އަހަރުގެ މިހާތަނަށް ދައުލަތައް ލިބުނު އާމްދަނީ މި ދިޔަ އަހަރުގެ މި މުއްދަތުގައި ލިބުނު އާމްދަނީ އަށް ވުރެ އިތުރުވި އިރު ކުރި ޚަރަދުތައް ލިބުނު އާމްދަނީ އަށް ވުރެ ބޮޑުވެފައިވާކަން ފިނޭންސް މިިނިސްޓްރީގެ ތަފާސް ހިސާބުތަކުން ހާމަ ވެއްޖެއެވެ.

މިއަހަރު މިހާތަނަށް 31.1 ބިލިއަން ރުފިޔާ ދައުލަތުގެ އާމްދަނީ އަށް ލިބިފައިވާއިރު، މިދިޔަ އަހަރުގެ ޖެނުއަރީ 1 ން ނޮވެމްބަރު 28 ގެ ނިޔަލަށް ލިބިފައިވަނީ 30.7 ބިލިއަން ރުފިޔާއެވެ.

މި މުއްދަތުގައި މި އަހަރު ޓެކްސް ގެ ގޮތުގައި ދައުލަތައް ލިބުނު ފައިސާ ވެސް ވަނީ އިތުރުވެފައެވެ.

މިނިސްޓްރީ އޮފް ފިނޭންސުން ހާމަ ކުރި ތަފާސް ހިސާބުން ޓެކްސްގެ ގޮތުގައި ދައުލަތައް ލިބުނު އާމްދަނީ ވެސް ވަނީ އިތުރުވެފައެވެ. އެ ގޮތުން ހުސްވި ނޮވެމްބަރ މަހުގެ 28 ގެ ނިޔަލަށް ޓެކްސްގެ ގޮތުގައި 23.7 ބިލިޔަން ރުފިޔާގެ ލިބިފައިވެއެވެ. 2023 ވަނަ އަހަރު ޖަނަވަރީން 1 ން ނޮވެމްބަރު 28 ގެ ނިޔަލަށް ލިބިފައިވަނީ 22.1 ބިލިޔަން ރުފިޔާއެވެ.

މީގެ ކުރިއެކޭ އެއްގޮތަކަށް ޓެކްސް އާމްދަނީގެ ތެރެއިން އެންމެ ބޮޑު އެއްޗެއް ދައުލަތައް ލިބެނީ ޖީއެސްޓީ އިން ނެވެ. މިއަހަރު ޖަނަވަރީން 1 ން ނޮވެމްބަރު 28 ގެ ނިޔަލަށް ޖީއެސްޓީ ގެ ގޮތުގައި 12.7 ބިލިއަން ރުފިޔާ ލިބިފައިވެއެވެ. މި މުއްދަތުގައި ބީޕީޓީ އިން 5.7 ބިލިއަން ރުފިޔާ ލިބިފައިވެއެވެ. އިމްޕޯޓު ޑިއުޓީގެ ގޮތުގައި 2.9 ބިލިއަން ރުފިޔާ ލިބިފައިވާއިރު، އެއަރޕޯޓު ސާވިސް ޗާޖާއި ޑިޕާޗާ ޓެކްސް އިން 1 ބިލިއަން ލިބިފައިވެއެވެ. އަދި ގްރީން ޓެކްސް ގެ ގޮތުގައި 951.8 މިލިއަން ރުފިޔާ މި މުއްދަތުގައި ވަނީ ލިބިފައެވެ. ނޮމްބަރުގެ ނިޔަލަށް ދައުލަތައް ޓެކްސް ނޫން އާމްދަނީގެ ގޮތުގައި 6.8  ބިލިއަން ރުފިޔާ ލިބިފައިވާއިރު، ކެޕިޓަލް ރިސިޕްޓްގެ ގޮތުގައި 11.2 މިލިޔަން ރުފިޔާ، އަދި ހިލޭ އެހީގެ ގޮތުގައި 581 މިލިޔަން ރުފިޔާ ލިބިފައިވާކަމަށް ފިނޭންސް އިން ބުނެފައިވެއެވެ.

ވީކްލީ ފިސްކަލް ޑިވެލޮޕްމަންޓްސް ރިޕޯޓުން ހާމަ ވާ ގޮތުގައި އާމްދަނީ 31.1 ބިލިއަނަށް އެރި ނަމަވެސް، ދައުލަތުގެ ޚަރަދުތައް ހުރީ ލިބުނު އާމްދާނީ އަށް ވުރެ މާ މަތީގައެވެ. ނޮވެމްބަރުގެ ނިޔަލަށް 42.8 ބިލިއަން ރުފިޔާ ވަނީ ޚަރަދު ކޮށްފައެވެ. މީގެތެރެއިން ވަރަށް ބޮޑު ބައެއް ހޭދަ ކޮށްފައިވަނީ ހިންގުމުގެ ޚަރަދުގެ ގޮތުގައެވެ. އެ ގޮތުން ރިކަރަންޓް ޚަރަދަކީ 30 ބިލިޔަން ރުފިޔާއެވެ. ކެޕިޓަލް ހަރަދުގެ ގޮތުގައި ހޭދަވި ކަމަށް ދައްކަނީ 12.7 ބިލިޔަން ރުފިޔާ އެވެ.