ކުންފުނީގެ ހިންގުމުގެ ހަރަދުން 160 މިލިއަން ރުފިޔާ ކުޑަކުރެވިފައިވާ ކަމަށް ފެނަކައިން ބުނެފި
ކުންފުންޏަށް ލިބެންޖެހޭ ފައިސާ ހޯދުމަށް ދަނީ މަސައްކަތް ކުރަމުން
ފެނަކަ ކޯޕްރޭޝަން ލިމިޓެޑް
ފާއިތުވި އަހަރެއްހާ ދުވަހުގެ ތެރޭގައި ކުރެވުނު މަސައްކަތްތަކުން ކުރީ އަހަރާއި އަޅާބަލާއިރު، ކުންފުނީގެ ހިންގުމުގެ ހަރަދުން 160 މިލިއަން ރުފިޔާ ކުޑަކުރެވިފައިވާ ކަމަށް ފެނަކަ ކޯޕްރޭޝަން ލިމިޓެޑުން ބުނެފިއެވެ.
ފާއިތުވި އެއް އަހަރުގެ ތެރޭގައި، ފެނަކައިގެ ޚިދުމަތްތަކާއި ހިންގުން ހަރުދަނާ ކުރުމަށް ކުރެވުނު މަސައްކަތްތަކާއި، ކުރިއަށް ހާސިލް ކުރުމަށް އަމާޒު ހިފާފައިވާ ކަންކަމަށް އަލިއަޅުވާލާ އެކުލަވާލެވުނު ''ފާއިތުވި 1 އަހަރު'' ފޮތުގައި ބުނެފައިވަނީ އައު މެނޭޖްމަންޓުން ކުންފުންޏާއި ހަވާލުވިއިރު، ކުންފުނީގެ ދަރަނީގެ ގޮތުގައި 4 ބިލިޔަނަށްވުރެ ގިނަ ރުފިޔާ ރިކޯޑު ކުރެވިފައިވާ ކަމަށެވެ. މިއީ ކުންފުންޏަށް ލިބޭ އާމްދަނީއާ ނުބައްދަލު އަދަދެއް ކަމަށާއި، ވުމާއެކު ކުންފުނީގެ މާލިއްޔަތަށާއި، ހިންގުމަށް ބޮޑެތި ގޮންޖެހުންތަކެއް ކުރިމަތިވި ކަމަށެވެ.
ކުންފުނީގެ އާމްދަނީއަކީ ކުންފުނިން ދޭ އަސާސީ ޚިދުމަތްތަކަށް ލިބޭ އަގު ކަމަށްވާއިރު، މި ޚިދުމަތްތަކަކީ ރައްޔިތުންނަށް ހެޔޮ އަގެއްގައި ދިނުމަށްޓަކައި ޓެރިފް ކަނޑައަޅައި، ކޮންޓްރޯލް އަގެއްގައި ފޯރުކޮށްދޭ ޚިދުމަތްތަކެއްކަން ފާހަގަކޮށް ފެނަކައިން ބުނީ އާމްދަނީ އިތުރު ކުރުމަށް ކުންފުނީގައި އޮތް ފުރުސަތުތައް ވަކި އިމެއްގެ ތެރޭގައި ހިފަހައްޓަންޖެހޭ ކަމަށެވެ. މާލީ ހާލަތު ރަނގަޅު ކުރުމަށް އޮތް މަގަކީ ވެވެން އޮތް މިންވަރަކުން ހަރަދު ކުޑަކުރުމާއި، ކުންފުންޏަށް ލިބެންޖެހޭ ފައިސާ ހޯދުމަށް މަސައްކަތް ކުރުން ކަމަށް ފެނަކައިން ބުނެފައިވެއެވެ.
އެގޮތުން ފާއިތުވި އަހަރެއްހާ ދުވަހުގެ ތެރޭގައި ކުރެވުނު މަސައްކަތްތަކުން އޭގެ ކުރީ އަހަރާއި އަޅާބަލާއިރު، ކުންފުނީގެ ހިންގުމުގެ ހަރަދުން 160 މިލިއަން ރުފިޔާ ކުޑަކުރެވިފައިވާ ކަމަށް ފެނަކައިން ބުނެއެވެ.
ފެނަކައިން ބުނީ މިދިޔަ އަހަރުގެ ނޮވެންބަރު މަހުގެ ނިޔަލަށް ދައްކަންޖެހިފައި އޮތް 1.3 ބިލިއަން ރުފިޔާގެ ލޯނުގެ ތެރެއިން، 300 މިލިއަން ރުފިޔާ ފާއިތުވި އަހަރުގެ ތެރޭގައި ދައްކާފައިވާ ކަމަށެވެ. އަދި 1،094 ވެންޑަރުންނަށް ދައްކަންޖެހިފައި އޮތް 3.4 ބިލިއަން ރުފިޔާގެ ތެރެއިން 600 މިލިއަން ރުފިޔާ ދައްކާފައިވާ ކަމަށް ބުނެފައިވެއެވެ. އޭގެ ތެރޭގައި 281 ވެންޑަރަކަށް އެއްކޮށް ފައިސާ ދައްކާ ވަނީ ދައްކާފައެވެ.
މީގެ އިތުރުން ފެނަކައިން ބުނީ މިހަރަދުތައް ކުޑަކުރެވިފައިވަނީ ޕްރޮކިއުމަންޓް އުސޫލު ހަރުދަނާކުރެވި، މުދަލާއި ޚިދުމަތްތަކުގެ އަގުތައް ހޯދުމުގައި ކުންފުނިން އެޅި ފިޔަވަޅުތަކުގެ ސަބަބުން ކަމަށެވެ. ކުންފުނީގެ ދަރަނީގެ ތެރޭގައި މައިގަނޑު ގޮތެއްގައި ހިމެނެނީ މުދަލާއި، ޚިދުމަތް ފޯރުކޮށްދީފައިވާ ފަރާތްތަކަށް ދައްކަންޖެހޭ ފައިސާއާއި ލޯނުތައް އަދާކުރުމަށް ދައްކަންޖެހޭ ފައިސާ ކަމަށް ފެނަކައިން ބުނެއެވެ.
ފެނަކައިން ބުނީ ހަރަދު ކުޑަކުރުމަށް އެޅުނު މުހިންމު ފިޔަވަޅުތަކާއެކު ކުންފުނީގެ ހަރަދު ދަރަނި އަދާކުރުމުގައި މުހިންމު ކުރިއެރުންތަކެއް ހޯދިފައިވާ ކަމަށެވެ.
ނަމަވެސް ޚިދުމަތްތައް ދެމުން މިދަރަނި އަދާކުރުމަކީ މިހާރު ކުންފުންޏަށް ދިމާވެފައިވާ އެންމެ ބޮޑު ގޮންޖެހުން ކަމަށާއި، މިއަަހަރުގެ އާމްދަނީގެ ތެރެއިން 40 އިންސައްތަ ރުފިޔާ ހޭދަކުރެވިފައިވަނީ ދަރަނީ އަދާކުރުމަށް ކަމަށެވެ.
އެހެންކަމުން ކުންފުނި ހަމަމަގަށް އެޅުވުމަށް ދަރަނި ރިސްޓްރަކްޗަރކުރުމާއި، މާލީ އެހީތެރިކަން ބޭނުންވާކަމަށް ފެނަކައިން ބުނެއެވެ.
