ސަރުކާރުން 3.5 ބިލިއަން ރުފިޔާ ދަރަންޏަށް ހޯދަނީ
ސަރުކާރުގެ ޚަރަދުތައް ހަމަޖެއްސުމުގެ ގޮތުން މިނިސްޓްރީ އޮފް ފިނޭންސުން މި ފައިސާ ހޯދަން ނިންމާފައިވަނީ ޓީ-ބިލު ވިއްކައިގެން
10 ރުފިޔާގެ ނޫޓުގެ ފޮޓޯއެއް
ސަރުކާރުން 3.5 ބިލިއަން ރުފިޔާ ދަރަންޏަށް ހޯދުމަށް އިއުލާނު ކޮށްފިއެވެ.
ސަރުކާރުގެ ޚަރަދުތައް ހަމަޖެއްސުމުގެ ގޮތުން މިނިސްޓްރީ އޮފް ފިނޭންސުން މި ފައިސާ ހޯދަން ނިންމާފައިވަނީ ޓީ-ބިލު ވިއްކައިގެންނެވެ.
ޓީ-ބިލު ވިއްކުމަށް ހުޅުވާލާފައިވަނީ ފެބްރުއަރީ 09 ވާ އާދީއްތަ ދުވަހުން ފެށިގެން 10 އެއްވާ ހޯމަ ދުވަހުގެ ނިޔަލަށެވެ.
ވިއްކުމަށް ހަމަ ޖެހިފައިވާ ޖުމްލަ ޓީ-ބިލުގެ އަގަކީ 3,537.81 މިލިއަން ދިވެހި ރުފިޔާއެވެ.
ވިއްކުމަށް ހަމަ ޖެހިފައިވާ ޓީ-ބިލު ގެ އިންޓަރެސްޓް ރޭޓް ތަކަށް ބަލާއިރު، 1 މަހުން މެޗުއަރ ވާ ޓްރެޜަރީ ބިލުގެ އިންޓަރެސްޓް ރޭޓަކީ 3.50 އިންސައްތަ އެވެ. 3 މަހުން މެޗުއަރ ވާ ބިލު 3.87 އިންސައްތަ، 6 މަހުން މެޗުއަރ ވާ ބިލަށް 4.23 އިންސައްތަ އަދި 1 އަހަރުން މެޗުއަރވާ ޓީ-ބިލުގެ އިންޓަރެސް ރޭޓަށް 4.6 އިންސައްތަ ކަމުގައި ވަނީ ކަނޑައަޅާފައިވެއެވެ.
އެއް މަސް ދުވަހުން މެޗުއަރވާ 120 މިލިއަން ރުފިޔާގެ ޓީ-ބިލު ވިއްކުމަށް ހުޅުވާލާފައިވާއިރު، 3 މަސްދުވަހުން މެޗުއަރވާ 50.01 މިލިއަން ރުފިޔާގެ ޓީ-ބިލު، 6 މަސްދުވަހުން މެޗުއަރވާ 150 މިލިއަން ރުފިޔާގެ ޓީ-ބިލު އަދި 1 އަހަރު ދުވަހުން މެޗުއަރވާ 1,245.649 މިލިއަން ރުފިޔާގެ ޓީ-ބިލު ވިއްކުމަށް ހަމަޖެހިފައިވާ ކަމަށް ފިނޭންސުން ވަނީ ހާމަ ކޮށްފައެވެ.
ކޮންމެ ޓީ-ބިލެއްގެ ފޭސް ވެލިއު (އަގު) އަކީ 10،000 ދިވެހި ރުފިޔާއެވެ. އަދި ޓީ-ބިލްތަކަށް އެދި ހުށަހަޅަންވާނީ މަދުވެގެން 10 ޓީ-ބިލް އަދި އޭގެ ގުނަތަކުން ކަމަށް ވެސް ފިނޭންސުން ބުނެއެެވެ.
