ރޯމާ ބަލިކޮށް، އެޓަލަންޓާ ދެ ވަނަ އަށް

އިޓާލިއަން ލީގުގައި ރޯމާއާ ދެކޮޅަށް ކުޅުނު މެޗުން މޮޅުވެ، އެޓަލަންޓާ އިން ލީގު ތާވަލްގެ ދެ ވަނަ މަގާމަށް ޖެހިލައިފި އެވެ.

ރޯމާގެ އަމިއްލަ ދަނޑުގައި ހޯމަ ދުވަހުގެ ރޭ ކުޅުނު މެޗު އެޓަލަންޓާ އިން ކާމިޔާބު ކުރީ 2-0 އިންނެވެ. މެޗުގައި އެޓަލަންޓާ އިން އެ ޓީމުގެ ދެ ލަނޑު ވެސް ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ރޯމާ އަށް ވަނީ ލަނޑު ޖަހަން ފުރުސަތު ލިބި، ބޭކާރުވެފަ އެވެ. އެ ޓީމުގެ އާޓެމް ޑޮބީކް އަށް ލަނޑު ޖަހަން ލިބުނު ފުރުސަތު އޭނާ އަށް ނިންމާލެވޭ ގޮތެއް ނުވި އެވެ. މެޗުގެ ދެ ވަނަ ހާފުގައި އެޓަލަންޓާ އަށް ލަނޑު ޖަހައި ލީޑު ނަގައިދިނީ މާޓެން ޑީ ރޫން އެވެ. އޭގެ ފަހުން ވެސް ރޯމާ އިން ލަނޑު ޖެހުމަށް މަސައްކަތް ކުރަމުން ދަނިކޮށް، އެޓަލަންޓާ އިން ވަނީ ދެ ވަނަ ލަނޑެއް ވެސް ޖަހައިފަ އެވެ. މެޗުގެ 89 ވަނަ މިނެޓުގައި އެޓަލަންޓާ އަށް އެ ލަނޑު ޖަހައިދިނީ ނިކޮލޯ ޒަނިއޯލޯ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ހުއާން ކުއާޑްރާޑޯ އެވެ.

މޮޅާއެކު އެޓަލަންޓާ އިން ދެ ވަނައިގައި އޮތީ މިހާތަނަށް ކުޅުނު 14 މެޗުން 31 ޕޮއިންޓާ އެކު އެވެ. އެޓަލަންޓާ އަތުން ބަލިވި ރޯމާ އޮތީ 14 މެޗުން 13 ޕޮއިންޓާ އެކު 15 ވަނައިގަ އެވެ. މޮޅާއެކު އެޓަލަންޓާ އިން ވަނީ އެއް ވަނައިގައި އޮތް ނަޕޯލީއާ ޕޮއިންޓަކާ ގާތަަށް ޖެހިލައިފި އެވެ. މިހާތަނަށް ކުޅެފައިވާ 14 މެޗުން ނަޕޯލީ އަށް ލިބެނީ 32 ޕޮއިންޓެވެ.