އެމްޑީޕީން ރިސޯޓަކަށް އަރަން އުޅޭކަމަށް ތުހުމަތު ކުރުން - ޕީއެންސީން ބުނީ ސިޔާސީ ޕާޓީއަކުން ވެސް ޖަމިއްޔާއަކުން ވެސް އެފަދަ ކަމެއް ނުކުރާނެ ކަމަށް
24 ޑިސެމްބަރު 2024 | އަންގާރަ 10:22ޕީއެންސީން ބުނީ ސިޔާސީ ޕާޓީތަކާއި ޖަމިއްޔާތަކުން މަސައްކަތް ކުރާނީ ޤާނޫނީ އިމުގެ ތެރޭގައި ކަމަށް ޤަބޫލުކުރާ ކަމަށް
ޕީއެންސީގެ ކުރީގެ ނޫސްވެރިންގެ ބައްދަލުވުމެއްގެ ތެރެއިން
އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ން ޓޫރިޒަމް ފުނޑާލަން، ޓެރަރިސްޓް ހަމަލާއެއް ދޭން އުޅޭ ކަމަށް ތުހުމަތު ކޮށް ޕީއެންސީން ހޯމަ ދުވަހުގެ ރޭ ބޭއްވި، ޖަލްސާގައި ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ވާހަކަދައްކަވާފައި ވަނިކޮށް ރާއްޖޭގެ ސިޔާސީ ޕާޓީއަކުން ވެސް މަދަނީ ޖަމިއްޔާއަކުން ވެސް އެފަދަ ކަމެއް ނުކުރާނެ ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބުނެފިއެވެ.
ޕީއެންސީން އެފަދައިން ބުނީ އެ ޕާޓީން އަންގާރަ ދުވަހު ނެރުނު ނޫސްބަޔާނެއްގައެވެ.
ސަރުކާރުގެ އިސްމަގާމެއްގައި ހުންނަވައިގެން އެފަދަ ވާހަކަތަކެއް ދެއްކެވި މައްސަލައާއި ގުޅިގެން ނިހާދު ވަނީ ސަސްޕެންޑްކޮށްފައެވެ.
އެ ބަޔާނުގައި ބުނެފައި ވަނީ އެ ޕާޓީން ދެކޭ ގޮތުގައި ރާއްޖޭގައި ރަޖިސްޓްރީކޮށްގެން ހިންގާ އެއްވެސް ސިޔާސީ ޕާޓީއަކުން އެފަދަ ކަމެއް ކޮށްފާނެ ކަމަށް ޤަބޫލު ނުކުރާ ކަމަށެވެ. ހަމައެހެންމެ މަދަނީ ޖަމިއްޔާއަކުން ވެސް އެފަދަ ކަމެއް ކޮށްފާނެ ކަމަށް ޤަބޫލު ނުކުރާ ކަަމަށް ވަނީ ބުނެފައެވެ. އެ ޕާޓީން ބުނީ ރާއްޖޭގެ އިގްތިސާދަށް ފޫނުބެއްދޭ ވަރުގެ ގެއްލުމެއް ލިބިދާނެ ކަމެއް އެ ފަރާތްތަކުން ނުހިންގާނެ ކަމަށެވެ.
ދިވެހިރާއްޖެއަކީ މި ޤައުމަށް ޒިޔާރަތްކުރާ ފަތުރުވެރިންނަށް ރައްކާތެރި މަންޒިލެއްގެ ގޮތުގައި ދެމެހެއްޓުމަކީ ސަރުކާރުން އަބަދުވެސް މަސައްކަތް ކުރާ ކަންތައް ކަމަށް އެ ބަޔާނުގައި ވަނީ ފާހަގަކޮށްފައެވެ. ހަމައެހެންމެ ފަތުރުވެރިކަމުގެ ސިނާއަތުގައި އިންވެސްޓްކޮށްފައިވާ މީހުންގެ އިންވެސްޓްމެންޓްތައް ރައްކާތެރިކޮށްދިނުމަށްޓަކާ އަދާކުރަން ޖެހޭ ޒިންމާ ފުރިހަމައަށް އަދާނެކަމުގެ އިތުބާރު އޮތް ކަމަށް ޕީއެންސީން ވަނީ ފާހަގަކޮށްފައެވެ.
ފަތުރުވެރިންނާއި އިންވެސްޓަރުންނށް ރައްކާތެރި އަދި ސުލްހަވެރި މަންޒިލެއްގެ ގޮތުގައި ރާއްޖެ ދެމެހެއްޓުމަށް ދައުލަތުގެ ހުރިހާ މުއައްސަސާއަކުން މަސައްކަތް ކުރާ ކަމަށް ފާހަގަކޮށް ޕީއެންސީން ވަނީ އެކަމަށް ޝުކުރު އަދާކޮށްފައެވެ. ކުރިއަށް އޮތްތަނުގައި ވެސް ސިޔާސީ ޕާޓީތަކާއި މަދަނީ ޖަމިއްޔާތައް އަދި ވަކި ވަކި ފަރުދުންވެސް ފަތުރުވެރިކަމަށް އަދި ރާއްޖޭގެ ޝުހުރަތަށް އަސަރުކުރާނެ ކަމެއް ނުކުރުމަށް ޕީއެންސީން ވަނީ އިލްތިމާސްކޮށްފައެވެ.
ވެރިކަން ކުރާ މައި ޕާޓީ، ޕީއެންސީން ހ. ވެޔޮވިލާ ގައި ހޯމަ ދުވަހުގެ ރޭ ބޭއްވި ޖަގަހަ ޖަލްސާގައި ވާހަކަ ދައްކަވަމުން ރައްޔިތުންގެ މަޖިލީހުގެ ފޭދު ދާއިރާގެ ކުރީގެ މެންބަރު ނިހާދު ވިދާޅުވީ އަންނަ ބުރާސްފަތި ދުވަހަށް ރާއްޖެއަށް މި އަހަރު ޒިޔާރަތްކުރާ ފަތުރުވެރިންގެ އަދަދު 2 މިލިއަނާ ހަމަކުރަން މަސައްކަތް ކުރަމުންދާ މި ދަނޑިވަޅުގައި ފަތުރުވެރިކަމަށް ހުރަސް އެޅުމަށް އެމްޑީޕީ އިސްވެ އޮވެ މަސައްކަތްތަކެއް ކުރަމުންދާ ކަމަށެވެ.
އެގޮތުން މާލެ ކައިރީގައި އެއް ފަޅުތެރެއެއްގައި އޮތް ތިން ރިސޯޓެއްގައި އެމްޑީޕީން ބައްދަލުވުމެއް ބާއްވަން އެދުމުން މި ދުވަސްކޮޅު ރިސޯޓް ފުލްވެފައިވާތީ ނުބޭއްވޭނެ ކަމަށް އެންގުމުން ހުއްދަ ނުލިބުނަސް އެ ރިސޯޓަށް އެމްޑީޕީން އަރާނެ ކަމުގެ އިންޒާރު ދީފައިވާ ކަމަށް ނިހާދު ތުހުމަތުކުރެއްވި އެވެ.
ނިހާދުގެ އެ ވާހަކަތައް ދޮގުކޮށް އެމްޑީޕީން ވަނީ އެ މައްސަލަ ބެލުމަށް ގޮވާލާފައެވެ. ނަމަވެސް އެ މައްސަލަ ބަލާކަން އަދި ނުބަލާކަން ވެސް ފުލުހުން މިހާތަނަށް އައި އިރު ސާފުކޮށްދީފައެއް ނުވެއެވެ.
ޕީއެންސީން ބުނީ ސިޔާސީ ޕާޓީތަކާއި ޖަމިއްޔާތަކުން މަސައްކަތް ކުރާނީ ޤާނޫނީ އިމުގެ ތެރޭގައި ކަމަށް ޤަބޫލުކުރާ ކަމަށެވެ.
