ރައީސް ނަޝީދު ގްލޯބަލް ސިޓިޒަން އެވޯޑު ހާސިލު ކުރެއްވުމުން ދަ ޑިމޮކްރަޓްސް އިން ހޫނު މަރުހަބާ ކިޔައިފި
ރައީސް ނަޝީދުގެ ފާހަގަކޮށްލެވޭ މަސައްކަތްޕުޅު ތަކަށް ބައިނަލްއަޤްވާމީ ގިނަ އެވޯޑުތަކާއި ޝަރަފުތައް ހާސިލު ކުރައްވާފައިވާކަން ފާހަގަ ކުރެވޭ
ރައީސް ނަޝީދު، ގްލޯބަލް ސިޓިޒަންޝިޕް އެވޯޑް އާ އެކު
"ހެންލީ އެންޑް ޕާޓްނާސް ގްލޯބަލް ސިޓިޒަން އެވޯޑު" ރައީސް މުޙައްމަދު ނަޝީދަށް ހޯއްދެވުމުން ދަ ޑިމޮކްރެޓްސް އިން ހޫނު މަރުހަބާއެއް ކިޔައިފިއެވެ.
އެ ޕާޓީން ނެރުނު ބަޔާނެއްގައި ބުނެފައިވަނީ އެމަނިކުފާނަށް ލިބިވަޑައިގެންފައިވާ ޝަރަފުވެރި އެވޯޑަކީ "ދުނިޔޭގެ މުޖުތަމަޢު ރަނގަޅުކުރުމަށް އާދަޔާ ޚިލާފު ޙިއްސާއެއް ދީފައިވާ ދުނިޔޭގެ ރައްޔިތަކަށް" ދެވޭ އެވޯޑެއް ކަމަށެވެ.
ރައީސް ނަޝީދުގެ ފާހަގަކޮށްލެވޭ މަސައްކަތްޕުޅު ތަކަށް ބައިނަލްއަޤްވާމީ ގިނަ އެވޯޑުތަކާއި ޝަރަފުތައް ހާސިލު ކުރައްވާފައިވާކަން ބަޔާނުގައި ވަނީ ފާހަގަ ކޮށްފައެވެ.
"މިކަމުން އެމަނިކުފާނަކީ އިންސާނީ ޙައްޤުތައް ދިފާޢުކުރުމާއި މޫސުމަށް އަންނަ ބަދަލުތަކާ ގުޅޭގޮތުން މަސައްކަތްކުރެއްވުމުގައި ދުނިޔޭގެ ލީޑަރެއްކަން ހާމަވެގެންދެއެވެ."
ރައީސް ނަޝީދަކީ ޓައިމް މަޖައްލާއިން "ތިމާވެށީގެ ބަޠަލުން" ގެ ގޮތުގައި ފާހަގަކޮށްފައިވާ ބޭފުޅެކެވެ. މިކަމުން އެމަނިކުފާނު ތިމާވެށީގެ މައްސަލަތަކަށް ކުރީއްސުރެ ދެއްވާފައިވާ އަހައްމިއްޔަތު ފާހަގަކުރެވޭ ކަމަށް ދަ ޑިމޮކްރެޓްސް އިން ބުނެފައިވެއެވެ.
ފޮރިން ޕޮލިސީ މަޖައްލާއިން އެމަނިކުފާނު ހިމަނުއްވާފައިވަނީ އެންމެ މަތީ ދަރަޖައިގެ ދުނިޔޭގެ ވިސްނުންތެރިންގެ ލިސްޓުގައެވެ. މިކަމުން ދުނިޔޭގެ މައިދާނުގައި އެމަނިކުފާނުގެ ނުފޫޒު އިތުރުވަމުންދާކަން ހާމަވެގެންދާ ކަމަށާއި ރައީސް ނަޝީދަށް ލިބިވަޑައިގެންފައިވާ އދ.ގެ "ޗެމްޕިއަންސް އޮފް ދި އާރތު" އެވޯޑުން އެމަނިކުފާނަކީ "މޫސުމަށް އަންނަ ބަދަލުތަކުގެ ގޮންޖެހުންތަކާ ކުރިމަތިލާންޖެހޭ ނާޒުކު އަދި ފަގީރުންގެ އަޑުއުފުލައިދޭ އަޑެއް" ކަމުގައި ފާހަގަކުރެވިފައިވާ ކަމަށް ވެސް ބަޔާނުގައި ވެއެވެ.
އިންސާނީ ޙައްޤުތަކަށް އެމަނިކުފާނު ކުރައްވާ މަސައްކަތްޕުޅުތަކާއި ސުލްހަވެރި ހަރަކާތުގެ ސަބަބުން އެމަނިކުފާނަށް "އަންނާ ލިންޑް މެމޯރިއަލް ފަންޑް ހިއުމަން ރައިޓްސް ޕްރައިޒް" ލިބިވަޑައިގެންފައިވެއެވެ. އެމަނިކުފާނު ސުލްހައަށް ވަކާލާތުކުރެއްވުމާއި އިޖްތިމާޢީ ބަދަލު ގެނައުމަށް ކުރައްވާފައިވާ މަސައްކަތްޕުޅުތަކުގެ އަގު ވަޒަން ކުރުމުގެ ގޮތުން "ޖޭމްސް ލޯސަން އެވޯޑު" ލިބިވަޑައިގަނެފައިވާކަން ބަޔާނުގައި ފާހަގަ ކޮށްފައިވެއެވެ.
"މިއަދު ލިބިވަޑައިގެންފައިވާ އެވޯޑަކީ އެމަނިކުފާނު ހުއްޓުމެއް ނެތި ދުނިޔޭގެ މައްސަލަތަކުގައި ކުރީ ސަފުގައި ކުރައްވަމުން ގެންދަވަ މަސައްކަތްޕުޅާއި، ލީޑަރޝިޕްގެ ހެއްކެއް،" ކަމަށްވެސް ބަޔާނުގައި ވެއެވެ. ރައީސް ނަޝީދު ދިވެހިރާއްޖެ އަށާއި ބައިނަލްއަގްވާމީ މުޖުތަމަޢުއަށް ކޮށްދެއްވާފައިވާ ޚިދުމަތައްޓަކައި ދަ ޑިމޮކްރެޓްސް އިން ވަނީ ޝުކުރު އަދާކޮށްފައެވެ.
މި އެންމެ ފަހުގެ ކާމިޔާބީ ފާހަގަކުރާއިރު، އަޅުގަނޑުމެން ބަލަނީ ރައީސް ނަޝީދުގެ ކުރިމަގުގެ ޚިދުމަތްތަކަށް ކަމަށާއި، އެމަނިކުފާނުގެ ދެމެހެއްޓެނިވި ލީޑަރޝިޕް ގެ ތެރެއިން ދުނިޔޭގެ އެކި ކަންކޮޅުތަކުގައި އިތުރަށް ވިލުންވެރި އަދި ހަމަހަމަ މުޖުތަމަޢުތަކެއް އުފެއްދުމުގައި މުހިންމު ދައުރެއް އަދާކުރައްވާނެކަމާމެދު އަޅުގަނޑުމެން ޝައްކެއް ނުކުރާ ކަމަށްވެސް ބަޔާނުގައި ބުނެފައިވެއެވެ.
"ހެންލީ އެންޑް ޕާޓްނާސް ގްލޯބަލް ސިޓިޒަން އެވޯޑު" ރައީސް ނަޝީދަށް އެރުވީ ސިންގަޕޫރުގައި ބުރާސްފަތި ދުވަހު ބޭއްވި ޚާއްސަ ހަފްލާ އެއްގައެވެ.
