ފެނަކައަށް އާ ޗީފް ފައިނޭންޝިއަލް އޮފިސަރެއް އައްޔަނުކޮށްފި

ފެނަކަ ކޯޕަރޭޝަން ލިމިޓެޑުގެ ޗީފް ފައިނޭންޝިއަލް އޮފިސަރު (ސީއެފްއޯ) ގެ މަގާމަށް އާ ބޭފުޅަކު އައްޔަނުކޮށްފި އެވެ.

ފެނަކައިގެ ސީއެފްއޯގެ މަގާމަށް ހޯމަ ދުވަހު އައްޔަނު ކޮށްފައި ވަނީ މުހައްމަދު ޖިހާދު އެވެ.

ޖިހާދު ސީއެފްއޯގެ މަގާމަށް އައްޔަނުކުރިކަން ހާމަކޮށް ފެނަކައިން އެކްސްގައި ކުރި ޕޯސްޓެއްގައި ވަނީ އޭނާއަށް މަރުހަބާ ކިޔައިފަ އެވެ.

ޖިހާދުއަކީ ފެނަކައިގެ ޗީފް ރިސޯސް އޮފިސަރު (ސީއާރްއޯ) ގެ މަގާމުގައި ހުންނެވި ބޭފުޅާ އެވެ. ފެނަކައިގެ ޕްރޮޖެކްޓްސް ޑިޕާޓްމެންޓާއި ޕްރޮކިއުމެންޓް ޑިޕާޓްމެންޓުގެ އިތުރުން ލޮޖިސްޓިކްސް ޑިޕާޓްމެންޓު އަދި ރިޕެއާ އެންޑް މެއިންޓެނެންސްގެ އެންމެހައި ކަންކަން ހިންގަމުން ދިޔައީ އޭނާގެ ބެލުމުގެ ދަށުންނެވެ. ނަމަވެސް އެ މަގާމުން އޭނާ ވަކިކުރި ކަމެއް އަދި ނޭނގެ އެވެ.

ފެނަކައިގެ ސީއެފްއޯގެ މަގާމުގައި މީގެ ކުރިން ހުންނެވީ އަބްދުالله ވަހީދު އެވެ. އޭނާ އެ މަގާމުން އިސްތިއުފާ ދެއްވީ ހޯމަ ދުވަހުގަ އެވެ.

ވަހީދު ސީއެފްއޯގެ މަގާމުން އިސްތިއުފާ ދެއްވީ އޭނާ ވިދާޅުވި ގޮތުގައި، ސީއެފްއޯގެ މަގާމުން ޗީފް ލެވެލްގެ އެހެން މަގާމަކަށް އޭނާ ބަދަލުކުރުމުގެ މަޝްވަރާތަކެއް ކުރާތީ އެކަމަށް އެއްބާރުލުން ދިނުމަށެވެ. އެހެން ނަމަވެސް ފެނަކައިގެ ސީއެފްއޯގެ މަގާމު ބަދަލު ކޮށްފައި މިވަނީ ކީއްވެ ކަމެއް އެ ކުންފުނިން ހާމައެއް ނުކުރެ އެވެ.

ސީއެފްއޯގެ މަގާމަކީ އެ ކުންފުނީގެ މާލީ އެންމެހައި ކަންކަން ބެލެހެއްޓުމުގެ އެންމެ އިސް ފަރާތެވެ. ކުންފުނީގެ ޗެކުތަކުގައި ސޮއި ކުރުމާއި އެ ނޫން ވެސް ކުންފުނީގެ މާލީ ކަންކަމާ ގުޅޭ ހުރިހާ ކަމެއް ބެލެހެއްޓުމެވެ.