މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު ބީގައި ކުޅުނު ދެ ވަނަ މެޗުން ވެސް މޮޅުވެ، މާލޭ ސިޓީން މުބާރާތުގެ ދެ ވަނަ ބުރުގެ ޖާގަ ހޯދައިފި އެވެ.
ގަލޮޅު ރަސްމީ ދަނޑުގައި އަންގާރަ ދުވަހުގެ ރޭ ކުޅުނު މެޗުގައި މާލޭ ސިޓީ ބައްދަލުކޮށްފައި ވަނީ ބ.ތުޅާދޫއާ އެވެ. އެ މެޗުގައި މާލޭ ސިޓީން ވަނީ 5-0 އިން ތުޅާދޫ ބަލިކޮށްފަ އެވެ. މެޗުގެ ފުރަތަމަ ހާފުގައި މާލޭ ސިޓީން ވަނީ ދެ ލަނޑު ޖަހައިފަ އެވެ. އަދި އެ ޓީމުގެ އަނެއް ތިން ލަނޑު ވެސް ޖެހީ ދެ ވަނަ ހާފުގަ އެވެ.
މެޗުގައި މާލޭ ސިޓީ އަށް ލީޑު ލިބުނީ ތުޅާދޫގެ ޝަމްވީލް މުޙައްމަދު (ބޮންޑާ) އަތުން ބައި ކޮޅަށް ވަތް ލަނޑާ އެކު އެވެ. މެޗުގައި މާލޭ ސިޓީގެ ދެ ވަނަ ލަނޑު ޖެހީ މުޙައްމަދު ޔަޒްދާން ޙުސެއިން އެވެ. ފުރަތަމަ ހާފުގައި ތިން ވަނަ ލަނޑެއް ޖަހަން ލިބުނު ފުރުސަތުގައި މާލޭ ސިޓީގެ ރިޟްވާން ވަޙީދު ފޮނުވާލި ޕެނަލްޓީ ވަނީ ނާކާމިޔާބުވެފަ އެވެ. އެއީ މާލޭ ސިޓީގެ އަހުނަފް މުޙައްމަދު ތަސްނީމް އަށް ކުރި ފައުލަކަށް ދިން ޕެނަލްޓީ އެކެވެ.
މެޗުގެ ދެ ވަނަ ހާފުގައި އަހުނަފް ވަނީ މާާލޭ ސިޓީގެ ތިން ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގައި މާލޭ ސިޓީގެ ހަތަރު ވަނަ ލަނޑާއި ފަސް ވަނަ ލަނޑު ވެސް ޖެހީ މުޙައްމަދު ނާއިލް އެވެ. މެޗުގައި ނާއިލް ކުޅެން ނިކުމެފައި ވަނީ ވެސް ބަދަލު ކުޅުުންތެރިޔެއްގެ ގޮތުގަ އެވެ. މި ދެ ލަނޑު ވެސް ނާއިލް ޖެހީ ގާތް ގާތުގަ އެވެ.
މޮޅާއެކު މާލޭ ސިޓީން މުބާރާތުގެ ދެ ވަނަ ބުރުގެ ޖާގަ ޔަގީން ކުރީ މިހާތަަނަށް ކުޅުނު ދެ މެޗުން ވެސް މޮޅުވެ ހަ ޕޮއިންޓާ އެކު އެވެ. ހަތަރު ޓީމު ހިމެނޭ މި ގުރޫޕުގެ ދެ ވަނައިގައި އޮތީ ބ.އޭދަފުއްޓެވެ. ތިން ވަަނައިގައި ތ.ތިމަރަފުށި އޮތްއިރު، ފުލުގައި އޮތީ ތުޅާދޫ އެވެ. ދެ ޓީމަށް ވެސް މިހާތަނަށް އެއްވެސް ޕޮއިންޓެއް ނުލިބެ އެވެ.
