ޒަކިއްޔާ މަރަށް ދެމަހަށް ވުރެ ގިނަ ދުވަސް، ފުލުހުންގެ ބަހެއް ނުލިބުމުން ރައްޔިތުން މަގުމައްޗަށް
މި ހަރަކާތުގައި ގިނަ އަދަދެއްގެ އާއްމު ރައްޔިތުން ބައިވެރިވެފައިވޭ
ޒަކިއްޔާ މަރަށް އިންސާފު ހޯދުމަށް ކުރިއަށް ގެންދިޔަ ހިނގާލުމުގެ ތެރެއިން
ޒަހަމްތަކަކާއެކު މަރުވެފައި އޮއްވާ ފެނުނު ނ.ހޮޅަދޫ، ޒަކިއްޔާ މޫސާ މަރު މައްސަލާގައި އިންސާފު ހޯދުމަށް އެރަށުގެ ރައްޔިތުން މަގު މައްޗަށް ނުކުމެއްޖެއެވެ.
ހޯމަ ދުވަހުގެ ހަވީރު 4:15 ގައި ޒަކިއްޔާ އާއިލާއިން އިސްނަގައިގެން ކުރިއަށް ގެންދިޔަ މި ހަރަކާތުގައި ގިނަ އަދަދެއްގެ އާއްމު ރައްޔިތުން ބައިވެރިވެފައިވެއެވެ. ސުލްހަވެރިކަމާއެކު ކުރިއަށް ގެންދިޔަ ހިނގާލުމުގައި އެ މަރަށް އިންސާފު ހޯދުމަށް ގޮވާލާފައިވެއެވެ.
މިމަރާ ގުޅޭގޮތުން އިތުރު މައުލޫމާތު ފުލުހުން ނުދޭ ކަމަށާއި، ޒަކިއްޔާ މަރުވި ގޮތް ހާމަކުރުމަށް އެދިފައިވެއެވެ. އަދި ޒަކިއްޔާ މަރުވީ އަމިއްލައަށް ނޫން ކަމަށާއި، މިއީ އެންމެނަށް އެނގޭ ބޮޑު ސިއްރެއް ކަމަށް ހިނގާލުމުގެ ބައިވެރިން ބުނެފައިވެއެވެ.
ކަޅު ހެދުމުގައި ނުކުތް ހިނގާލުމުގެ ބައިވެރިން ބުނެފައިވަނީ ޒަކިއްޔާ މަރުގެ މައްސަލާގައި އާއިލާގެ ފަރާތުން ފުލުހަށް ދިޔަ ނަމަވެސް މިހާތަނަށް އެއްވެސް ކުރިއެރުމެއް ލިބިފައިނުވާ ކަމަށާއި، އިންސާފު ލިބުން ވަރަށް ލަސްވެފައިވާ ކަމަށެވެ. މިއީ ލިބޭ ވަރަށް ބޮޑު އަނިޔާއެއް ކަމަށާއި، ތަހުގީގު އަވަސް ކުރުމަށް ގޮވާލާފައިވެއެވެ. އަދި ގާތިލް ހައްޔަރުކޮށް، ޒިންމާ ނެގުމަށް ވަނީ ގޮވާލާފައެވެ.
ޒަކިއްޔާގެ މަރާ ގުޅޭގޮތުން ފުލުހުން އެންމެފަހުން މައުލޫމާތު ދީފައިވަނީ 18 ސެޕްޓެންބަރ 2024 ގައި ބޭއްވި ނޫސްވެރިންގެ ބައްދަލުވުމުގައެވެ. އެ ނޫސްވެރިންގެ ބައްދަލުވުމުގައި ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ޒަކިއްޔާ ހަށިގަނޑުން ތަހުގީގަށް ބޭނުންވާ ސާމްޕަލްތައް ނަގާފައިވާ ކަމަށާއި، އޮޓޮޕްސީ ނުހަދަން ނިންމީ ޑޮކްޓަރުންގެ ފަރާތުން ބޭނުންވާ ރައުޔު ލިބުމުން ކަމަށެވެ. އެދުވަހު ވެސް ތަހުގީގު ކުރިއަށްދާ މައްސަލައަކަށްވާތީ އިތުރު ތަފްސީލް ހާމަކޮށްފައިނުވެއެވެ.
ޒަކިއްޔާ ހަށިގަނޑު ފެނުނީ އެގެއަށް ކުނި ނަގަން ވަތް މުނިސިޕަލް މުވައްޒަފުންތަކަކަށެވެ. ހަށިގަނޑު ފެނުނުއިރު ކަރުގައި ވަޅި އަޅާފައިވާއިރު، ކައިރީގައި ގިނަ އަދަދެއްގެ ލޭ ހުއްޓެވެ. މި ހާދިސާގެ މައުލޫމާތު ފުލުހުންނަށް ރިޕޯޓު ކޮށްފައިވަނީ 10 ސެޕްޓެންބަރު 2024 ވަނަ ދުވަހުގެ ހެނދުނު 10:10 ހާއިރެވެ.
ފުލުހުންގެ ތަހުގީގަށް ޒަކިއްޔާގެ ހަށިގަނޑު މާލެ ގެނެސްފައިވެއެވެ. އަދި އޭނާގެ ހަށިގަނޑު ވަޅުލާފައިވަނީ 12 ސެޕްޓެންބަރު 2024 ގައެވެ.
