ފަހު މެޗުން މޮޅުވެ އައްޑޫ ދެ ވަނަ ބުރަށް
މޮޅާއެކު އައްޑޫ އިން ދެ ވަނަ ބުރުގެ ޖާގަ ހޯދިއިރު، އެ ޓީމު އޮތީ ވެސް ގުރޫޕު ސީގެ އެއް ވަނައިގަ އެވެ.
އައްޑޫ އާއި ހުރާ ކުޅުނު މެޗުގެ ތެރެއިން
މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު ސްޓޭޖުގައި އައްޑޫ ސިޓީން ކުޅުނު ފަހު މެޗުގައި ކ.ހުރާ ބަލިކޮށް މުބާރާތުގެ ދެ ވަނަ ބުރުގެ ޖާގަ ކަށަވަރު ކޮށްފި އެވެ.
ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު އައްޑޫ އިން ކާމިޔާބު ކުރީ 1-0 އިންނެވެ. އޭގެ ކުރިން މި ގުރޫޕުގައި ކ.ގުރައިދޫ އަދި ޅ.ކުރެންދޫއާ ދެކޮޅަށް އައްޑޫ ކުޅުނު މެޗު ނިމުނީ އެއްވަރުވެގެންނެވެ.
ހުރާއާ ދެކޮޅަށް ކުޅުނު މެޗުގައި އައްޑޫ އިން ލަނޑު ޖެހީ ވެސް މެޗުގެ ފުރަތަމަ ހާފުގަ އެވެ. އައްޑޫގެ ހާޒިމު ފައުޒީ ތަނަވަސްކޮށްދިން ފުރުސަތެއްގައި އެ ޓީމުގެ ލަނޑު ޖެހީ އިބްރާހީމް ވަޙީދު ޙަސަން (އިއްބެ) އެވެ. މެޗުގައި އިތުރު ލަނޑު ޖަހާނެ ފުރުސަތުތަކެއް އައްޑޫ އަށް ވަނީ ލިބިފަ އެވެ. އަނެއްކޮޅުން މެޗުގެ ނަތީޖާ ހަމަހަމަ ކުރުމަށް ހުރާ އިން ވެސް ވަނީ ވަރަށް ބޮޑަށް މަސައްކަތް ކޮށްފަ އެވެ. ނަމަވެސް ހުރާ އަށް ލިބުނު އެއްވެސް ފުރުސަތެއްގެ ބޭނުން އެ ޓީމަށް ކުރެވޭ ގޮތެއް ނުވި އެވެ.
މޮޅާއެކު އައްޑޫ އިން ދެ ވަނަ ބުރުގެ ޖާގަ ހޯދިއިރު، އެ ޓީމު އޮތީ ވެސް ގުރޫޕު ސީގެ އެއް ވަނައިގަ އެވެ. އެއީ ގުރޫޕުގައި ކުޅުނު ތިން މެޗުން ފަސް ޕޮއިންޓާ އެކު އެވެ. ހުރާ ވެސް ތިން މެޗު ކުޅެފައިވާއިރު، ތިން ޕޮއިންޓާ އެކު އެ ޓީމު އޮތީ ތިން ވަނައިގަ އެވެ. ދެ ވަނައިގައި އޮތް ގުރައިދޫ އަށް ހަތަރު ޕޮއިންޓު ލިބޭއިރު، ފުލުގައި އޮތް ކުރެންދޫ އަށް ލިބެނީ އެންމެ ޕޮއިންޓެކެވެ. މި ގުރޫޕުގެ ފަހު މެޗުގައި ބައްދަލު ކުރާނީ ގުރައިދޫ އާއި ކުރެންދޫ އެވެ.
