ޕްރިމިއާ ލީގުގެ ފޭވަރިޓުންނަކީ އަދިވެސް ޗެލްސީ: މޮރީނިއޯ

މި ސީޒަނުގައި ވެސް ޕްރިމިއާ ލީގުގެ ފޭވަރިޓުންނަކީ ޗެލްސީކަމަށް މެންޗެސްޓާ ޔުނައިޓެޑުގެ ކޯޗު ހޯޒޭ މޮރީނިއޯ ބުނެފިއެވެ.

ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން މޮރީނިއޯ ބުނެފައި ވަނީ މިދިޔަ ސީޒަނަށްވުރެ މި ސީޒަނުގައި ޗެލްސީ ފެންނަނީ ވަރުގަދަކޮށް ކަމަށާއި އެ ޓީމުން ދިޔަ ކުޅުންތެރިންގެ ބަދަލުގައި އެ ޓީމާ އަލަށް ގުޅިފައިވަނީ މާ މޮޅު ކުޅުންތެރިންކަމަށެވެ.

މިދިޔަ ސީޒަނުގައި ޗެލްސީއަށް ކުޅުނު ނެމެންޔާ މަޓިޗް ވަނީ އެ ޓީމު ދޫކޮށް މެންޗެސްޓާ ޔުނައިޓެޑަށް ބަދަލުވެފައެވެ. އެހެން ނަމަވެސް ޗެލްސީއިން ވަނީ އޭނާ ނެތްތަން ފޫ ބެއްދުމަށް މިދިޔަ ސީޒަނުގައި މޮނާކޯއަށް ކުޅުނު ބަކަޔޯކޯ ގެނެސްފައެވެ.

ސީޒަނުގެ ކުރީކޮޅުގައި ޗެލްސީއަށް ވަނީ އަނިޔާގެ މައްސަލަތަކާ ކުރިމަތިވެފައެވެ. އެގޮތުން މުހިންމު ކުޅުންތެރިން ކަމަށްވާ އެޑެން ހަޒާޑާއި ޕެޑްރޯ އަނިޔާގެ ސަބަބުން ޕްރިމިއާ ލީގުގައި ޗެލްސީގެ ފުރަތަމަ މެޗުގައި ކުޅެފައެއްނުވެއެވެ.

އެހެން ނަމަވެސް މޮރީނިއޯ ވަނީ މިފަދަ މައްސަލަތަށް ދިމާވި ކަމުގައި ވިޔަސް އަދިވެސް ލީގުގެ ފޭވަރިޓުންނަކީ ޗެލްސީކަމަށް ބުނެފައެވެ. އެގޮތުން އެ ޓީމަށް ގެނެސްފައިވަނީ މޮޅު ކުޅުންތެރިން ކަމަށާއި މިކަމުގެ ސަބަބުން މި ސީޒަނުގައި ޗެލްސީ ފެނިގެންދަނީ މާ ވަރުގަދަކޮށް ކަމަށް ބުނެފައެވެ.

މީގެ އިތުރުން ވެސް މޮރީނިއޯ ބުނެފައި ވަނީ ޗެލްސީއިން ޔުއެފާ ޗެމްޕިއަންސް ލީގުގައި ކުޅުނު ކަމުގައި ވިޔަސް އެ ޓީމުން ޕްރިމިއާ ލީގަށް ފަރުވާ ކުޑަ ނުކުރާނެ ކަމަށެވެ. އެގޮތުން މިދިޔަ ސީޒަނުގައި ވެސް ޗެމްޕިއަންކަން ހޯދީ ޗެލްސީ ކަމަށާއި އެހެންކަމުން މި ސީޒަނުގައި އެ ޓީމުން ކުޅޭނީ ތަށި ދިފާއު ކުރަން ކަމަށް މޮރީނިއޯ ބުނެފައިވެއެވެ.

މޮރީނިއޯ ވަނީ މީގެ ކުރިން ދެފަހަރެއްގެ މަތިން ޗެލްސީގެ ކޯޗުކަން ކޮށްފައެވެ. އަދި އޭނާވަނީ އެ ޓީމާ އެކު އަށް ތަށި ކާމިޔާބުކޮށްފައެވެ.