އިނގިރޭސި ޕްރިމިއަރ ލީގުގައި ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ ދެ ވަނަ މަގާމަށް ޖެހިލައިފި އެވެ.

ވެސްޓް ހޭމްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 5-2 އިންނެވެ. މެޗުގައި ދެ ޓީމުން ވެސް ލަނޑުތައް ޖެހީ ފުރަތަމަ ހާފުގަ އެވެ.

މެޗު ފަށައިގެން 10 ވަނަ މިނެޓުގައި އާސެނަލަށް ލީޑު ނަގައިދިނީ ގަބްރިއެލް މަގަޅައެސް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ބުކަޔޯ ސަކާ އެވެ. އޭގެ ފަހުން މެޗުގެ 27 ވަނަ މިނެޓުގައި ސަކާ ތަނަވަސްކޮށްދިން ފުރުސަތެއްގައި އާސެނަލްގެ ދެ ވަނަ ލަނޑު ޖެހީ ލެއާންޑްރޯ ޓްރޮސާޑް އެވެ. އޭގެ ހަތް މިނެޓު ފަހުން އާސެނަލަށް ލިބުނު ޕެނަލްޓީ ކާމިޔާބުކޮށް، އެ ޓީމުގެ ތިން ވަނަ ލަނޑު ޖެހީ މާޓިން އޮޑެގާޑް އެވެ.

އާސެނަލްގެ ތިން ވަނަ ލަނޑު ޖެހިތާ ދެ މިނެޓު ފަހުން، ކައި ހަވާޓްޒް ވަނީ އެ ޓީމުގެ ހަތަރު ވަނަ ލަނޑު ޖަހައިފަ އެެވެ. އެއީ ޓްރޮސާޑް ތަނަވަސްކޮށްދިން ފުރުސަތެއްްގައި އޭނާ ޖެހި ލަނޑެކެވެ. މެޗުގައި ވެސްޓް ހޭމް އިން ވަނީ ދެ މިނެޓުގެ ތެރޭގައި ދެ ލަނޑު ޖަހައިފަ އެވެ. އެގޮތުން މެޗުގެ 38 ވަނަ މިނެޓުގައި އެ ޓީމުގެ ފުރަތަމަ ލަނޑު ޖެހީ އާރޮން ވަން ބިސާކާ އެވެ. އޭގެ ދެ މިނެޓު ފަހުން އެ ޓީމުގެ ދެ ވަނަ ލަނޑު ޖެހީ އެމަސަން ޕަލްމިއޭރީ އެވެ. މެޗުގެ ފުރަތަމަ ހާފުގެ އިތުރު ވަގުތުގައި އާސެނަލަށް ލިބުނު ޕެނަލްޓީ ކާމިޔާބުކޮށް، އެ ޓީމުގެ ފަސް ވަނަ ލަނޑު ޖެހީ ސަކާ އެވެ.

މޮޅާ އެކު އާސެނަލް ދެ ވަނައިގައި އޮތީ މިހާތަނަށް އެ ޓީމު ކުޅުނު 13 މެޗުން 25 ޕޮޮއިންޓާ އެކު އެވެ. އެއް ވަނައިގައި ލިވަޕޫލް އޮތީ އާސެނަލަށް ވުރެ އެއް މެޗު މަދުން ކުޅެގެންނެވެ. މިހާތަނަށް ކުޅުނު 12 މެޗުން އެ ޓީމަށް ލިބެނީ 31 ޕޮއިންޓެވެ. އާސެނަލްގެ ފަހަތުން ތިން ވަނައިގައި އޮތް ބްރައިޓަން އަށް ލިބެނީ 23 ޕޮއިންޓެވެ.