އައިބީއެމް އަށް ލޭބަރ އެކޮމޮޑޭޝަނެއް ހޯދުމާ ގުޅޭ އާ އެއްބަސްވުން ބާތިލުކޮށްފި
އައިބީއެމްއިން ލޭބާ އެކޮމޮޑޭޝަން ކުރިން ކުއްޔަށް ނަގާފައި ހުރީ މަހަކު 60،000ރ. ދޭ ގޮތަށް
އެމްޑަބްލިއުއެސްސީ
އައިލެންޑް ބެވަރެޖް މޯލްޑިވްސް (އައިބީއެމް) އަށް ލޭބަރ އެކޮމޮޑޭޝަނެއް ހޯދުމާ ގުޅޭ އާ އެއްބަސްވުން ބާތިލުކޮށް، އެ ޕްރޮސެސް އަލުން ކުރިއަށް ގެންދަން އެމްޑަބްލިއުއެސްސީން އަންގައިފި އެވެ.
މިކަން ހާމަކޮށް ފައިވަނީ އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން "އެކްސް" ގައި ކުރެއްވި މެސެޖެއްގައެވެ.
އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން "އެކްސް" ގައި ކުރެއްވި މެސެޖުގައި ވިދާޅުވީ އެ ކުންފުނީގެ ސަބްސިޑަރީ ކުންފުނި އައިބީއެމްއަށް ލޭބާ އެކޮމޮޑޭޝަނެއް ހޯދުމުގެ ޕްރޮސެސް އާއި އަގުތަކާ ގުޅޭ ޝަކުވާއެއް އައުމާ ގުޅިގެން އެކަންތައް ބެލުމަށްފަހު އެއްބަސްވުން ބާތިލު ކޮށްފައިވާ ކަމަށެވެ.
"އައިބީއެމްއަށް ލޭބާ އެކަމޮޑޭޝަން ހޯދުމުގެ ޕްރޮސް އާއި އަގުތަކާއި ގުޅޭ ޝަކުވާއެއް އަޅުގަނޑުމެނަށް މީގެ ދުވަސްކޮޅެއް ކުރިން ވަނީ ލިބިފަ. އަދި އެއާއި އެކު އެކަން ކުރިޔަށް ގޮސްފައިވާ ގޮތާއި އަގުތައް އިންޓާނަލް އޮޑިޓް ޓީމުން ބެލުމަށްފަހު އެމްޑަބްލިއުއެސްސީގެ ބޯޑުގައި މަޝްވަރާކުރެވި އެކަމާ ގުޅިގެން އަޅަންޖެހޭ ފިޔަވަޅުތައް އެޅުމަށް މިހާރުވާނީ އައިބީއެމްއަށް އަންގާފަ،" އޭނާ ވިދާޅުވި އެވެ.
އައިބީއެމްގެ އެއްބަސްވުމާއި ގުޅޭގޮތުން ސޯޝަލް މީޑިއާގައި އާންމުވެފައިވާ މައުލޫމާތުތަކުން އެނގޭ ގޮތުގައި އައިބީއެމްއިން އެކޮމޮޑޭޝަން ބްލޮކް ފަސް އަހަރު ދުވަހަށް ކުއްޔަށް ނެގީ ޓެލެ މޯލްޑިވްސް ކިޔާ ކުންފުންޏެއް މެދުވެރިވެގެން ބިޑިން ޕްރޮސެސްއަކާ ނުލައި މަހަކު ދެ ލައްކަ ރުފިޔާ ދައްކާ ގޮތަށެވެ.
ސޯޝަލް މީޑިއާގައި އާންމުވި މި އެއްބަސްވުމުން އެނގޭ ގޮތުގައި އެ އާ އެއްބަސްވުން ހެދީ އިތުރު ފްލޯއެއް ވެސް ކުއްޔަށް ނަގާ ގޮތަށް، އެތަނުގެ މަރާމާތަށް އައިބީއެމްއިން ހަރަދު ކުރާ ގޮތަށެވެ. އައިބީއެމްއިން ލޭބާ އެކޮމޮޑޭޝަން ކުރިން ކުއްޔަށް ނަގާފައި ހުރީ މަހަކު 60،000ރ. ދޭ ގޮތަށްކަން ލިޔުންތަކުން ހާމަވެއެވެ. އަދި އެ ލޭބާ އެކޮމޮޑޭޝަން ވެސް ކުއްޔަށް ނެގީ ޓެލެ މޯލްޑިވްސް އިންނެވެ.
އައިބީއެމްއިން ލޭބަރ އެކޮމޮޑޭޝަންގެ މި އެއްބަސްވުން އެންމެ ފުރަތަމަ ހަދާފައި ވަނީ މި އަހަރުގެ އޮގަސްޓް މަހުގެ 27، ގަ އެވެ. ނަމަވެސް އެ އެއްބަސްވުން ބަދަލުކޮށް އާ އެއްބަސްވުމުގައި ސޮއިކުރީ މިއަހަރުގެ އޮކްޓޯބަރު 22، ވަނަ ދުވަހުގައެވެ.
ރައީސް ޑރ. މުޙައްމަދު މުއިއްޒުގެ މި ސަރުކާރު ހިއްސާވާ ކުންފުނިތަކާ ގުޅިގެން ބޮޑެތި ކޮރަޕްޝަންގެ އެކި ކަހަލަ މައްސަލަތައް އަންނަނީ ފެންމަތިވަމުންނެވެ. އެގޮތުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާ ގުޅިގެން ފެންމަތިވީ ކޮރަޕްޝަންގެ ކަންކަން ފުލުހުންގެ އިތުރުން އެންޓި ކޮރަޕްޝަން ކޮމިޝަން (އޭސީސީ) އިން ދަނީ ތަހުގީގުކުރަމުންނެވެ.
