ފީފާގެ މަޤާމެއް ރާއްޖޭގެ ޖައުޝަން އަށް
21 ޑިސެމްބަރު 2024 | ހޮނިހިރު 04:24ފީފާ އިން ޖައުޝަން އަށް ދީފައި ވަނީ، އެ އިދާރާގެ އެމްއޭ ޑިވިޝަންގެ ސްޓްރެޓެޖިކް ޕްރޮޖެކްސްޓްސް އެންޑް އެމްއޭ ގަވަނަަންސް ސަބް ޑިވިޝަންގެ މަގާމެކެވެ.
މުޙައްމަދު ޖައުޝަން ޝަރީފް
ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ މަޤާމެއް، ރާއްޖޭގެ މުޙައްމަދު ޖައުޝަން ޝަރީފު (ޖައު) އަށް ލިބިއްޖެ އެވެ.
ފީފާ އިން ޖައުޝަން އަށް ދީފައި ވަނީ، އެ އިދާރާގެ އެމްއޭ ޑިވިޝަންގެ ސްޓްރެޓެޖިކް ޕްރޮޖެކްސްޓްސް އެންޑް އެމްއޭ ގަވަނަަންސް ސަބް ޑިވިޝަންގެ މަގާމެކެވެ. އެ މަޤާމު ޖައު އަށް ދީފައި ވަނީ މިދިޔަ ނޮވެމްބަރު މަހުން ފެށިގެންނެވެ. އެކަމާ ގުޅިގެން "ރާއްޖެ އެމްވީ" އިން ސުވާލު ކުރުމުން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒިން ކޮމެޓީގެ ޗެއާމަން އަޙުމަދު ޒުހޫރު ވިދާޅުވީ އެކަމާ ގުޅުން ހުރި ރަސްމީ އެންގުމެއް ފީފާ އިން އަންގާފައި ނުވާ ކަމަށެވެ. ނަމަވެސް، ފީފާގައި ޖައު މަސައްކަތް ކުރާ ކަމުގެ މައުލޫމާތު އެ އިދާރާގެ ބައެއް ބޭފުޅުންގެ ފަރާތުން ލިބިފައިވާ ކަމަށް ވެސް ޒުހޫރު ވަނީ ވިދާޅުވެފަ އެވެ.
ޖައު ވަނީ އެންމެ ފަހުން އެފްއޭއެމްގެ ވަގުތީ ޖެނަރަލް ސެކްރެޓަރީގެ މަގާމު ވެސް އަދާ ކޮށްފަ އެވެ. އެ މަގާމަށް ޖައު ހަމަޖެއްސީ، ކުރިން އެ މަގާމުގައި ހުރި ޙުސެއިން ޖަވާޒް (ޖަވާ) އިސްތިއުފާ ދެއްވުމާ ގުޅިގެންނެވެ. ޖައު މަގާމާ ހަވާލުވީ ފަހުން، ފީފާ އިން ރާއްޖެ ނޯމަލައިޒް ކުރިއިރު، ނޯމަލައިިޒިން ކޮމެޓީގެ އެދުމުގެ މަތިން ޖައު ވަނީ ވަކި މުައްދަތެއް ވަންދެން އެ މަގާމުގައި މަޑު ކޮށްފަ އެވެ. ނަމަވެސް މުއްދަތު ހަމަވުމުން، މިހާރު ވަނީ އެފްއޭއެމަށް އައު ޖެނަރަލް ސެކްރެޓަރީ އަކު ހަމަޖައްސައިފަ އެވ.
ޖައު އަކީ ސަރަހައްދީ ފުޓުބޯޅަ އިދާރާ (އޭއެފްސީ)ގެ ލީގަލް ކޮމެޓީގައި ވެސް ހިމެނޭ ފަރާތެކެވެ. މީގެ އިތުރުން ދުނިޔޭގެ އެންޓި ޑޯޕިން އޭޖެންސީ (ވާޑާ)ގައި ވެސް ޖައު އަންނަނީ މަސައްކަތް ކުރަމުންނެވެ. އެފްއޭމްގައި ގިނަ ދުވަސްތަކެއް ވަންދެން ޖައު މަަސައްކަތް ކޮށްފައިވާއިރު، އެ އިދާރާގެ ލީގަލް ޑިރެކްޓަރުގެ މަގާމު ވެސް ޖައު ވަނީ އަދާ ކޮށްފަ އެވެ. އޭގެ ކުރިން 2016 ވަނަ އަހަރު ފީފާ އިން ފުރަތަމަ ފަހަރަށް ރާއްޖޭ ނޯމަލައިޒް ކުރިއިރު، އެ ފަހަރުގެ ނޯމަލައިޒިން ކޮމެޓީގައި ވެސް ޖައު ހިމެނެ އެވެ.
އެފްއޭއެމްގެ އިތުރުން ޖައު ވަނީ، ހޭންޑުބޯޅަ އެސޯސިއޭޝަން އޮފް މޯލްޑިވްސްގެ ޖެނަރަލް ސެކްރެޓަރީގެ މަގާމު ވެސް އަދާ ކޮށްފަ އެވެ. އޭގެ އިތުރުން މޯލްޑިވްސް އޮލިމްޕިކް ކޮމެޓީ (އެމްއޯސީ)ގައި ވެސް ޖައު ވަނީ މަސައްކަތް ކޮށްފަ އެވެ.
ޖައު ވަނީ މާސްޓާސް އޮފް ލޯސް އިން ޕަބްލިކް އިންޓަނޭޝަނަލް ލޯ ހާސިލު ކުރުމުގެ އިތުރުން، މާސްޓާސް އިން އިންޓަނޭޝަނަލް ސްޕޯޓްސް ލޯ ވެސް ހާސިލު ކޮށްފަ އެވެ. ކުޅިވަރުގެ ދާއިރާ އިން، ކުޅިވަރަށް ޚިދުމަތް ކުރުމުގެ ރޮނގުން 2022 ވަނަ އަހަރު ޖައު އަށް ވަނީ ހިތްވަރު ދިނުމުގެ ޤައުމީ އިނާމު ވެސް ލިބިފަ އެވެ.
