް ލެއްވުން އެދި ދުއާ ދަންނަވާފައިވޭ
ކުރީގެ ރައީސް އިބްރާހިމް މުހައްމަދު ސާލިހު
ސުނާމީ ކާރިސާގައި ދިވެހިން ދައްކުވައިދިނީ އެއްބައިވަންތަކަމާއި އެހީތެރިވުުމުގެ ލާމަސީލު މިސާލު ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
ބުރާސްފަތި ދުވަހު އެކްސްގައި އެމަނިކުފާނު ވަނީ އެއްބައިވަންތަކަމުގެ ދުވަހުގެ ހެޔޮއެދުންތައް އެންމެހާ ދިވެހިންނަށް އަރިސްކުރައްވާފައެވެ.
ރައީސް ސާލިހު ވިދާޅުވީ މީގެ 20 އަހަރު ކުރިން، ސުނާމީ ކާރިސާގައި ދިވެހިން ދައްކުވައިދިނީ އެއްބައިވަންތަކަމާއި އެކަކު އަނެކަކަށް އަޅާލުމާއި އެހީތެރިވުުމުގެ ލާމަސީލު މިސާލެއް ކަމަށެވެ.
އެމަނިކުފާނު ވަނީ އަޅުގަނޑުމެންގެ މެދުގައި އޮންނަ ބަދަހި ގުޅުން އަބަދަށްމެ ދަމެހެއްޓުން އެދި ދުއާ ކުރައްވާ ކަމަށާއި. އަދި ސުނާމީ ކާރިސާގައި ވަކިވެދިޔަ އެންމެހާ ބޭފުޅުންނަށް ހެޔޮ ރަހުމަތް ލެއްވުން އެދި ދުއާ ކުރައްވާކަމަށް ވިދާޅުވެފައެވެ.
ކޮންމެ އަހަރެއްގެވެސް ޑިސެމްބަރު 26 ވަނަ ދުވަސް ރާއްޖޭގައި ފާހަގަ ކުރަމުން އަންނަނީ ގައުމީ އެއްބައިވަންތަކަމުގެ ދުވަހުގެ ގޮތުގައެވެ. އެންމެ ފުރަތަމަ މިދުވަސް ފާހަގަ ކުރެވުނީ ކުރީގެ ރައީސް މައުމޫނު އަބްދުލްގައްޔޫމްގެ ދައުރުގައި 26 ޑިސެންބަރު 2005 ގައެވެ. ދުވަސް ނިސްބަތްވަނީ 26 ޑިސެންބަރު 2004ގައި ރާއްޖެއަށް ކުރިމަތިވި ގުދުރަތީ އެންމެބޮޑު ކާރިސާ ކަމަށްވާ ސުނާމީ ކާރިސާއަށެވެ. މި ދުވަސް ފާހަގަ ކުރެވެނީ ހިތާމަޔާއި ބިރުވެރިކަމުގައި އެދުވަހު އެންމެހައި ދިވެހިން ގުޅިގެން ދެއްކި އެއްބައިވަންތަކަމުން ފިލާވަޅު ލިބިގަނެ ގައުމީ ޖޯޝާއި އެއްބައިވަންތަަކަން އިތުރުކޮށް ދެމެހެއްޓުމަށް ބާރުއަޅައި ހިތްވަރު ދިނުމުގެ ގޮތުންނެވެ.
