އިކޮނޮމިކް ކްރައިމް ޑިޕާޓްމެންޓްގެ ހެޑް ރަޖުނީ ޝުއައިބު މަސައްކަތުން އެކަހެރި ކޮށްފި

އިކޮނޮމިކް ކްރައިމް ޑިޕާޓްމެންޓްގެ ހެޑް ސުޕްރިންޓެންޑެންޓު އޮފް ޕޮލިސް ރަޖުނީ ޝުއައިބު މަސައްކަތުން ހޮނިހިރު ދުވަހު އެކަހެރިކޮށްފި އެވެ.

އޭނާ މަސްއޫލިއްޔަތު ތަކުން އެކަހެރި ކުރީ އުސޫލުން ބޭރުން ވިނަރެސް ފްލެޓް ހޯދި ކަމަށް ތުހުމަތުވާ ގޮތައް ސޯޝަލް މީޑީއާ ގައި މައުލޫމާތު ދައުރުވާން ފެށުމާ ގުޅިގެންނެވެ.

ހޮނިހިރު ދުވަހުގެ ރޭ ފުލުހުން ތަރުޖަމާން އަހްމަދު ޝިފާން އެކްސްގައި ކުރެއްވި ޕޯސްޓެއްގައި ވިދާޅުވީ، ރަޖުނީ ކުރައްވަމުން ގެންދެވި މަސައްކަތްތަކުން ވަގުތީ ގޮތުން އެކަހެރި ކުރެވިފައިވާ ކަމަށެވެ.

"ފުލުހުންގެ ޚިދުމަތުގެ އިކޮނޮމިކް ކްރައިމް އިންވެސްޓިގޭޝަންގެ ހެޑްގެ މަގާމުގައި މަސައްކަތްކުރައްވަމުން ގެންދަވާ ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބު ކުރައްވަމުން ގެންދެވި މަސައްކަތްތައް ވަގުތީގޮތުން އެހެން ފަރާތަކާއި ހަވާލުކުރެވިފައިވާ ވާހަކަ ދަންނަވަމެވެ." ޝިފާން ވިދާޅުވެފައިވެއެވެ.

މި ނިންމުން ނިންމީ އިކޮނޮމިކް ކްރައިމް އިންވެސްޓިގޭޝަންސްގައި މި ވަގުތު ކުރަމުން ގެންދާ ބިންވެރިޔާ އަދި ގެދޮރުވެރިޔާ ސްކީމާ ގުޅޭ ތަހުގީގުގެ ކްރެޑިބިލިޓީ ހިފެހެއްޓުމަށާއި އެ ތަހުގީގަށް އެއްވެސް ކަމަކުން ނުރަނގަޅު އަސަރެއް ނުފޯރާނެކަން ޔަގީން ކުރުމަށް ކަމަށް ވެސް ޝިފާން ވިދާޅުވިއެވެ.

"މި ނިންމުމަކީ އެސްޕީ ރަޖުނީ ޝުއައިބާ ގުޅޭ ގޮތުން މި ހިދުމަތުން ޔަގީންކުރަމުންދާ ކަންކަމުގައި، އެ ފަރާތުން އެއްވެސް ނުރަނގަޅު އަމަލެއް ހިންގާފައިވާކަން މިހާތަނަށް ފާހަގަކުރެވިގެން ނިންމި ނިންމުމެއް ނޫން ކަމުގައި ވެސް ދަންނަވަމެވެ،" ޝިފާން ވިދާޅުވި އެވެ.

ނުހައްގުން ބަޔަކަށް ހުޅުމާލޭން ގޯތި ދިން މައްސަލައިގެ ތަހުގީގާ ބެހޭ މައުލޫމާތު ދިނުމަށް ބުރާސްފަތި ދުވަހުގެ ރޭ ފުލުހުން ބޭއްވި ނޫސް ކޮންފަރެންސް ގައި ރަޖުނީ ބައިވެރިވެފައިވެއެވެ.

ވިނަރެސް ފްލެޓް ދިނުމުގައި ނުހައްގުން އެކި ފަރާތްތަކަށް ފްލެޓް ދީފައިވާ ކަމަށާއި، ބައެއް ފަރާތްތަކަށް ރިޝްވަތުގެ ގޮތުގައި ފައިސާ ނަގައިގެން ފްލެޓް ހަމަ ޖައްސާދީފައިވާ ކަމުގެ ވާހަކަތައް ވަނީ އާންމު ވެފައެވެ. ބައެއް ފަރާތްތަކުން ފޭކު ލިޔުން ހުށަހަޅައިގެން ފްލެޓް ހޯދި ކަމަށާއި އޭގެ ތެރޭގައި ފައިސާ ނުދައްކާ ފޭކް ސްލިޕް ހަދައިގެން ފްލެޓް ހޯދި ކަމަށްވެސް ވެއެވެ.