އެޗްޑީސީގެ ހިޔާނާތާއި ގުޅިގެން ތަހުގީގު ހިންގަންވީ ރައީސް މުއިއްޒުގެ މައްޗަށް، ބަލާ ފާސްކުރަންވީ ދިމްޔާތު: ޝާތިރު
ވެރިންނަށް އައްޔަން ކުރައްވަނީ ރައީސް މުއިއްޒު ވިދާޅުވާ ގޮތަށް މަސައްކަތް ކުރާ ބޭފުޅުން
ފަލަސުރުހީ ޕްރޮގްރާމްގައި އެމްޑީޕީ ގައުމީ މަޖިލީހުގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހްމާން ވާހަކަދައްކަވަނީ
ހައުސިންގ ޑިވެލޮޕްމަންޓް ކޯޕްރޭޝަންގެ (އެޗްޑީސީ)ގެ ހިޔާނާތާއި ގުޅިގެން ތަހުގީގު ހިންގަންވީ ރައީސް ޑރ.މުހައްމަދު މުއިއްޒުގެ މައްޗަށް ކަމަށާއި، ބަލާ ފާސްކުރަންވީ ދިމްޔާތު ކަމަށް އެމްޑީޕީ ގައުމީ މަޖިލީހުގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހްމާން ވިދާޅުވެއްޖެއެވެ.
ފަލަސުރުހީ ޕްރޮގްރާމްގައި ޝާތިރު ވިދާޅުވީ އެޗްޑީސީގައި ހިންގާފައިވާ ހިޔާނަތްތަކާއި، މިހާރު ގައުމުގައި ހިނގާ މިފަދަ ކަންކަމުގައި ފުރިހަމަ ޒިންމާ ނަގަންޖެހޭނީ ރައީސް މުއިއްޒު ކަމަށެވެ.
ސަރުކާރުގެ އެކިއެކި މަގާމުތަކާއި، ކުންފުނިތަކުގެ ވެރިންނަށް އައްޔަން ކުރައްވަނީ ރައީސް މުއިއްޒު ވިދާޅުވާ ގޮތަށް މަސައްކަތް ކުރާ ބޭފުޅުންކަން ފާހަގަކުރައްވައި ޝާތިރު ވިދާޅުވީ ކަންކަމުގައި އެންމެފަހު ބަސް ވިދާޅުވަނީ ރައީސް މުއިއްޒު ކަމަށާއި، އެމަނިކުފާނު އަމިއްލަފުޅަށް ވެސް އެހެން ވިދާޅުވެފައިވާ ކަމަށެވެ. އެހެންކަމުން އެކިއެކި މަގާމުތަކުގައި ތިއްބެވި އިސްވެރިން ކުރާ ކޮންމެ ކަމެއް ރައީސް މުއިއްޒަށް އެނގިވަޑައިގަންނަވާނެ ކަމަށް ޝާތިރު ވިދާޅުވިއެވެ.
އެޗްޑީސީގެ ހިޔާނާތަަށް އިޝާރާތް ކުރައްވައި ޝާތިރު ވިދާޅުވީ ތަހުގީގު ހިންގަންވީ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ މައްޗަށް ނޫން ކަމަށާއި، ރައީސް މުއިއްޒުގެ މައްޗަށް ކަމަށެވެ. އަދި ބަލާ ފާސްކުރަންވީ ފަޒުލް ދިރިއުޅުއްވާ ގެ ނޫން ކަމަށާއި، ދިމްޔާތު ކަމަށެވެ. އަދި ވިދާޅުވީ ފަޒުލް މަސައްކަތް ކުރެއްވީ ސީދާ ރައީސް މުއިއްޒުގެ އެންގެވުމުގެ ދަށުން ކަމަށާއި، ފަޒުލްގެ މައްސަލައެއް ނެތް ކަމަށެވެ.
ބިންވެރިޔާ ސްކީމުގެ ދަށުން ވަގަށް ގޯތިތަކެއް ދޫކުރި މައްސަލައިގައި ތުހުމަތުކުރެވޭ އެޗްޑީސީގެ ކުރީގެ މެނޭޖިން ޑިރެކްޓަރު ފަޒުލް ދިރިއުޅޭ، މ. ޒޭވަރު 23 ޑިސެންބަރު 2024ވީ ހޯމަ ދުވަހުގެ ރޭގެ ވަގުތެއްގައި ފުލުހުން ވަނީ ބަލާ ފާސްކޮށްފައެވެ. އަދި ބައެއް އިލެކްޓްރޯނިކް އައިޓަމްތައް ފުލުހުންގެ ބެލުމުގެ ދަށަށް ވަނީ ގެނެސްފައެވެ. ނަމަވެސް އެއީ ކޮން ބާވަތެއްގެ އިލެކްޓްރޯނިކް ސާމާނެއްކަމެއް ފުލުހުން ހާމައެއް ނުކުރެއެވެ.
އެޗްޑީސީއާ ގުޅުންހުރި ގިިނަ ހިނާޔާތުގެ މައްސަލަތަކެއް ފެންމަތިވެފައިވާއިރު، ގޯތީގެ މައްސަލަ ޖީނާއީ މައްސަލައެއްގެ ގޮތުގައި ފުލުހުން ގެންދަނީ ތަހުގީގު ކުރަމުންނެވެ.
