އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީން) ޓެރަރިސްޓް ހަމަލާއެއް ދޭން އުޅޭ ކަމަށް ޓޫރިޒަމް މިނިސްޓްރީގެ ސްޓޭޓް މިނިސްޓަރު އަދި ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު މުހައްމަދު ނިހާދު ދެއްކި ވާހަކައާއި ގުޅިގެން ޓެރަރިޒަމް މަނާކުރުމުގެ ގާނޫނުގެ ދަށުން އޭނާގެ މައްޗަށް 5 އަހަރާއި 7 އަހަރާއި ދެމެދުގެ ޖަލުހުކުމެއް އަތުވެދާނެއެވެ.

ސަރުކާރު ހިންގާ މައި ޕާޓީ ޕީއެންސީން ހޯމަ ދުވަހުގެ ރޭ ކޮންގްރެސް ޖަގަހައިގައި ބޭއްވި ބައްދަލުވުމުގައި ނިހާދު ވިދާޅުވީ އެމްޑީޕީން ޓެރަރިސްޓް ހަމަލާއެއް ދޭން އުޅެނީ ރާއްޖެއަށް އަންނަ ބުރާސްފަތި ދުވަހުގެ ނިޔަލަށް ދެ މިލިއަން ފަތުރުވެރިން ޒިޔާރަތް ކުރާތީ، އެކަމަށް ސަރުކާރުން ކުރަމުންދާ މަސައްކަތް ހުއްޓުވުމަށް ކަމަށެވެ.

ޓެރަރިސްޓް ހަމަލާއެއްދޭން އުޅޭކަމުގެ މައުލޫމާތު އެނގި އެ މައުލޫމާތު ކަމާއި ބެހޭ އިދާރާތަކަށް ނުދިނުމަކީ ގާނޫނީ ކުށެކެވެ.

ޓެރަރިޒަމް މަނާކުރުމުގެ ގާނޫނުގެ އިންޓެލިޖެންސް މަޢުލޫމާތު ދޭންވާ ފަރާތަކަށް ނުދިނުމުގެ މާއްދާ (1-60) ގެ (ހ) ގައި ބުނެފައިވަނީ އެ ޤާނޫނުގެ 3-19 ވަނަ މާއްދާގެ (ހ) ގެ ދަށުން އެކުލަވާލާ ޓެރަރިޒަމާ ގުޅުންހުރި އިންޓެލިޖެންސާއި މަޢުލޫމާތު ބަދަލުކުރުމުގެ އޮނިގަނޑާ އެއްގޮތަށް ޓެރަރިޒަމާގުޅޭ އިންޓެލިޖެންސް ބަދަލުކުރަންޖެހޭ ޙާލަތެއްގައި، ޓެރަރިޒަމްގެ ޢަމަލެއް ހުއްޓުވުމަށް މުހިންމު މަޢުލޫމާތެއް، އެ މަޢުލޫމާތެއް ޙިއްޞާކުރަން މި ޤާނޫނުގެ ދަށުން ނުވަތަ އެހެން ޤާނޫނެއްގެ ދަށުން ލާޒިމުކުރާ ފަރާތަކާ ނުކުރުމުގެ ސަބަބުން ޓެރަރިޒަމްގެ ޢަމަލެއް މެދުވެރިވެއްޖެނަމަ، އެފަދައިން މަޢުލޫމާތު ހާމަނުކުރި ފަރާތުން އެ ކުރަނީ ކުށެކެވެ.

އެ މާއްދާގެ (ށ) ގައި ބުނެފައިވަނީ މި މާއްދާގެ (ހ) ގައި ބަޔާންކޮށްފައިވާ ކުށުގެ ނަތީޖާއެއްގެ ގޮތުން މީހަކު މަރުވެއްޖެނަމަ، އެ ކުށުގެ އަދަބަކީ، 5 (ފަހެއް) އަހަރާއި 7 (ހަތެއް) އަހަރާ ދެމެދުގެ މުއްދަތަކަށް ޖަލަށްލުމެވެ. އަދި އެ މާއްދާގެ (ނ) ގައި ބުނެފައިވަނީ މި މާއްދާގެ (ހ) ގައި ބަޔާންކޮށްފައިވާ ކުށުގެ ނަތީޖާއެއްގެ ގޮތުން މީހެއްގެ ހަށިގަނޑަށް ބޮޑު ގެއްލުމެއް ލިބިއްޖެނަމަ، އެ ކުށުގެ އަދަބަކީ، 3 (ތިނެއް) އަހަރާއި 5 (ފަހެއް) އަހަރާ ދެމެދުގެ މުއްދަތަކަށް ޖަލަށްލުމެވެ.

ޓެރަރިޒަމާގުޅޭ މައުލޫމާތު ހާމަނުކުރުމުގެ މާއްދާ (2-60) ގެ (ހ) ގައި ބުނަނީ މި ޤާނޫނުގައި ބަޔާންކުރާ ޓެރަރިޒަމްގެ ޢަމަލެއް ހިންގަން އުޅޭކަމުގެ އެއްވެސް މަޢުލޫމާތެއް އެއްވެސް ފަރާތަކަށް ލިބުމަށްފަހު، ކަމާބެހޭ ދައުލަތުގެ އިދާރާއަކާ އެ މަޢުލޫމާތު ޙިއްޞާކުރުމުގެ ފުރުޞަތުއޮވެ، އެ މަޢުލޫމާތު ޤަޞްދުގައި ޙިއްޞާނުކޮށް ސިއްރުކުރުމަކީ ކުށެކެވެ.

އަދި މި މާއްދާގެ (ށ) ގައި ބުނަނީ މި މާއްދާގެ (ހ) ގައި ބަޔާންކޮށްފައިވާ ކުށެއް ކޮށްފި މީހެއްގެ އަދަބަކީ 5 (ފަހެއް) އަހަރާއި 7 (ހަތެއް) އަހަރާ ދެމެދުގެ މުއްދަތަކަށް ޖަލަށްލުމެވެ.

ޕީއެންސީ ޖަލްސާގައި ނިހާދު އެމްޑީޕީއާއި ގުޅުވައި ދެއްކި ވާހަކައާއި ގުޅިގެން އޭނާ ވަނީ ސަސްޕެންޑްކޮށްފައެވެ.

މީގެ އިތުރުން އެމްޑީޕީން ވަނީ އެކަން ކުށްވެރިކޮށްފައެވެ. އެމްޑީޕީން ބުނެފައިވަނީ ދިވެހިރާއްޖޭގެ ޓޫރިޒަމް އިންޑަސްޓްރީއަށް އަމާޒުކޮށް ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން ޓެރަރިސްޓު ހަމަލާއެއް ދޭން އުޅޭ ކަމަށް ބުނެ ހޯމަ ދުވަހުގެ ރޭ ބޭއްވި ޕީއެންސީ ހަރުގެ ޖަލްސާގައި ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ދެއްކި ދޮގު ވާހަކަތައް އެންމެ ހަރުކަށި އިބާރާތުން ކުށްވެރި ކުރާ ކަމަށެވެ.

މިއީ ޓޫރިޒަމް މިނިސްޓްރީގެ ސްޓޭޓް މިނިސްޓަރެއްގެ މަގާމުގައި ހުންނެވި ބޭފުޅަކު އެއްވެސް ހާލެއްގައި ކޮށްގެން ނުވާނެ ފަދަ ސީރިއަސް ތުހުމަތުތަކެއް ކަމަށް ވެސް އެ ބަޔާނުގައި ފާހަގަކޮށްފައިވެއެވެ. މީގެ އިތުރުން ވެރިކަން ކުރާ ޕާޓީން މިފަދަ ހަގީގަތާ ހިލާފު ތުހުމަތުތައް ކުރަމުން ދިޔުމަކީ ފޫނުބެއްދޭ ވަރުގެ ގެއްލުންތަކަކާ ރާއްޖޭގެ ޓޫރިޒަމް އިންޑަސްޓްރީ ކުރިމަތިލާން ޖެހިދާނެ ކަމެއް ކަމަށް ޤަބޫލު ކުރާ ކަމަށް ވެސް އެމްޑީޕީން ވަނީ ބުނެފައެވެ.

ނިހާދު ހަރުގޭގައި ދެއްކެވި ވާހަކައާއި ގުޅިގެން ވަނީ މައާފަށްވެސް އެދިފައެވެ. އެކްސްގައި ކުރެއްވި ޕޯސްޓެއްގައި ނިހާދު ވިދާޅުވީ އޭނާ ދެއްކި ވާހަކައެއް ދެއްކީ މުޅި ގައުމު، އެ އިންޑަސްޓްރީއަކަށް ބަރޯސާވާ އިންޑަސްޓްރީގެ ދިފާއުގައި ކަމަށެވެ. އަދި އެ ވާހަކަ ގެނެސްދިނުމުގައި ބަހުރުވައިން ނުބައި މާނައެއް ނެގިފައިވާނަމަ އެކަމަށް މައާފަށް އެދޭ ކަމަށެވެ.