މިހާރު ކުރިއަށްދާ ގޯލްޑް ކަޕް ފުޓުބޯޅަ މުބާރާތުގެ ގުރޫޕު ބީގައި ތ.ތިމަރަފުއްޓާ ދެކޮޅަށް ކުޅުނު މެޗުން މޮޅުވެ، ބ.އޭދަފުށިން މުބާރާތުގެ ދެ ވަނަ ބުރުގެ ޖާގަ ކަށަވަރު ކޮށްފި އެވެ.
ބުދަ ދުވަހުގެ ހަވީރު ގަލޮޅު ރަސްމީ ދަނޑުގައި ތިމަރަފުއްޓާ ދެކޮޅަށް ކުޅުނު މެޗު އޭދަފުށިން ކާމިޔާބު ކުރީ 4-0 އިންނެވެ. މުބާރާތުގައި އޭދަފުށި ކުޅުނު ފުރަތަމަ މެޗުން އެ ޓީމު މޮޅުވެފައިވާއިރު، ތިމަރަފުށި ކުޅުނު ފުރަތަމަ މެޗުން ވަނީ ބަލިވެފަ އެވެ.
މެޗުގައި ލަނޑު ޖަހައި އޭދަފުއްޓަށް ކުރި ހޯދައިދިނީ އަލީ ނަސީމް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އިޝާން އިބްރާހީމް (ސައްޓު) އެވެ. މެޗުގައި އޭދަފުށީގެ އަނެއް ތިން ލަނޑު ވެސް އެ ޓީމުން ޖެހީ ދެ ވަނަ ހާފުގަ އެވެ. މެޗުގައި އޭދަފުށީގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ މުޙައްމަދު ފާސިރު (ފާއްޓޭ) އެވެ. އޭގެ ފަހުން އޭނާ ވަނީ އެ ޓީމުގެ ތިން ވަނަ ލަނޑު ވެސް ޖަހައިފަ އެވެ. އަދި މެޗުގައި އޭދަފުށީގެ ހަތަރު ވަނަ ލަނޑު ޙުސެއިން ޝަރީފް ޖެހީ މެޗުގެ އިތުރު ވަގުތުގައި ލިބުނު ޕެނަލްޓީ ކާމިޔާބު ކޮށްގެންނެވެ.
މޮޅާއެކު އޭދަފުަށިން މުބާރާތުގެ ދެ ވަނަ ބުރުގެ ޖާގަ ހޯދިއިރު، ދެ މެޗުން މޮޅުވެ ހަ ޕޮއިންޓާ އެކު އޭދަފުށި އޮތީ މި ގުރޫޕުގެ ދެ ވަނައިގަ އެވެ. ދެ މެޗުން ހަ ޕޮއިންޓާ އެކު އެއް ވަނައިގައި އޮތީ މާލޭ ސިޓީ އެވެ. ގުރޫޕުގައި ދެން އޭދަފުށި ބައްދަލު ކުރާނީ މާލޭ ސިޓީއާ އެވެ. މި ގުރޫޕުގެ އެއް ވަނަ ޓީމު ކަނޑައެޅޭނީ އެ މެޗުންނެވެ.
