ޞަލާހު ބުނީ ލިވަޕޫލް ދޫކޮށްލުމުގެ ފުރުސަތު ބޮޑު ކަމަށް

ލިވަޕޫލާ އެކު ސޮއި ކޮށްފައިވާ އެއްބަސްވުން ހަމަވާން އަންނައިރު، މިހާތަނަށް އައު އެއްބަސްވުމެއްގެ ވާހަކަ ނުދެކެވޭ ކަމަށާއި، އެހެންކަމުން ލިވަޕޫލް ދޫކޮށްލުމުގެ ފުރުސަތު ބޮޑު ކަމަށް އެ ޓީމަށް ކުޅެމުން އަންނަ މިޞްރުގެ ފޯވާޑު މުޙައްމަދު ޞަލާޙު ބުނެފި އެވެ.

ރޯމާ ދޫކޮށްލުމަށްފަހު އުމުރުން 32 އަހަރުގެ ކުޅުންތެރިޔާ ލިވަޕޫލަށް ބަދަލުވީ 2017 ވަނަ އަހަރު އެވެ. އެންމެ ފަހުން އެ ކުލަބާ އެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ޞަލާޙުގެ މުސްތަޤުބަލާ ގުޅޭ ގޮތުން ދެކެވެމުން އަންނަ ވާހަކަތަކާ ގުޅިގެން އޭނާ ބުނީ، ލިވަޕޫލްގައި އޭނާ ހުންނަތާ އެތައް އަހަރެއްވެފައިވާ ކަމަށާއި، އެ ކުލަބަކީ އޭނާ އަށް ޚާއްސަ ކުލަބެއް ކަމަށެވެ. އެހެން ނަމަވެސް، މިހާތަނަށް އެއްބަސްވުން އައު ކުރުމުގެ އެއްވެސް ވާހަކައެއް ނުދެކެވޭ ކަމަށް ވެސް ޞަލާޙު ބުންޏެވެ. ޞަލާޙު ބުނީ އެކަމަކީ އޭނާގެ އަތް މަތީގައި އޮތް ކަމެއް ވެސް ނޫން ކަމަށެވެ.

މިހާތަނަށް އައިއިރު ލިވަޕޫލް އިން ޞަލާހު އަށް އައު އެއްބަސްވުމެއް ނުވަތަ އެއްވެސް ހުށަހެޅުމެއް ލިބިފައި ނުވުމަކީ ކަންބޮޑުވާ ކަމެއް ކަމަށް ވެސް ޞަލާޙު ވަނީ ބުނެފަ އެެވެ. ޞަލާޙު ބުނީ ލިވަޕޫލް ސަޕޯޓަރުން ދެކެ އޭނާ އިންތިހާ އަށް ލޯބިވާ ކަމަށާއި، ސަޕޯޓަރުން ވެސް އޭނާ ދެކެ އިންތިހާ އަށް ލޯބިވާކަން އިނގޭ ކަމަށެވެ. އެކަން ފާހަގަކޮށް ޞަލާހު ބުނީ އޭނާ އަންނަނީ އޭނާ އަށް ވީ އެންމެ ފުރިހަމަ އަކަށް ކަންކަން ކުރުމަށް މަސައްކަތް ކުރަމުން ކަމަށާއި، ކުލަބަކަށްޓަކައި އެތައް ކަމެއް ކުރަން އޭނާ ބޭނުންވެފައި ހުރި ކަމަށެވެ.

މިހާތަނަށް ލިވަޕޫލާ އެކު ހާދަކޮށްފައިވާ އަށް ސީޒަންގެ ތެރޭގައި ޞަލާޙު ވަނީ އެ ކުލަބަށް ކުޅެދިން 368 މެޗުގައި 223 ލަނޑު ޖަހައިފަ އެެވެ. ލިވަޕޫލާ އެކު އޭނާ ވަނީ ހަތް ތައްޓެއް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު، އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑު، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކުރުން ހިމެނެ އެވެ. މިވަގުތު ލިވަޕޫލްގައި ތިބި ކުޅުންތެރިންގެ ތެރެއިން އެންމެ މުހިންމު ދައުރެއް އަދާ އެއް ކުޅުންތެރިޔަކީ ވެސް ޞަލާޙު އެވެ.