މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު ސްޓޭޖުގައި ބ.ތުޅާދޫއާ ދެކޮޅަށް ކުޅުނު މެޗުން މޮޅުވެ، ތ.ތިމަރަފުށި މުބާރާތުގެ ދެ ވަނަ ބުރުން ޖާގަ ހޯދައިފި އެވެ.
ގުރޫޕު ބީގައި ހޯމަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ތިމަރަފުށިން ކާމިޔާބު ކުރީ 4-2 އިންނެވެ. މި މެޗާ ކުރިމަތިލީއިރު، ދެ ޓީމު ވެސް ވަނީ ކުރިން ކުޅުނު ދެ މެޗުން ވެސް ބަލިވެފަ އެވެ. އެހެންވެ އެ މެޗުން މޮޅުވާ ޓީމަކަށް މި ގުރޫޕުގެ ތިން ވަނައިގައި ދެ ވަނަ ބުރުގެ ފުރުސަތު ލިބެން އޮތެވެ.
މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ތިމަރަފުށިންނެވެ. އެ ލަނޑު އެ ޓީމަށް ޖަހައިދިނީ ޢަބްދުﷲ ޒިޔާން އެވެ. މެޗުގައި ތިމަރަފުށީގެ އަނެއް ތިން ލަނޑު ވެސް އެ ޓީމުން ޖެހީ ދެ ވަނަ ހާފުގަ އެވެ. އަދި މި ހާފުގައި ތުޅާދޫ އިން ވެސް ވަނީ ދެ ލަނޑު ޖަހައިފަ އެވެ. ދެ ވަނަ ހާފުގައި ތިމަރަފުށީގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އިބްރާހީމް ސިނާހު އެވެ.
އޭގެ ފަހުން ތިމަރަފުށީގެ އާދަމް ނާސިހު ވަނީ އެ ޓީމުގެ ތިން ވަނަ ލަނޑު ޖަހައި، އިތުރަށް ލީޑު ފުޅާ ކޮށްފަ އެވެ. މެޗުގައި ތުޅާދޫގެ ފުރަތަމަ ލަނޑު ޖެހީ އަޙުމަދު ރަޝީދު އެވެ. އޭގެ ފަހުން އެ ޓީމުގެ ދެ ވަނަ ލަނޑަކީ ތިމަރަފުށީގެ ކުޅުންތެރިޔެއްގެ އަތުން ބައި ކޮޅަށް ވަތް ލަނޑެކެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބައި ކޮޅަށް ވަތް ލަނޑަކީ އަނޫފު އަޙުމަދު އަތުން ވަތް ލަނޑެކެވެ. އޭގެ ފަހުން މެޗުގައި ތިމަރަފުށީގެ ހަތަރު ވަނަ ލަނޑު ޖެހީ އަޙުމަދު އަފްލާޒް އެވެ.
މޮޅާއެކު ތިމަރަފުށިން ދެ ވަނަ ބުރުގެ ޖާގަ ހޯދިއިރު، ގުރޫޕުގެ ތިން ވަނަ އެ ޓީމަށް ލިބެނީ ތިން މެޗުން ތިން ޕޮއިންޓާ އެކު އެވެ. މި ގުރޫޕުގެ އެއް ވަނައިގައި ދެ ވަނަ ބުރުގެ ޖާގަ ބ.އޭދަފުށިން ހޯދިއިރު، ދެ ވަނައިގައި ދެ ވަނަ ބުރުން ޖާގަ ހޯދީ މާލޭ ސިޓީ އެވެ. މިއާއެކު ގުރޫޕު ބީގެ ހުރިހާ މެޗެއްގެ ކުޅުން މި ވަނީ ނިމިފަ އެވެ.
