މެންބަރުންގެ ނަޒާހަތްތެރިކަން ހިފެހެއްޓުމަށް ގާނޫނުއަސާސީއަށް ބަދަލު ގެނައި އިރު އެމްޑީޕީން 13 މެންބަރުން ގެންދިޔައީ ނަޒާހަތްތެރިކަމުގެ ސުވާލެއްވެސް ނެތި - ސައްލެ

މެންބަރުންގެ ނަޒާހަތްތެރިކަން ހިފެހެއްޓުމަށް މި ސަރުކާރުން ގާނޫނުއަސާސީއަށް ބަދަލު ގެނައި އިރު އެމްޑީޕީން 13 މެންބަރުން ގެންދިޔައީ ނަޒާހަތްތެރިކަމުގެ ސުވާލެއްވެސް ނެތި ކަމަށް ހޯރަފުށީ ދާއިރާގެ ކުރީގެ މެންބަރު އަހުމަދު ސަލީމް (ސައްލެ) ވިދާޅުވެއްޖެއެވެ.

"ގާނޫނުއަސާސީގެ ދިފާއުގައި" އެމްޑީޕީން ބޭއްވި ބޮޑު ޖަލްސާގައި ވާހަކަދައްކަވަމުން ސައްލެ ވިދާޅުވީ މިއަދު ކަންކަން ހިނގަމުންދާގޮތަކީ ގޮންމުށުގެ ވެރިކަން، ހުދުމުހުތާރު ވެރިކަން ހިނގަމުންދިޔަ ގައުމުތަކުގައި އެތަންތާގެ ވެރިން ހިތަށް އެރި ކޮންމެ ކަމެއް ގާނޫނަށް ހަދަމުން ދިޔަގޮތަށް ކަމަށެވެ. ރާއްޖޭގައި ދާދި މިދާކަށް ދުވަހު މެންބަރުންގެ ނަޒާހަތްތެރިކަން ހިފެހެއްޓުމަށް ކަމަށް ބުނެ ހައެއްކަ ގަޑިއިރު ތެރޭގައި ގާނޫނުއަސާސީއަށް ބަދަލު ގެނައީ ރައްޔިތުން ކައިރީގައި ހޭވެސް އަހާނުލާކަމަށް ސައްލެއް ވިދާޅުވިއެވެ.

ސައްލެއް ވިދާޅުވީ އޭގެ ދުވަސްކޮޅެއް ކުރިން އެ ބޭފުޅުން އެމްޑީޕީން 13 މެންބަރުން ގެންދިޔައިރު ނަޒާހަތްތެރިކަމުގެ ސުވާލެއްވެސް ނެތް ކަމަށާއި ޕާޓީ ބަދަލުކުރުންވެސް އެންމެ ރަނގަޅު ކަމަށެވެ. ގައުމީ މަސްލަހަތަށް ބެލުމެއް ނެތި މި ޒާތަށް ހެދޭ ގާނޫނުތައް ރާއްޖޭގައި ނިމިދާތަން ފެންނަނީ ދިއްގާމަލުގެ މިސާލުގައި ކަމަށް ސައްލެއް ވިދާޅުވިއެވެ.

ސައްލެ ވިދާޅުވީ ވެރިކަމުގައި ގިނަ ދުވަހު ތިބުމުގެ މަގުސަދުގައި ކަންކަން ކުރަމުންދާއިރު، ބޭރު ދުނިޔޭގައި މި ރާއްޖެވެފައިވަނީ ބޮޑު އަރަތަކަށް ކަމަށެވެ. އާރު ނުލާ ޅޮސްގަނޑަކަށް ވެފައިވާ ކަމަށާއި، ގައުމުގެ މުގައްދަސް ސިފަތައް ރައްކާތެރި ކުރެވިގެން މެނުވީ އެކަކަށް ވެސް ރައްކާތެރިކަމެއް ނެތްކަމަށް ސައްލެއް ވިދާޅުވިއެވެ.

ސައްލެ ވިދާޅުވީ ގާނޫނުއަސާސީ ދިފާއުކުރަން ޖެހުމޭ ބުނުމަކީ އާދައިގެ ކުޑަކުޑަ ކަމެއް ނޫން ކަމަށެވެ. އެއިން ދޭހަވަނީ ގައުމުގެ އެންމެ މަތީ ދުސްތޫރުގެ ހައިސިއްޔަތުން އެ މައްޗަށް ލާޒިމްކުރާ ވާޖިބުތައް އަދާކުރުމުގައި ގާނޫނުއަސާސީ ނުކުޅެދިއްޖެކަމާއި، ގާނޫނު އަސާސީގެ ހުރުމަތް ކެނޑިއްޖެކަމާއި، ފަރުދީ ހައްގުތައް ރައްކާތެރިކުރުމަށް ހުރަސް އެޅިއްޖެކަން ކަމަށެވެ.

ސައްލެ ވިދާޅުވީ ގާނޫނުއަސާސީ ދިފާއުކުރަން ޖެހުމޭ ބުނުމަކީ ދައުލަތް ހިންގުމަށް ކަނޑައަޅާފައިވާ އޮނިގަނޑަށް ބުރާ އަރާފައިވާ ވާހަކައާއި ދައުލަތުގެ ޗެކް އެންޑް ބެލެންސް ގެއްލިއްޖެ ވާހަކަ ކަމަށެވެ. މުޖްތަމައުގެ ހަމަޖެހުމާއި ރައްކާތެރިކަމަށް ކޮށާފައިވާ މަގުތައް ބެދިއްޖެކަމާއި، ކުރުގޮތަކަށް ދަންނަވާނަމަ ރައްޔިތުންގެ އަތުގައި އޮތް ބާރު ގެއްލިއްޖެ ވާހަކަ ކަމަށް ސައްލެއް ވިދާޅުވިއެވެ.

މީގެ އިތުރުން ރައްޔިތުންގެ މަޖިލީހުގެ މެމްބަރުންނާ މިނިވަން މުއައްސަސާތަކުގެ މެމްބަރުންގެ ކޮންޓްރޯލް އޮންނަންވާނީ ރައްޔިތުންގެ އަތުގައި ކަމަށާއި، އެއީ ވެރިމީހާ އަތަށް ލާންޖެހޭ ބާރެއް ނޫން ކަމަށެވެ.

"އެއްގޮތެއް ނެތިއްޔާ އަނެއް ގޮތަކުން ވިޔަސް އެމްޑީޕީން މިހުރިހާ ބަދަލުތަކެއް ކުރިން އޮތްގޮތަށް ރުޖޫއަ ކުރާނަން. ވަރަށް ސާފުކޮށް އަޅުގަނޑު މިދަންނަވަނީ މިނިވަން ދިދައެއްގެ ހިޔާ ދަށުގައި ދިވެހިންގެ މި އިއްޒަތްތެރި ބިމުގައި އުނިކަން ނެތް ރޫހާނީ ބިމުގައި ދިވެހިން ނިކަމެތިވާ ގޮތަށް ކޫރުންތަކާ ރޮނގުތައް އަޅަން އަޅުގަނޑުމެން ފުރުސަތެއް ނުދޭނަން" ސައްލެ ވިދާޅުވިއެވެ.

ސައްލެ ވިދާޅުވީ ރާއްޖޭގައި ގާނޫނުތަކަށާއި، ސިޔާސަތުތަކަށް ގެންނަ ބަދަލުތަކާއި ގެންނަ ގޮތަކީ އަނދިރި ސަފްހާތައް އަލުން އިއާދަވެދާނެކަން ދައްކަމުން އަންނަ ނިޝާންތަކެއް ކަމަށެވެ.