ފްލެޓާއި ގޯތި މައްސަލައިގައި އެނގިގެން ދަނީ ރައީސްގެ ދޮގުވެރިކަން - އާއްމުން
މުޒާހަރާގެ ބައިވެރިން ވަނީ ހައުސިން މިނިސްޓަރ ހައިދަރު އަކީ ރައީސް ޑރ.މުހައްމަދު މުއިއްޒުގެ ޕަޕެޓެއް ކަަމަށް ސިފަކޮށްފައި
ރަސްފަންނުގައި ކުރިއަށް ގެންދިޔަ މުޒާހަރާގެ ތެރެއިން
ފްލެޓާއި ގޯތި މައްސަލައިގައި މި ސަރުކާރުގެ އަމަލުތައް ހުރި ގޮތުން އެނގިގެން ދަނީ ރައީސް ޑރ.މުހައްމަދު މުއިއްޒުގެ ދޮގުވެރިކަންކަމަށް ގޯއްޗާއި ފްލެޓްގެ މައްސަލައިގައި މުޒާހަރާ ކުރަމުންދާ އާއްމުން ބުނެފިއެވެ.
އާއްމުން އެފަދައިން ބުނެފައި ވަނީ ހުކުރު ދުވަހުގެ ރޭ ކުރި މުޒާހަރާގައެވެ. ފްލެޓާއި ގޯތި ދޫނުކުރާ މައްސަލާގައި ރަސްފަންނު ސަރަހައްދަށް ގިނަ އަދަދެއްގެ އާއްމު ރައްޔިތުން ވަނީ އެއްވެ އަޑު އުފުލާފައެވެ. މުޒާހަރާގެ ބައިވެރިން ބުނެފައިވަނީ ރައީސް މުއިއްޒުގެ ސަރުކާރުގައި ފްލެޓާއި ގޯތި ދޫނުކޮށް ހިފަހައްޓަމުންދާތީ ކަންބޮޑުވާ ކަމަށެވެ. މިހާރު ވެސް ދިރިއުޅެމުން މިދަނީ ވަރަށް ހާލުގައި ކަމަށް މުޒާހަރާގެ ބައިވެރިން ވަނީ ބުނެފައެވެ. އެގޮތުން އެއް ކޮޓަރި އެއްގައި ދަރިންނާއި، މައިންބަފައިން ގޮވައިގެން ވަރަށް ދަތި ހާލުގައި ދިރިއުޅެމުންދާކަމަށް މުޒާހަރާގެ ބައިވެރިން ވަނީ ބުނެފައެވެ. އާއްމުން ވަނީ ފްލެޓާއި ގޯތި ނުދީ ސަރުކާރުން ލަސްކުރަނީ ސިޔާސީ މަޤްސަދެއްގައި ކަމަށް ފާހަގަކޮށް އެކަމަށް ފާޑު ކިޔާފައެވެ. އަދި އާއްމުން ވަނީ ސަރުކާރުގެ އިސް ބައެއް ވެރިންގެ އިސްތިއުފާ އަށް ގޮވާލާފައެވެ. ގޯއްޗާއި ފްލެޓު ދިނުމުގައި މިސަރުކާރުން އިހުމާލުވަމުންދާކަމަށާއި ކަންކަމުގެ ހަގީގަތް ހާމަ ނުކުރާ ކަމަށް އާއްމުން ވަނީ ބުނެފައެވެ.
ނިމިދިޔަ ސަރުކާރުން ދޭން ނިންމި 4،000 ފުލެޓު ލިބޭ މީހުންގެ ވަގުތީ ލިސްޓް އާއްމުކުރުން މުއްދަތެއް ނެތް ގޮތަށް ވަނީ ލަސްކޮށްފައެވެ. އާއްމުން ވަނީ އުސޫލުން ބޭރުން ފްލެޓް ދީފައިވާ ކަމަށް ހައުސިން މިނިސްޓްރީ އިން ބުނާ އިރު އުސޫލާއި އެއްގޮތަށް ލިބުނު މީހުންނަށް ވެސް ފްލެޓް ނުލިބެންވީ ސަބަބެއް ނެތް ކަމަށް ފާހަގަކުރައްވާފައެވެ. ފްލެޓް ދީފައި ވަނީ ފްލެޓް ދިނުމުގެ ކުރިން އިއުލާން ކުރި އުސޫލާއި އެއްގޮތަށް ދީފައިވާ ފްލެޓްތައް މި ސަރުކާރަށް އަތު ނުލެވޭނެ ކަމަށާއި އެއީ ކުރެވޭނެ ކަމެއް ނުން ކަމަށް އާއްމުން ވަނީ ބުނެފައެވެ. ރައްޔިތުން ފޯމު ހުށަހެޅީ ވެސް ކަނޑައަޅާފައިވާ އުސޫލުގެ ތެރެއިން ކަމަށާއި އެއްވެސް މީހެއްގެ ފޯމް ގޯސްކޮށް އޮތްކަން ސަރުކާރަށް މިހާތަނަށް އައިސްފައިވާ އިރު ސާބިތުކޮށް ނުދެވޭ ކަމަށް އާއްމުން ވަނީ ބުނެފައެވެ. މި ފްލެޓްތައް އަތުލަން އުޅުމަކީ ދިވެހިންގެ ލެޔާއި ކުޅުން ކަމަށް އެ މުޒާހަރަގެ ބައެއް ބައިވެރިން ވަނީ ސިފަކޮށްފައެވެ.
މުޒާހަރާގެ ބައިވެރިން ބުނެފައިވަނީ މިސަރުކާރުން ރައްޔިތުންނަށް ވަރަށް ބޮޑަށް އަނިޔާވެރިވަމުންދާ ކަމަށެވެ. ގޯއްޗާއި ފްލެޓް ނުދީ ހިފެހެއްޓުމަކީ އެތައް ބައެއްގެ ހައްގުތައް ހިފެހެއްޓުންކަމަށް އާއްމުން ވަނީ ބުނެފައެވެ.. ގޯއްޗާއި، ފްލެޓު ނުދީ ލަސްވާ ކޮންމެ ދުވަހަކީ އެތައް ހައްގެއް ގެއްލިގެންދާ ދުވަހެއް ކަމަށް އާއްމުން ވަނީ ބުނެފައެވެ. މުޒާހަރާގެ ބައިވެރިން ވަނީ ހައުސިން މިނިސްޓަރ ހައިދަރު އަކީ ރައީސް ޑރ.މުހައްމަދު މުއިއްޒުގެ ޕަޕެޓެއް ކަަމަށް ސިފަކޮށްފައެވެ.
