މިސަރުކާރުގައި ރައްޔިތުންގެ މަޖިލީހަކީ އަނދިރި ކޮޓަރީގައި އޮންނަ އަނދިރި މަޖިލީހެއް: އިބްރާހިމް ރަޝީދު
ކަންކަން ފޮރުވުމަކީ ޑިމޮކްރަސީ ދަންނަ އުސޫލެއް ނޫން
މާފަންނު މެދު ދާއިރާގެ ކުރީގެ މެމްބަރު އިބްރާހިމް ރަޝީދު ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގައި މިއޮތް 20 ވަނަ ރައްޔިތުންގެ މަޖިލީހަކީ އަނދިރި ކޮޓަރީގައި އޮންނަ އަނދިރި މަޖިލީހެއްކަމަށް މާފަންނު މެދު ދާއިރާގެ ކުރީގެ މެމްބަރު އިބްރާހިމް ރަޝީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އިބްރާހިމް ރަޝީދު ވިދާޅުވީ ރާއްޖޭގެއަށް ރައްޔިތުން ގެނެސްފައިވާ ނިޒާމުގައިވާ ގޮތުން ރާއްޖޭގައި އޮތީ ރައްޔިތުންގެ ވެރިކަމެއް ކަމަށާއި، ރައީސް އަކީ ރައްޔިތުންގެ ހާދިމެއް ކަމަށެވެ. އަދި ރައްޔިތުންގެ ގައުމެއްގައި ރައްޔިތުންނަށް ސިއްރުކުރަން ޖެހޭ ކަމެއް ނޯންނާނެ ކަމަށް އޭނާ ވިދާޅުވިއެވެ. ޑިމޮކްރަސީއަށް އިޝާރާތް ކުރައްވައި އިބްރާހިމް ރަޝީދު ވިދާޅުވީ ކަންކަން ފޮރުވުމަކީ ޑިމޮކްރަސީ ދަންނަ އުސޫލެއް ނޫން ކަމަށާއި، ނަމަވެސް މިސަރުކާރުގެ ސިއްރުކަން ވަރަށް ބޮޑުވެފައިވާ ކަމަށެވެ. އަދި ރައްޔިތުންގެ މަޖިލިސް އޮތީ ބަންދުކޮށްފައި ކަމަށާއި، އަދިރި ކޮޓަރިއަކަށް ލާފައިވާ ކަމަށެވެ.
ގައުމުގެ ހާލަތާއި ގުޅޭގޮތުން އިބްރާހިމް ރަޝީދު ވިދާޅުވީ މިސަރުކާރުން އަމަލުކުރަމުންދާ ގޮތުން ރާއްޖޭގެ ހާލަތު ދާނީ ދަށަށް ކަމަށާއި، ދަރަނިވެރިވުން އިތުރުވާނެ ކަމަށެވެ. ބަނޑަށް ނުޖެހި ދިވެހި ރައްޔިތުން ދިރިއުޅުނު ނަމަވެސް ހާލަތު ދަށްވާނެ ކަމަށް އޭނާ ވިދާޅުވިއެވެ.
އިބްރާހިމް ރަޝީދު ވިދާޅުވީ ރާއްޖޭގެ ހާލަތު ރަނގަޅުކޮށް، ރައްޔިތުން ބާރުވެރި ކުރުވުމަށް ގައުމުގެ ނިޒާމު ބަދަލު ކުރަންޖެހޭ ކަމަށެވެ.
އެގޮތުން ގައުމުގައި ހުންނަވާ ރައީސް ވެސް ޖަވާބުދާރީ ކުރުވޭ ގޮތަށް ރައްޔިތުންގެ މަޖިލީހަށް ހާޒިރުކޮށް ސުވާލު ކުރެވޭ ގޮތަށް ގާނޫނު އަސާސީއަށް ބަދަލު ގެންނަންޖެހޭ ކަމަށް އޭނާ ވިދާޅުވިއެވެ. އިބްރާހިމް ރަޝީދު ވިދާޅުވީ އެހެން ބޭރުގެ ގައުމުތަކުގައި ވެސް މިއުސޫލަށް އަމަލުކުރާ ކަމަށާއި، ނަތީޖާއެއް ގޮތުން ގައުމުގެ މާލިއްޔަތުގެ ކަންކަން ރައްޔިތުންނަށް ވަރަށް ސާފުކޮށް އެނގޭ ކަމަށެވެ. ނަމަވެސް ރާއްޖޭގައި ގައުމުގެ މާލިއްޔަތުގެ ހުރިހާ ކަމެއް ދަނީ ސިއްރުވެ ވަންހަނާވަމުން ކަމަށާއި، ބަޖެޓަށް ވާނުވާ ނޭނގޭ ކަމަށް އިބްރާހިމް ރަޝީދު ވިދާޅުވިއެވެ. މިއީ ވަރަށް ބޮޑު ކަންބޮޑުވުމެއް ކަމަށް އޭނާ ވިދާޅުވިއެވެ.
