ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ރަސްމީ ހަރުގޭގައި އޮތް ޖަލްސާއެއްގައި، އެ ޕާޓީގެ ޕޯޑިއަމް ދޮށުގައި ހުންނަވައި ޢަބްދުއް ރަޙީމް ޢަބްދުﷲ (އަދުރޭ) ވިދާޅުވީތީ އަޑު އެހީމެވެ. ރާއްޖޭގެ ސިޔާސީ މަސްރަހުގައި، ސިޔާސީ ކުޅިބައި އަތުރާލަން އެމަނިކުފާނާ އެއްވަރުގެ ބޭފުޅެއް ނުހުންނާނެ ކަމަށެވެ. އެމަނިކުފާނުގެ މޮޅުކަމާއި، ވިސްނުންތޫނު ކަމަށާއި އަދި ކުޅިބައި އަތުރާލެއް ފުރިހަމަ ކަމަކީ، ރައީސުލްޖުމްހޫރިއްޔާ ކަމުގެ މަޤާމަށް ޑޮކްޓަރު މުޙައްމަދު މުޢިއްޒު ގެނެސް "ލެއްވުން" ކަމަށް ވެސް ވިދާޅުވީތީ އަޑު އެހީމެވެ.

އެކަމާ ދެބަސްވާކަށް ނެތީމެވެ. އަދުރޭ އަކީ ރާއްޖޭގެ ސިޔާސީ މަސްރަހަށް ފަރިތަ ނަމެކެވެ. މޫނެކެވެ. އަޑެކެވެ. ކުރީގެ ރައީސް އަލްއުސްތާޛް މައުމޫން ޢަބްދުލް ޤައްޔޫމް އިސްވެ ހުންނަވައި އުފެއްދެވި، ދިވެހި ރައްޔިތުންގެ ޕާޓީ (ޑީއާރުޕީ)ގެ ޕޯޑިއަމް އިން ފެށިގެން އަދުރޭ ފެނެ އެވެ. އޭގެ ފަހުން ޑީއާރުޕީ ދެބައިވެގެން ދިޔުމާއެކު، ރައީސް މައުމޫން އުފެއްދެވި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ޕޯޑިއަމް އިން ވެސް އަދުރޭ ފެނެ އެވެ.

ޕީޕީއެމް ދެބައިވެގެން ދިޔަ ދަނޑިވަޅުގައި އަދުރޭ ހުންނެވީ، ރައީސް މައުމޫންގެ އެއްބަފާ ކޮއްކޯފުޅު، ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމުގެ ފަހަތްޕުޅުގަ އެވެ. ރައީސް ޔާމީނަށް ޕީޕީއެމް ގެއްލިދާނެ ކަމުގެ ބިރަށް އުފެއްދި ޕާޓީ އަކީ، ޕީއެންސީ އެވެ. އެ ޕާޓީގެ ރައީސްކަމަށް ވަޑައިގެންނެވީ ވެސް އަދުރޭ އެވެ. އޭގެ ދަހުން ދާދި މިދާކަށް ދުވަހާ ހަމައަށް އެ ދެ ޕާޓީ ދިޔައީ އެކުގައި މަސައްކަތް ކުރަމުންނެވެ.

ރައްޔިތުންގެ މަޖިލީހުގެ ރައީސްކަމުގެ މަގާމުގައި މިވަގުތު ހުންނެވި އަަދުރޭ އަކީ، މީގެ ކުރިން ވެސް ދެ ދައުރެއްގައި ލ.ފޮނަދޫ ދާއިރާގެ މެމްބަރުކަން ކުރެއްވިި ބޭފުޅެވެ. ޑީއާރުޕީ އާއި ޕީޕީއެމް އަދި ޕީއެންސީގައި ވެސް ވަރަށް އިސްކޮށް އުޅުއްވި ބޭފުޅެކެވެ. ރައީސް ޔާމީނަށް ޖަލު ޙުކުމެއް ތަންފީޒު ކުރަން ޖެހުނު ދަނޑިވަޅުގައި، އިދިކޮޅު ޕާޓީތައް ހިންގެވީ އަދުރޭގެ ބެލުމުގެ ދަށުންނެވެ.

އިދިކޮޅު ފަރާތްތަކަށް 2023 ވަނަ އަހަރުގެ ރިޔާސީ އިންތިޚާބު ކާމިޔާބުވީ ފަހުން، ކުރީގެ ރައީސް ޔާމީނާއި، ރައީސް މުޢިއްޒުގެ ގުޅުން ގޯސްވެ، އެކަން ފަޅައިގެން ދިޔަ އެވެ. އެންމެ ފަހުން ރައީސް ޔާމީން ވެސް ޕާޓީން ވަކިވެ ވަޑައިގެން، އެހެން ސިޔާސީ ޕާޓީއެއް އުފެއްދެވި އެވެ. އެ ދަނޑިވަޅުގައި އަދުރޭ އެރުއްވީ ރައީސް މުޢިއްޒުގެ ފަހަތްޕުޅަށެވެ. ރައީސް މުޢިއްޒު އަށް ވެރިކަން ހޯއްދަވައި ދެއްވަން އަދުރޭ ކޮއްޓެވި މަގުތަކާއި، އަދުރޭގެ ސިކުނޑި ގޭނުމުގެ ބަދަލެއްގެ ގޮތުގައި ރައީސް މުޢިއްޒުގެ ސީނިއާ ވަޒީރުކަން އަދުރޭ އަށް ދެއްވި އެވެ.

އޭގެ ފަހުން މަޖިލިސް އިންތިޚާބުގައި ސަރުކާރަށް ލިބުނު ބޮޑު މެޖޯރިޓީ އާއެކު، މަޖިލިސް ރައީސްކަން ވެސް ދެއްވީ އަދުރޭ އަށެވެ. ސިޔާސީ މައިދާނުގައި ރައީސް މުޢިއްޒުގެ ރޯލު މޮޑެލް އަކީ އަދުރޭ ކަމަށް އެމަނިކުފާނު ވިދާޅުވި އެވެ. ކުރިން މި ބުނި ކުޅިބައިގެ ވާހަކަ އަދުރޭ ދެއްކެވީ ރައީސް ޔާމީނާ ޖެހުނު މައްސަލައިގެ ތެރޭގަ އެވެ. އަމިއްލަ މޭފުޅުގައި އަތް ޖައްސަަަވައި، އިންތިހާ އަށް ފަޚުރުވެރިކަމާ އެކު އެ ވިދާޅުވީ ކުޑަ ވާހަކައެއް ނޫނެވެ.

އަދުރޭ އެ ވިދާޅުވާ ކުޅިބައި އަތުރާލުމުގެ މޮޅުކަން ދައްކަން ޖެހޭ ދަނޑިވަޅަކީ މިއީތާ އެވެ! ފަތުރުވެރިކަމާ ބެހޭ ވަޒީރުކަމުގައި ހުންނެވި އަދުރޭގެ ދަރިކަލުން އިބްރާހީމް ފައިޞަލް މަގާމުން ވަކި ކުރުމާއެކު، ރައީސް މުޢިއްޒުއާ ދެމެދު އޮތް ގުޅުން ގޯސްވެފައިވާކަން ހާމަ ކުރީ އަދުރޭ އެވެ. ވެރިކަން ފެށުނުއިރު އޮތް ގާތް ގުޅުން އޮތް ނަމަ، އެ ނިންމުން ރައީސް މުޢިއްޒު ނުނިންމަވާނެ ކަމަށް އަދުރޭ ވިދާޅުވި އެވެ.

އަދުރޭގެ އެ ވާހަކަތަކާއެކު އަދުރޭ އަށް ވެސް ޕްރެޝަރު ބޮޑުވެފައިވާ ކަމަށް ތަޖުރިބާކާރުން ބުނެ އެވެ. އަދުރޭ އަކީ ދައުލަތުގެ އެއް ބާރުގެ ވެރިޔާ ކަމަށްވެފައި، އެ މަގާމުން އަދުރޭ "ބޭރުކޮށްލުމުގެ" ފުރިހަމަ އާރާއި ބާރު ރައީސް މުޢިއްޒުގެ އަތްޕުޅުގައި މިއަދު އެބަ އޮތެވެ. އެކަން ހުދު އަދުރޭ ވެސް ޤަބޫލު ކުރައްވާނެ އެވެ. އެ ނިންމުން ނިންމައި، އެކަން ރައީސަށް އެރުވީ ވެސް އަދުރޭމެންގެ އަމިއްލަ އަތްޕުޅުންނެވެ.

މަޖިލިސް ރައީސްކަމުން އަދުރޭ ބޭރުކޮށްލަފާނެ ކަމުގެ ބިރަށް މިވަގުތު އަދުރޭ މަޑުމަޑުން ހުންނެވި ކަމަށް ވެސް ތަޖުރިބާކާރުން އަންނަނީ ބުނަމުންނެވެ. އޭޣެ ބަދަލުގައި އަދުރޭ ބޭނުން ވަނީ "ޕީސް ހައްދަވައި" ރައީސް މުޢިއްޒުއާ އެއްގަލަށް އަރުއްވާށެވެ. ސިޔާސީ ގޮތުން ކުޅިބައި އަތުރާލަން އަދުރޭ މޮޅުކަމަށް ވިދާޅުވާއިރު، މިއީ ހަގީގަތުގައި އެ މޮޅުކަން ދައްކަންވީ ވަގުތު ކަމަށް ވެސް ތަޖުރިބާކާރުން ބުނެ އެވެ.

މިވަގުތު އަދުރޭގެ އެ ހުރީ "ސައި"ވެފަ އެވެ. ރައީސް މުޢިއްޒު ޖެއްސެވި އެންމެ ކުޅިއަކުންނެވެ. އެ މަޅިން ސަލާމަތްވުމަށް، އަދުރޭ ވަރަށް ބޮޑަށް ވިސްނަން ޖެހޭނެ އެވެ. މިކަމުގައި ވާނީ ކޮންމެ ވެސް އެއް ގޮތެކެވެ. ރައީސް މުޢިއްޒު ޖައްސަވާ ބެރަށް އަދުރޭ މިފަހަރު ނައްޓަވަން ޖެހޭނެ އެވެ. ނޫނީ މަޖިލީހުގެ ރައީސްކަން އަދި މެމްބަރުކަން ވެސް ގެއްލުމުގެ ފުރުސަތު ވަރަށް ބޮޑެވެ.