މެމްބަރު ޝުޖާއުގެ ޚިޔާނަތުގެ ރިޕޯޓު ލީކުވިތާ 24 ގަޑިއިރު ނުވަނީސް، "އެމްއެމްއޭ ހިންގުން ހަރުދަނާ ކުރަން" އެފްއައިޔޫގެ ވެރިޔާ ބަދަލު ކޮށްފި

ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އިބްރާހީމް ޝުޖާއު އަށް ބޮޑެތި ކޮރަޕްޝަންގެ ތުހުމަތުތަކެއްކޮށް، މަރުކަޒީ ބޭންކު (އެމްއެމްއޭ) ގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ)ގެ ރިޕޯޓު ލީކުވިތާ 24 ގަޑިއިރު ނުވަނީސް، އެ ޔުނިޓުގެ ވެރިޔަކަށް ހުންނެވި ޢަބްދުﷲ އަޝްރަފްގެ މަޤާމު ބަދަލު ކޮށްފި އެވެ.

މި މުއާމަލާތް ހިނގި ގޮތުގެ ތަފްސީލުތައް ހިމަނާފައި ވަނީ މަރުކަޒީ ބޭންކުގެ އެފްއައިޔޫ ތައްޔާރު ކޮށްފައިވާ "އެނޭލިސިސް ރިޕޯޓު" ގައެވެ. އެ ރިޕޯޓު ލީކު ކޮށްފައި ވަނީ، ސޯޝަލް މީޑިއާގައި ސަރުކާރުގެ ވައްކަމާއި ކޮރަޕްޝަންގެ މައްސަތައް ފަޅާ އަރުވަމުން އަންނަ "ޙަސަން ކުރުސީ" އެކައުންޓުންނެވެ.

އެ ރިޕޯޓުތައް ލީކު ކުރިތާ 24 ގަޑިއިރު ނުވަނީސް، އެފްއައިޔޫގެ ވެރިޔަކަށް ހުންނެވި އަޝްރަފްގެ މަގާމު މިހާރު ވަނީ ބަދަލު ކޮށްފަ އެވެ. މަރުކަޒީ ބޭންކުގެ މީޑިއާ އޮފިޝަލް އިބްރާހީމް ޒަހީން "ރާއްޖެ އެމްވީ" އަށް ވިދާޅުވީ އެފްއައިޔޫގެ ވެރިޔަަކަށް ހުންނެވި އަޝްރަފް ބަދަލު ކޮށްފައި ވަނީ ހެޑް އޮފް ރިސްކް އެންޑް ކޮމްޕަޔަލަންސް މަގާމަށް ކަމަށެވެ.

މީގެ އިތުރުން ޒަހީން ވިދާޅުވީ އަޝްރަފްގެ ބަދަލުގައި އެފްއައިޔޫގެ ވެރިޔާގެ މަގާމަށް ހަމަޖައްސާފައި ވަނީ އިސްމާއިލް ސާޖިދު އެވެ. އެއީ ކޮން ގޮތަކަށް ގެނައި ބަދަލެއްތޯ ސުވާލު ކުރުމުން ޒަހީން ވިދާޅުވީ، އެއީ މަރުކަޒީ ބޭންކުގެ ހިންގުން ހަރުދަނާ ކުރުމާއި، މަރުކަޒީ ބޭންކުގެ ސްޓްރަކްޗަރަލް ބަދަލެއް ކަމަށް ވެސް ޒަހީން ވިދާޅުވެފައިވެ އެވެ.

މަރުކަޒީ ބޭންކުގެ އައިޔޫއެފް ޔުނިޓަކީ މީ ލޯންޑަރިން އަދި ޓެރަރިޒަމް އަށް ފައިނޭސް ކުރުން ހުއްޓުވުމުގެ ޤާނޫނުގެ ދަށުން އުފައްދާފައިވާ ޔުނިޓެކެވެ.

އެފްއައިޔޫގެ ރިޕޯޓު ޙަސަން ކުރުސީ އެކައުންޓުން ލީކު ކޮށްފައިވާއިރު، ރައީސުލްޖުމްހޫރިއްޔާ ކަމުގެ މަގާމުގެ ހުވާ ޑޮކްޓަރު މުޙައްމަދު މުޢިއްޒު ކުރެއްވުމުގެ ރަސްމިއްޔާތުގެ އިވެންޓް މެނޭޖު ކުރުމަށް ސިފައިންގެ ކުންފުނި "ސިވެކް" އަށް ބިޑު ކުރުމެއް ނެތި ހަވާލުކުރީ، އެ ކުންފުނި މެދުވެރިކޮށް ބާރަށު ދާއިރާގެ މެމްބަރު ޝުޖާއުގެ އޮފިޝަލް އިވެންޓްސް ކުންފުންޏަށް ބޮޑު މަންފާ އެއް ދިނުމަށް ކަމަށް ފަޅާ އަރާފައިވެ އެވެ.