ގޯތި ވައްކަމުގެ ތަހުގީގުގައި ފުލުހުން އިންސާފުވެރި ވާނެ ކަމަށް ދެން ގަބޫލެއް ނުކުރަން: އެމްޑީޕީ

ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކު ގޯތި ލިބުނު ކަމަށް ދައްކަން ވެގެން ލިޔުންތަކެއް އުފެއްދި މައްސަލައިގައި ކުރިއަށް ގެންދާ ތަހުގީގުގައި ފުލުހުން އިންސާފުވެރި ވާނެކަމަށް ދެން ގަބޫލުނުކުރާ ކަމަށް ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން ބުނެފިއެވެ.

އެމްޑީޕީން މިހެން ބުނީ މިމައްސަލައިގެ މައުލޫމާތު ދިނުމަށް މިދިޔަ ބުރާސްފަތި ދުވަހުގެ ރޭ ފުލުހުން ބޭއްވި ނޫސްވެރިންގެ ބައްދަލުވުމުގައި މިހާރު ފެންމަތި ވެގެން އުޅޭ ގޯތިތަކުގެ މައްސަލައާއި ނިމިދިޔަ އެމްޑީޕީ ސަރުކާރާ ގުޅުވައިގެން ދެއްކި ވަހަކަ ތަކާ ހަވާލާދީ އެވެ.

އެމްޑީޕީގެ ފާޑުކިޔުން ފުލުހުންގެ ތަހުގީގަށް އަމާޒުވީ ފުލުހުން ބޭއްވި ނޫސްވެރިންގެ ބައްދަލުވުމުގައި ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކު ގޯތި ލިބުނު ކަމަށް ހަދައިގެން ލިޔުންތަކެއް އުފެއްދި މައްސަލައިގައި ތުހުމަތު ކުރެވޭ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު ފަޒީލް ރަޝީދު ތަހުގީގުގައި ދެއްކި ކަމަށް ބުނާ ވާހަކަތަކެއް އޭގެ ހަގީގަތް ނުބަލައި ސިޔާސީ ކުލަ ޖެހޭ ގޮތައް ފުލުހުން ހާމަކުރުމާ ގުޅިގެންނެވެ.

ފުލުހުންގެ މި ވާހަކަތަކާ ގުޅިގެން އެމްޑީޕީ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި، އެ ޕާޓީގެ ސްޕޯކްސްޕާސަން އަނަސް އަބްދުއްސައްތާރު ވިދާޅުވީ އެޗްޑީސީ ތެރޭގައި ފަޒުލް އިސްވެ ހިންގާފައިވާ ވައްކަމާއި ހިޔާނާތުގެ ބޮޑެތި މައްސަލަތަކަކީ ރައީސް މުއިއްޒަށް އެނގިވަޑައިނުގެން ހިންގާފައިވާ ކަންތައްތަކެއް ކަމަށް ގަބޫލުކުރަން ދަތި ކަމަށެވެ. އަނަސް އެހެން ވިދާޅުވީ އެޗްޑީސީގެ ޗެއާމަނަކަށް މިސަރުކާރުގައި ފުރަތަމަ އައްޔަންކުރެއްވި އަހްމަދު ޒުހޫރު، ރައީސް މުއިއްޒަށް އެޑްރެސް ކުރައްވާ މިއަހަރުގެ ޖުލައި އެއްވަނަ ދުވަހު ފޮނުއްވާފައިވާ ސިޓީއަކާ ހަވާލާދެއްވަ އެވެ.

އެހެން ނަމަވެސް، ސަރުކާރުންވެސް ނުވަތަ ފުލުހުންވެސް އޭގެ އެއްވެސް މައްސަލައެއް ކުރިން ބަލައިފައި ނުވާކަމަށާއި، މައްސަލަ ބަލާކަން ހާމަކޮށްފައި މި ވަނީ ހުޅުމާލެއިން ގޯތި ތަކެއް ވަގަށް ނެގި ކަން ސޯޝަލް މީޑިޔާގައި ފަޅާއަރުވާލުމުން ކަމަށެވެ.

މި ނޫސްވެރިންގެ މިބައްދަލުވުމުގައި، ހައުސިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ ހައުސިން ޑިވެލޮޕްމަންޓް ކޯޕްރޭޝަންގެ (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ، ފަޒީލް ރަޝީދަށް އުސޫލުން ބޭރުން، ހުޅުމާލެއިން ގޯއްޗެއް ދިނުމަށް ޓަކައި، ތައްޔާރުކޮށްފައިވާ ފޭކް އެގްރީމަންޓަކީ ކުރީ ސަރުކާރުން ދިން ލިޔުމެއް ކަމަށް ހަދައި ފުލުހުން ދެއްކީ ސިޔާސީ ވާހަކަތަކެއް ކަމަށެވެ.

ނޫސްވެރިންގެ މިބައްދަލުވުމުގައި، އެމްޑީޕީގެ ޤާނޫނީ ކޮމިޓީގެ މެންބަރު އަޙްމަދު މައުރޫފް ވިދާޅުވީ،ޑޮކިއުމެންޓެއްގެ ސައްހަކަމާމެދު ސުވާލު އުފެދޭ މައްސަލައެއްގައި، އެ ޑޮކިޔުމެންޓުގެ ސައްހަކަން ކަށަވަރު ކުރުމަށް ފޮރެންސިކް ތަހުލީލެއް ނުހަދައި ފުލުހުން އޭގެ ވާހަކަ ދެއްކުމަކީ ވަރަށް "އަންޕްރޮފެޝަނަލް" ކަމެއް ކަމަށާއި، އެއީ މީގެ ކުރިން ފުލުހުން އަމަލުކުރި ގޮތެއް ނޫންކަމަށެވެ.

އޭނާ އިތުރަށް، ވިދާޅުވީ މިސަރުކާރުގެ ސިޔާސީ މަގާމުތަކުގައި ތިއްބެވި ބޭފުޅުން ދޮގު ހައްދަވާތީ ސަރުކާރުގެ ވެރިން ދައްކާ ވާހަކަ ރައްޔިތުން މިހާރު ގަބޫލުނުކުރާކަން ސަރުކާރަށް އެނގޭތީ، ސަރުކާރުގެ ޕްޕޮޕަގެންޑާ ފެތުރުރުމަށާއި، ކުރީގެ ސަރުކާރުގެ ވެރިންގެ ބޮލުގައި ކަންތައްތަކެއް އެޅުވުމަށް ފުލުހުން ބޭނުންކުރަންފެށީ ކަމަށެވެ.

ބުރާސްފަތި ދުވަހުގެ ރޭ ފުލުހުން ބެއްވި ނޫސްވެރިންގެ ބައްދަލުވުމުގައި، އަސްލު މައްސަލައިގެ ވާހަކަ ނުދައްކައި، ކުރީގެ ސަރުކާރުގެ ވެރިން ބަދުނާމުކުރުމަށް ވާހަކަ ދައްކައިފައި ވާތީ އާންމުންގެ ތެރެއިން ގިނަބަޔަކު ދަނީ ފުލުހުންނަށް ފާޑުކިޔަމުންނެވެ.